Gintee 2
khaimaagaah men qabeelon kee tarteeb
1rabb nay moosa aur haaroon say kahaa 2ki israaeelee apnay khaimay kuchh faasilay par mulaaqaat kay khaimay kay ird-gird lagaaen. har ek apnay apnay alam aur apnay apnay aabaaee gharaanay kay nishaan kay saath khaimaazan ho.
3in hidaayaat kay mutaabiq maqdis kay mashriq men yahoodaah ka alam tha jis kay ird-gird teen dastay khaimaazan thay. pahelay, yahoodaah ka qabeela jis ka kamaandar nahson bin ammeenadaab tha, 4aur jis kay lashkar kay 74,600 faujee thay. 5doosray, ishkaar ka qabeela jis ka kamaandar nataneeel bin zughar tha, 6aur jis kay lashkar kay 54,400 faujee thay. 7teesray, zabooloon ka qabeela jis ka kamaandar iliyaab bin helon thaa 8aur jis kay lashkar kay 57,400 faujee thay. 9teenon qabeelon kay faujiyon kee kul taadaad 1,86,400 thee. ravaana hotay vaqt yah aagay chaltay thay.
10maqdis kay junoob men roobin ka alam tha jis kay ird-gird teen dastay khaimaazan thay. pahelay, roobin ka qabeela jis ka kamaandar ileesoor bin shadiyoor tha, 11aur jis kay 46,500 faujee thay. 12doosray, shamaaoon ka qabeela jis ka kamaandar saloomeeel bin sooreeshaddee tha, 13aur jis kay 59,300 faujee thay. 14teesray, jad ka qabeela jis ka kamaandar iliyaasaf bin daooel tha, 15aur jis kay 45,650 faujee thay. 16teenon qabeelon kay faujiyon kee kul taadaad 1,51,450 thee. ravaana hotay vaqt yah mashriqee qabeelon kay peechhay chaltay thay.
17in junoobee qabeelon kay baad laavee mulaaqaat ka khaima utha kar qabeelon kay ain beech men chaltay thay. qabeelay us tarteeb say ravaana hotay thay jis tarteeb say vah apnay khaimay lagaatay thay. har qabeela apnay alam kay peechhay chalta tha.
18maqdis kay maghrib men ifraaeem ka alam tha jis kay ird-gird teen dastay khaimaazan thay. pahelay, ifraaeem ka qabeela jis ka kamaandar ileesma bin ammeehood tha, 19aur jis kay 40,500 faujee thay. 20doosray, manassee ka qabeela jis ka kamaandar jamaleeel bin fadaahsoor tha, 21aur jis kay 32,200 faujee thay. 22teesray, binyameen ka qabeela jis ka kamaandar abidaan bin jidaaoonee tha, 23aur jis kay 35,400 faujee thay. 24teenon qabeelon kay faujiyon kee kul taadaad 1,08,100 thee. ravaana hotay vaqt yah junoobee qabeelon kay peechhay chaltay thay.
25maqdis kay shimaal men daan ka alam tha jis kay ird-gird teen dastay khaimaazan thay. pahelay, daan ka qabeela jis ka kamaandar akheeazar bin ammeeshaddee tha, 26aur jis kay 62,700 faujee thay. 27doosray, aashar ka qabeela jis ka kamaandar fajaeeel bin akraan tha, 28aur jis kay 41,500 faujee thay. 29teesray, naftaalee ka qabeela jis ka kamaandar akheera bin enaan tha, 30aur jis kay 53,400 faujee thay. 31teenon qabeelon kee kul taadaad 1,57,600 thee. vah aakhir men apna alam utha kar ravaana hotay thay.
32pooree khaimaagaah kay faujiyon kee kul taadaad 6,03,550 thee. 33sirf laavee is taadaad men shaamil naheen thay, kyoonki rabb nay moosa ko hukm diya tha ki un kee bhartee na kee jaaay.
34yoon israaeeliyon nay sab kuchh un hidaayaat kay mutaabiq kiya jo rabb nay moosa ko dee theen. un kay mutaabiq hee vah apnay jhandon kay ird-gird apnay khaimay lagaatay thay aur un kay mutaabiq hee apnay kumbon aur aabaaee gharaanon kay saath ravaana hotay thay.