Gintee 22

balaq bal’aam ko israaeel par laanat bhejnay kay liyay bulaata hai

¹is kay baad israaeelee moaab kay maidaanon men pahunch kar darya-ay-yardan kay mashriqee kinaaray par yareehoo kay aamnay-saamnay khaimaazan huay.

²moaab kay baadshaah balaq bin safor ko maaloom hua ki israaeeliyon nay amoriyon kay saath kya kuchh kiya hai. ³moaabiyon nay yah bhee dekha ki israaeelee bahut ziyaada hain, is liyay un par dahshat chha gaee. ⁴unhon nay midiyaaniyon kay buzurgon say baat kee, “ab yah hujoom us tarah hamaaray ird-gird ka ilaaqa chat kar jaaega jis tarah bail maidaan kee ghaas chat kar jaata hai.”

⁵tab balaq nay apnay qaasid fator shaher ko bhejay jo darya-ay-furaat par vaaqay tha aur jahaan bal’aam bin baor apnay vatan men raheta tha. qaasid usay bulaanay kay liyay us kay paas pahunchay aur usay balaq ka paighaam sunaaya, “ek qaum misr say nikal aaee hai jo roo-ay-zameen par chha kar meray qareeb hee aabaad huee hai. ⁶is liyay aaen aur in logon par laanat bhejen, kyoonki vah mujh say ziyaada taaqatvar hain. phir shaayad main unhen shikast day kar mulk say bhaga sakoon. kyoonki main jaanta hoon ki jinhen aap barkat detay hain unhen barkat miltee hai aur jin par aap laanat bhejtay hain un par laanat aatee hai.”

⁷yah paighaam lay kar moaab aur midiyaan kay buzurg ravaana huay. un kay paas in’aam kay paisay thay. bal’aam kay paas pahunch kar unhon nay usay balaq ka paighaam sunaaya. ⁸bal’aam nay kaha, “raat yahaan guzaaren. kal main aap ko bata doonga ki rabb is kay baaray men kya farmaata hai.” chunaanchay moaabee sardaar us kay paas thaher gaay.

⁹raat kay vaqt allaah bal’aam par zaahir hua. us nay poochha, “yah aadmee kaun hain jo teray paas aaay hain?” ¹⁰bal’aam nay javaab diya, “moaab kay baadshaah balaq bin safor nay mujhay paighaam bheja hai, ¹¹‘jo qaum misr say nikal aaee hai vah roo-ay-zameen par chha gaee hai. is liyay aaen aur meray liyay un par laanat bhejen. phir shaayad main un say lad kar unhen bhaga denay men kaamyaab ho jaaoon’.” ¹²rabb nay bal’aam say kaha, “un kay saath na jaana. tujhay un par laanat bhejnay kee ijaazat naheen hai, kyoonki un par meree barkat hai.”

¹³aglee subah bal’aam jaag utha to us nay balaq kay sardaaron say kaha, “apnay vatan vaapas chalay jaaen, kyoonki rabb nay mujhay aap kay saath jaanay kee ijaazat naheen dee.” ¹⁴chunaanchay moaabee sardaar khaalee haath balaq kay paas vaapas aaay. unhon nay kaha, “bal’aam hamaaray saath aanay say inkaar karta hai.” ¹⁵tab balaq nay aur sardaar bhejay jo pahelay vaalon kee nisbat taadaad aur uhday kay lihaaz say ziyaada thay. ¹⁶vah bal’aam kay paas ja kar kahenay lagay, “balaq bin safor kahetay hain ki koee bhee baat aap ko meray paas aanay say na rokay, ¹⁷kyoonki main aap ko bada in’aam doonga. aap jo bhee kahengay main karnay kay liyay tayyaar hoon. aaen to sahee aur meray liyay un logon par laanat bhejen.”

¹⁸lekin bal’aam nay javaab diya, “agar balaq apnay mahel ko chaandee aur sonay say bhar kar bhee mujhay day to bhee main rabb apnay khuda kay farmaan kee khilaafvarzee naheen kar sakta, khwaah baat chhotee ho ya badee. ¹⁹aap doosray sardaaron kee tarah raat yahaan guzaaren. itnay men main maaloom karoonga ki rabb mujhay mazeed kya kuchh bataata hai.”

²⁰us raat allaah bal’aam par zaahir hua aur kaha, “choonki yah aadmee tujhay bulaanay aaay hain is liyay un kay saath chala ja. lekin sirf vahee kuchh karna jo main tujhay bataaoonga.”

bal’aam kee gadhee

²¹subah ko bal’aam nay uth kar apnee gadhee par zeen kasa aur moaabee sardaaron kay saath chal pada. ²²lekin allaah nihaayat ghussay hua ki vah ja raha hai, is liyay us ka farishta us ka muqaabla karnay kay liyay raastay men khada ho gaya. bal’aam apnee gadhee par savaar tha aur us kay do naukar us kay saath chal rahay thay. ²³jab gadhee nay dekha ki rabb ka farishta apnay haath men talvaar thaamay huay raastay men khada hai to vah raastay say hat kar khet men chalnay lagee. bal’aam usay maartay maartay raastay par vaapas lay aaya.

²⁴phir vah angoor kay do baaghon kay darmiyaan say guzarnay lagay. raasta tang tha, kyoonki vah donon taraf baaghon kee chaardeevaaree say band tha. ab rabb ka farishta vahaan khada hua. ²⁵gadhee yah dekh kar chaardeevaaree kay saath saath chalnay lagee, aur bal’aam ka paaon kuchla gaya. us nay usay dubaara maara.

²⁶rabb ka farishta aagay nikla aur teesree martaba raastay men khada ho gaya. ab raastay say hat jaanay kee koee gunjaaish naheen thee, na daaeen taraf aur na baaeen taraf. ²⁷jab gadhee nay rabb ka farishta dekha to vah let gaee. bal’aam ko ghussa a gaya, aur us nay usay apnee laathee say khoob maara.

²⁸tab rabb nay gadhee ko bolnay diya, aur us nay bal’aam say kaha, “main nay aap say kya ghalat sulook kiya hai ki aap mujhay ab teesree dafa peet rahay hain?” ²⁹bal’aam nay javaab diya, “too nay mujhay bevuqoof banaaya hai! kaash meray haath men talvaar hotee to main abhee tujhay zabah kar deta!” ³⁰gadhee nay bal’aam say kaha, “kya main aap kee gadhee naheen hoon jis par aap aaj tak savaar hotay rahay hain? kya mujhay kabhee aisa karnay kee aadat thee?” us nay kaha, “naheen.”

³¹phir rabb nay bal’aam kee aankhen kholeen aur us nay rabb kay farishtay ko dekha jo ab tak haath men talvaar thaamay huay raastay men khada tha. bal’aam nay munh kay bal gir kar sijda kiya. ³²rabb kay farishtay nay poochha, “too nay teen baar apnee gadhee ko kyoon peeta? main teray muqaablay men aaya hoon, kyoonki jis taraf too badh raha hai us ka anjaam bura hai. ³³gadhee teen martaba mujhay dekh kar meree taraf say hat gaee. agar vah na hattee to too us vaqt halaak ho gaya hota agarchi main gadhee ko chhod deta.”

³⁴bal’aam nay rabb kay farishtay say kaha, “main nay gunaah kiya hai. mujhay maaloom naheen tha ki too meray muqaablay men raastay men khada hai. lekin agar mera safar tujhay bura lagay to main ab vaapas chala jaaoonga.” ³⁵rabb kay farishtay nay kaha, “in aadmiyon kay saath apna safar jaaree rakh. lekin sirf vahee kuchh kahena jo main tujhay bataaoonga.” chunaanchay bal’aam nay balaq kay sardaaron kay saath apna safar jaaree rakha.

³⁶jab balaq ko khabar milee ki bal’aam a raha hai to vah us say milnay kay liyay moaab kay us shaher tak gaya jo moaab kee sarhadd darya-ay-arnon par vaaqay hai. ³⁷us nay bal’aam say kaha, “kya main nay aap ko ittila naheen bhejee thee ki aap zaroor aaen? aap kyoon naheen aaay? kya aap nay socha ki main aap ko munaasib in’aam naheen day paaoonga?” ³⁸bal’aam nay javaab diya, “ba-har-haal ab main pahunch gaya hoon. lekin main sirf vahee kuchh kah sakta hoon jo allaah nay pahelay hee meray munh men daal diya hai.”

³⁹phir bal’aam balaq kay saath qiryat-husaat gaya. ⁴⁰vahaan balaq nay gaay-bail aur bhed-bakriyaan qurbaan karkay un kay gosht men say bal’aam aur us kay saath vaalay sardaaron ko day diya. ⁴¹aglee subah balaq bal’aam ko saath lay kar ek oonchee jagah par chadh gaya jis ka naam baamot-baal tha. vahaan say israaeelee khaimaagaah ka kinaara nazar aata tha.