Gintee 20

chataan say paanee

¹pahelay maheenay men israaeel kee pooree jamaaat dasht-ay-seen men pahunch kar qaadis men rahenay lagee. vahaan mariyam nay vafaat paaee aur vaheen usay dafnaaya gaya.

²qaadis men paanee dastayaab naheen tha, is liyay log moosa aur haaroon kay muqaablay men jama huay. ³vah moosa say yah kah kar jhagadnay lagay, “kaash ham apnay bhaaiyon kay saath rabb kay saamnay mar gaay hotay! ⁴aap rabb kee jamaaat ko kyoon is registaan men lay aaay? kya is liyay ki ham yahaan apnay maveshiyon samet mar jaaen? ⁵aap hamen misr say nikaal kar us naakhushagavaar jagah par kyoon lay aaay hain? yahaan na to anaaj, na anjeer, angoor ya anaar dastayaab hain. paanee bhee naheen hai!”

⁶moosa aur haaroon logon ko chhod kar mulaaqaat kay khaimay kay darvaazay par gaay aur munh kay bal giray. tab rabb ka jalaal un par zaahir hua. ⁷rabb nay moosa say kaha, ⁸“ahd kay sandooq kay saamnay padee laathee pakad kar haaroon kay saath jamaaat ko ikattha kar. un kay saamnay chataan say baat karo to vah apna paanee degee. yoon too chataan men say jamaaat kay liyay paanee nikaal kar unhen un kay maveshiyon samet paanee pilaaega.”

⁹moosa nay aisa hee kiya. us nay ahd kay sandooq kay saamnay padee laathee uthaaee ¹⁰aur haaroon kay saath jamaaat ko chataan kay saamnay ikattha kiya. moosa nay un say kaha, “ai baghaavat karnay vaalo, suno! kya ham is chataan men say tumhaaray liyay paanee nikaalen?” ¹¹us nay laathee ko utha kar chataan ko do martaba maara to bahut sa paanee phoot nikla. jamaaat aur un kay maveshiyon nay khoob paanee piya.

¹²lekin rabb nay moosa aur haaroon say kaha, “tumhaara mujh par itna eemaan naheen tha ki meree quddoosiyat ko israaeeliyon kay saamnay qaaim rakhtay. is liyay tum us jamaaat ko us mulk men naheen lay jaaogay jo main unhen doonga.”

¹³yah vaaqia mareeba yaanee ‘jhagadna’ kay paanee par hua. vahaan israaeeliyon nay rabb say jhagda kiya, aur vahaan us nay un par zaahir kiya ki vah quddoos hai.

adom israaeel ko guzarnay naheen detaa

¹⁴qaadis say moosa nay adom kay baadshaah ko ittila bhejee, “aap kay bhaaee israaeel kee taraf say ek guzaarish hai. aap ko un tamaam museebaton kay baaray men ilm hai jo ham par aan padee hain. ¹⁵hamaaray baapdaada misr gaay thay aur vahaan ham bahut arsay tak rahay. misriyon nay hamaaray baapdaada aur ham say bura sulook kiya. ¹⁶lekin jab ham nay chilla kar rabb say minnat kee to us nay hamaaree sunee aur farishta bhej kar hamen misr say nikaal laaya. ab ham yahaan qaadis shaher men hain jo aap kee sarhadd par hai. ¹⁷meharbaanee karkay hamen apnay mulk men say guzarnay den. ham kisee khet ya angoor kay baagh men naheen jaaengay, na kisee kuen ka paanee piengay. ham shaaharaah par hee rahengay. aap kay mulk men say guzartay huay ham us say na daaeen aur na baaeen taraf hatengay.”

¹⁸lekin adomiyon nay javaab diya, “yahaan say na guzarna, varna ham nikal kar aap say ladengay.” ¹⁹israaeel nay dubaara khabar bhejee, “ham shaaharaah par rahetay huay guzarengay. agar hamen ya hamaaray jaanvaron ko paanee kee zaroorat huee to paisay day kar khareed lengay. ham paidal hee guzarna chaahatay hain, aur kuchh naheen chaahatay.”

²⁰lekin adomiyon nay dubaara inkaar kiya. saath hee unhon nay un kay saath ladnay kay liyay ek badee aur taaqatvar fauj bhejee.

²¹choonki adom nay unhen guzarnay kee ijaazat na dee is liyay israaeelee mud kar doosray raastay say chalay gaay.

haaroon kee vafaat

²²israaeel kee pooree jamaaat qaadis say ravaana ho kar hor pahaad kay paas pahunchee. ²³yah pahaad adom kee sarhadd par vaaqay tha. vahaan rabb nay moosa aur haaroon say kaha, ²⁴“haaroon ab kooch karkay apnay baapdaada say ja milega. vah us mulk men daakhil naheen hoga jo main israaeeliyon ko doonga, kyoonki tum donon nay mareeba kay paanee par meray hukm kee khilaafvarzee kee. ²⁵haaroon aur us kay betay ileeazar ko lay kar hor pahaad par chadh ja. ²⁶haaroon kay kapday utaar kar us kay betay ileeazar ko pahena dena. phir haaroon kooch karkay apnay baapdaada say ja milega.”

²⁷moosa nay aisa hee kiya jaisa rabb nay kaha. teenon pooree jamaaat kay dekhtay dekhtay hor pahaad par chadh gaay. ²⁸moosa nay haaroon kay kapday utarva kar us kay betay ileeazar ko pahena diay. phir haaroon vahaan pahaad kee chotee par faut hua, aur moosa aur ileeazar neechay utar gaay. ²⁹jab pooree jamaaat ko maaloom hua ki haaroon intiqaal kar gaya hai to sab nay 30 din tak us kay liyay maatam kiya.