Gintee 21
kan’aanee mulk-ay-araad par fatah
1dasht-ay-najab kay kan’aanee mulk araad kay baadshaah ko khabar milee ki israaeelee athaarim kee taraf badh rahay hain. us nay un par hamla kiya aur kaee ek ko pakad kar qaid kar liya. 2tab israaeeliyon nay rabb kay saamnay mannat maan kar kaha, “agar too hamen un par fatah dega to ham unhen un kay shaheron samet tabaah kar dengay.” 3rabb nay un kee sunee aur kan’aaniyon par fatah bakhshee. israaeeliyon nay unhen un kay shaheron samet pooree tarah tabaah kar diya. is liyay us jagah ka naam hurma yaanee tabaahee pad gaya.
peetal ka saamp
4hor pahaad say ravaana ho kar vah baher-ay-qulzum kee taraf chal diay taaki adom kay mulk men say guzarna na paday. lekin chaltay chaltay log besabar ho gaay. 5vah rabb aur moosa kay khilaaf baaten karnay lagay, “aap hamen misr say nikaal kar registaan men marnay kay liyay kyoon lay aaay hain? yahaan na rotee dastayaab hai na paanee. hamen is ghatiya qism kee khuraak say ghin aatee hai.”
6tab rabb nay un kay darmiyaan zahereelay saamp bhej diay jin kay kaatnay say bahut say log mar gaay. 7phir log moosa kay paas aaay. unhon nay kaha, “ham nay rabb aur aap kay khilaaf baaten kartay huay gunaah kiya. hamaaree sifaarish karen ki rabb ham say saamp door kar day.”
moosa nay un kay liyay dua kee 8to rabb nay moosa say kaha, “ek saamp bana kar usay khambay say latka day. jo bhee dasa gaya ho vah usay dekh kar bach jaaega.” 9chunaanchay moosa nay peetal ka ek saamp banaaya aur khamba khada karkay saamp ko us say latka diya. aur aisa hua ki jisay bhee dasa gaya tha vah peetal kay saamp par nazar karkay bach gaya.
moaab kee taraf safar
10israaeelee ravaana huay aur obot men apnay khaimay lagaaay. 11phir vahaan say kooch karkay ayyay-abaareem men deray daalay, us registaan men jo mashriq kee taraf moaab kay saamnay hai. 12vahaan say ravaana ho kar vah vaadee-ay-zarad men khaimaazan huay. 13jab vaadee-ay-zarad say ravaana huay to darya-ay-arnon kay parlay yaanee junoobee kinaaray par khaimaazan huay. yah darya registaan men hai aur amoriyon kay ilaaqay say nikalta hai. yah amoriyon aur moaabiyon kay darmiyaan kee sarhadd hai. 14is ka zikr kitaab ‘rabb kee jangen’ men bhee hai,
“vaaheb jo soofa men hai, darya-ay-arnon kee vaadiyaan 15aur vaadiyon ka vah dhalaan jo aar shaher tak jaata hai aur moaab kee sarhadd par vaaqay hai.”
16vahaan say vah bair yaanee ‘kuaan’ pahunchay. yah vahee bair hai jahaan rabb nay moosa say kaha, “logon ko ikattha kar to main unhen paanee doonga.” 17us vaqt israaeeliyon nay yah geet gaaya,
“ai kuen, phoot nikal! us kay baaray men geet gaao,
18us kuen kay baaray men jisay sardaaron nay khoda, jisay qaum kay raahanumaaon nay asa-ay-shaahee aur apnee laathiyon say khoda.”
phir vah registaan say mattna ko gaay, 19mattna say naheleeel ko aur naheleeel say baamaat ko. 20baamaat say vah moaabiyon kay ilaaqay kee us vaadee men pahunchay jo pisga pahaad kay daaman men hai. is pahaad kee chotee say vaadee-ay-yardan ka junoobee hissa yasheemon khoob nazar aata hai.
seehon aur oj kee shikast
21israaeel nay amoriyon kay baadshaah seehon ko ittila bhejee, 22“hamen apnay mulk men say guzarnay den. ham seedhay seedhay guzar jaaengay. na ham koee khet ya angoor ka baagh chhedengay, na kisee kuen ka paanee piengay. ham aap kay mulk men say seedhay guzartay huay shaaharaah par hee rahengay.” 23lekin seehon nay unhen guzarnay na diya balki apnee fauj jama karkay israaeel say ladnay kay liyay registaan men chal pada. yahez pahunch kar us nay israaeeliyon say jang kee. 24lekin israaeeliyon nay usay qatl kiya aur darya-ay-arnon say lay kar darya-ay-yabboq tak yaanee ammoniyon kee sarhadd tak us kay mulk par qabza kar liya. vah is say aagay na ja sakay kyoonki ammoniyon nay apnee sarhadd kee hisaarabandee kar rakhee thee. 25israaeelee tamaam amoree shaheron par qabza karkay un men rahenay lagay. un men hasbon aur us kay ird-gird kee aabaadiyaan shaamil theen.
26hasbon amoree baadshaah seehon ka daar-ul-hakoomat tha. us nay moaab kay pichhlay baadshaah say lad kar us say yah ilaaqa darya-ay-arnon tak chheen liya tha. 27us vaakiay ka zikr shaairee men yoon kiya gaya hai,
“hasbon kay paas a kar usay az sar-ay-nau taameer karo, seehon kay shaher ko az sar-ay-nau qaaim karo.
28hasbon say aag niklee, seehon kay shaher say shola bhadka. us nay moaab kay shaher aar ko jala diya, arnon kee bulandiyon kay maalikon ko bhasm kiya.
29ai moaab, tujh par afsos! ai kamos devta kee qaum, too halaak huee hai. kamos nay apnay beton ko mafroor aur apnee betiyon ko amoree baadshaah seehon kee qaidee bana diya hai.
30lekin jab ham nay amoriyon par teer chalaaay to hasbon ka ilaaqa deebon tak barbaad hua. ham nay nufah tak sab kuchh tabaah kiya, vah nufah jis ka ilaaqa meedba tak hai.”
31yoon israaeel amoriyon kay mulk men aabaad hua. 32vahaan say moosa nay apnay jaasoos yaazer shaher bhejay. vahaan bhee amoree rahetay thay. israaeeliyon nay yaazer aur us kay ird-gird kay shaheron par bhee qabza kiya aur vahaan kay amoriyon ko nikaal diya.
33is kay baad vah mud kar basan kee taraf badhay. tab basan ka baadshaah oj apnee tamaam fauj lay kar un say ladnay kay liyay shaher idraee aaya. 34us vaqt rabb nay moosa say kaha, “oj say na darna. main usay, us kee tamaam fauj aur us ka mulk teray havaalay kar chuka hoon. us kay saath vahee sulook kar jo too nay amoriyon kay baadshaah seehon kay saath kiya, jis ka daar-ul-hakoomat hasbon tha.” 35israaeeliyon nay oj, us kay beton aur tamaam fauj ko halaak kar diya. koee bhee na bacha. phir unhon nay basan kay mulk par qabza kar liya.