Gintee 19

surkh gaay kee raakh

¹rabb nay moosa aur haaroon say kaha, ²“israaeeliyon ko bataana ki vah tumhaaray paas surkh rang kee javaan gaay lay kar aaen. us men nuqs na ho aur us par kabhee jooa na rakha gaya ho. ³tum usay ileeazar imaam ko dena jo usay khaimay kay baahar lay jaaay. vahaan usay us kee maujoodgee men zabah kiya jaaay. ⁴phir ileeazar imaam apnee unglee say us kay khoon say kuchh lay kar mulaaqaat kay khaimay kay saamnay vaalay hissay kee taraf chhidkay. ⁵us kee maujoodgee men pooree kee pooree gaay ko jalaaya jaaay. us kee khaal, gosht, khoon aur antadiyon ka gobar bhee jalaaya jaaay. ⁶phir vah deodaar kee lakdee, zoofa aur qirmizee rang ka dhaaga lay kar usay jaltee huee gaay par phainkay. ⁷is kay baad vah apnay kapdon ko dho kar naha lay. phir vah khaimaagaah men a sakta hai lekin shaam tak naapaak rahega.

⁸jis aadmee nay gaay ko jalaaya vah bhee apnay kapdon ko dho kar naha lay. vah bhee shaam tak naapaak rahega.

⁹ek doosra aadmee jo paak hai gaay kee raakh ikatthee karkay khaimaagaah kay baahar kisee paak jagah par daal day. vahaan israaeel kee jamaaat usay naapaakee door karnay ka paanee tayyaar karnay kay liyay mahfooz rakhay. yah gunaah say paak karnay kay liyay istemaal hoga. ¹⁰jis aadmee nay raakh ikatthee kee hai vah bhee apnay kapdon ko dho lay. vah bhee shaam tak naapaak rahega. yah israaeeliyon aur un kay darmiyaan rahenay vaalay pardesiyon kay liyay daaimee usool ho.

laash chhoonay say paak ho jaanay ka tareeqaa

¹¹jo bhee laash chhuay vah saat din tak naapaak rahega. ¹²teesray aur saatven din vah apnay aap par naapaakee door karnay ka paanee chhidak kar paak-saaf ho jaaay. is kay baad hee vah paak hoga. lekin agar vah in donon dinon men apnay aap ko yoon paak na karay to naapaak rahega. ¹³jo bhee laash chhoo kar apnay aap ko yoon paak naheen karta vah rabb kay maqdis ko naapaak karta hai. laazim hai ki usay israaeel men say mitaaya jaaay. choonki naapaakee door karnay ka paanee us par chhidka naheen gaya is liyay vah naapaak rahega.

¹⁴agar koee deray men mar jaaay to jo bhee us vaqt us men maujood ho ya daakhil ho jaaay vah saat din tak naapaak rahega. ¹⁵har khula bartan jo dhaknay say band na kiya gaya ho vah bhee naapaak hoga. ¹⁶isee tarah jo khulay maidaan men laash chhuay vah bhee saat din tak naapaak rahega, khwaah vah talvaar say ya tabaee maut mara ho. jo insaan kee koee haddee ya qabr chhuay vah bhee saat din tak naapaak rahega.

¹⁷naapaakee door karnay kay liyay us surkh rang kee gaay kee raakh men say kuchh lena jo gunaah door karnay kay liyay jalaaee gaee thee. usay bartan men daal kar taaza paanee men milaana. ¹⁸phir koee paak aadmee kuchh zoofa lay aur usay us paanee men dubo kar maray huay shakhs kay khaimay, us kay saamaan aur un logon par chhidkay jo us kay martay vaqt vahaan thay. isee tarah vah paanee us shakhs par bhee chhidkay jis nay tabaee ya ghairtabaee maut maray huay shakhs ko, kisee insaan kee haddee ko ya koee qabr chhooee ho. ¹⁹paak aadmee yah paanee teesray aur saatven din naapaak shakhs par chhidkay. saatven din vah usay paak karay. jisay paak kiya ja raha hai vah apnay kapday dho kar naha lay to vah usee shaam paak hoga.

²⁰lekin jo naapaak shakhs apnay aap ko paak naheen karta usay jamaaat men say mitaana hai, kyoonki us nay rabb ka maqdis naapaak kar diya hai. naapaakee door karnay ka paanee us par naheen chhidka gaya, is liyay vah naapaak raha hai. ²¹yah un kay liyay daaimee usool hai. jis aadmee nay naapaakee door karnay ka paanee chhidka hai vah bhee apnay kapday dhoay. balki jis nay bhee yah paanee chhua hai shaam tak naapaak rahega. ²²aur naapaak shakhs jo bhee cheez chhuay vah naapaak ho jaatee hai. na sirf yah balki jo baad men yah naapaak cheez chhuay vah bhee shaam tak naapaak rahega.”