Gintee 23
bal’aam kee pahelee barkat
1bal’aam nay kaha, “yahaan meray liyay saat qurbaangaahen banaaen. saath saath meray liyay saat bail aur saat mendhay tayyaar kar rakhen.” 2balaq nay aisa hee kiya, aur donon nay mil kar har qurbaangaah par ek bail aur ek mendha chadhaaya. 3phir bal’aam nay balaq say kaha, “yahaan apnee qurbaanee kay paas khaday rahen. main kuchh faasilay par jaata hoon, shaayad rabb mujh say milnay aaay. jo kuchh vah mujh par zaahir karay main aap ko bata doonga.”
yah kah kar vah ek oonchay maqaam par chala gaya jo hariyaalee say bilkul maheroom tha. 4vahaan allaah bal’aam say mila. bal’aam nay kaha, “main nay saat qurbaangaahen tayyaar karkay har qurbaangaah par ek bail aur ek mendha qurbaan kiya hai.” 5tab rabb nay usay balaq kay liyay paighaam diya aur kaha, “balaq kay paas vaapas ja aur usay yah paighaam suna.” 6bal’aam balaq kay paas vaapas aaya jo ab tak moaabee sardaaron kay saath apnee qurbaanee kay paas khada tha. 7bal’aam bol utha,
“balaq mujhay araam say yahaan laaya hai, moaabee baadshaah nay mujhay mashriqee pahaadon say bula kar kaha, ‘aao, yaaqoob par meray liyay laanat bhejo. aao, israaeel ko baddua do.’
8main kis tarah un par laanat bhejoon jin par allaah nay laanat naheen bhejee? main kis tarah unhen baddua doon jinhen rabb nay baddua naheen dee?
9main unhen chataanon kee chotee say dekhta hoon, pahaadiyon say un ka mushaahada karta hoon. vaaqaee yah ek aisee qaum hai jo doosron say alag rahetee hai. yah apnay aap ko doosree qaumon say mumtaaz samajhtee hai.
10kaun yaaqoob kee aulaad ko gin sakta hai jo gard kee maanind beshumaar hai. kaun israaeeliyon ka chautha hissa bhee gin sakta hai? rabb karay ki main raastbaazon kee maut maroon, ki mera anjaam un kay anjaam jaisa achchha ho.”
11balaq nay bal’aam say kaha, “aap nay meray saath kya kiya hai? main aap ko apnay dushmanon par laanat bhejnay kay liyay laaya aur aap nay unhen achchhee-khaasee barkat dee hai.” 12bal’aam nay javaab diya, “kya laazim naheen ki main vahee kuchh boloon jo rabb nay bataanay ko kaha hai?”
bal’aam kee doosree barkat
13phir balaq nay us say kaha, “aaen, ham ek aur jagah jaaen jahaan say aap israaeelee qaum ko dekh sakengay, go un kee khaimaagaah ka sirf kinaara hee nazar aaega. aap sab ko naheen dekh sakengay. vaheen say un par meray liyay laanat bhejen.” 14yah kah kar vah us kay saath pisga kee chotee par chadh kar paheredaaron kay maidaan tak pahunch gaya. vahaan bhee us nay saat qurbaangaahen bana kar har ek par ek bail aur ek mendha qurbaan kiya. 15bal’aam nay balaq say kaha, “yahaan apnee qurbaangaah kay paas khaday rahen. main kuchh faasilay par ja kar rabb say miloonga.”
16rabb bal’aam say mila. us nay usay balaq kay liyay paighaam diya aur kaha, “balaq kay paas vaapas ja aur usay yah paighaam suna day.” 17vah vaapas chala gaya. balaq ab tak apnay sardaaron kay saath apnee qurbaanee kay paas khada tha. us nay us say poochha, “rabb nay kya kaha?” 18bal’aam nay kaha, “ai balaq, utho aur suno. ai safor kay betay, meree baat par ghaur karo.
19allaah aadmee naheen jo jhoot bolta hai. vah insaan naheen jo koee faisla karkay baad men pachhtaaay. kya vah kabhee apnee baat par amal naheen karta? kya vah kabhee apnee baat pooree naheen karta?
20mujhay barkat denay ko kaha gaya hai. us nay barkat dee hai aur main yah barkat rok naheen sakta.
21yaaqoob kay gharaanay men kharaabee nazar naheen aatee, israaeel men dukh dikhaaee naheen deta. rabb us ka khuda us kay saath hai, aur qaum baadshaah kee khushee men naaray lagaatee hai.
22allaah unhen misr say nikaal laaya, aur unhen janglee bail kee taaqat haasil hai.
23yaaqoob kay gharaanay kay khilaaf jaadoogree naakaam hai, israaeel kay khilaaf ghaibdaanee befaaida hai. ab yaaqoob kay gharaanay say kaha jaaega, ‘allaah nay kaisa kaam kiya hai!’
24israaeelee qaum shernee kee tarah uthtee aur sherbabar kee tarah khadee ho jaatee hai. jab tak vah apna shikaar na kha lay vah aaraam naheen karta, jab tak vah maaray huay logon ka khoon na pee lay vah naheen letta.”
25yah sun kar balaq nay kaha, “agar aap un par laanat bhejnay say inkaar karen, kam az kam unhen barkat to na den.” 26bal’aam nay javaab diya, “kya main nay aap ko naheen bataaya tha ki jo kuchh bhee rabb kahega main vahee karoonga?”
bal’aam kee teesree barkat
27tab balaq nay bal’aam say kaha, “aaen, main aap ko ek aur jagah lay jaaoon. shaayad allaah raazee ho jaaay ki aap meray liyay vahaan say un par laanat bhejen.” 28vah us kay saath faghoor pahaad par chadh gaya. us kee chotee say yardan kee vaadee ka junoobee hissa yasheemon dikhaaee diya. 29bal’aam nay us say kaha, “meray liyay yahaan saat qurbaangaahen bana kar saat bail aur saat mendhay tayyaar kar rakhen.” 30balaq nay aisa hee kiya. us nay har ek qurbaangaah par ek bail aur ek mendha qurbaan kiya.