Gintee 18

imaamon aur laaviyon kee zimmaadaariyaan

¹rabb nay haaroon say kaha, “maqdis teree, teray beton aur laavee kay qabeelay kee zimmaadaaree hai. agar is men koee ghaltee ho jaaay to tum qusoorvaar thaherogay. isee tarah imaamon kee khidmat sirf teree aur teray beton kee zimmaadaaree hai. agar is men koee ghaltee ho jaaay to too aur teray betay qusoorvaar thaherengay. ²apnay qabeelay laavee kay baaqee aadmiyon ko bhee meray qareeb aanay day. vah teray saath mil kar yoon hissa len ki vah teree aur teray beton kee khidmat karen jab tum khaimay kay saamnay apnee zimmaadaariyaan nibhaaogay. ³teree khidmat aur khaimay men khidmat un kee zimmaadaaree hai. lekin vah khaimay kay makhsoos-o-muqaddas saamaan aur qurbaangaah kay qareeb na jaaen, varna na sirf vah balki too bhee halaak ho jaaega. ⁴yoon vah teray saath mil kar mulaaqaat kay khaimay kay pooray kaam men hissa len. lekin kisee aur ko aisa karnay kee ijaazat naheen hai. ⁵sirf too aur teray betay maqdis aur qurbaangaah kee dekh-bhaal karen taaki mera ghazab dubaara israaeeliyon par na bhadkay. ⁶main hee nay israaeeliyon men say teray bhaaiyon yaanee laaviyon ko chun kar tujhay tuhfay kay taur par diya hai. vah rabb kay liyay makhsoos hain taaki khaimay men khidmat karen. ⁷lekin sirf too aur teray betay imaam kee khidmat sar’anjaam den. main tumhen imaam ka uhda tuhfay kay taur par deta hoon. koee aur qurbaangaah aur muqaddas cheezon kay nazdeek na aaay, varna usay saza-ay-maut dee jaaay.”

imaamon ka hissaa

⁸rabb nay haaroon say kaha, “main nay khud muqarrar kiya hai ki tamaam uthaanay vaalee qurbaaniyaan tera hissa hon. yah hamesha tak qurbaaniyon men say tera aur teree aulaad ka hissa hain. ⁹tumhen muqaddastareen qurbaaniyon ka vah hissa milna hai jo jalaaya naheen jaata. haan, tujhay aur teray beton ko vahee hissa milna hai, khwaah vah mujhay ghalla kee nazren, gunaah kee qurbaaniyaan ya qusoor kee qurbaaniyaan pesh karen. ¹⁰usay muqaddas jagah par khaana. har mard usay kha sakta hai. khayaal rakh ki vah makhsoos-o-muqaddas hai.

¹¹main nay muqarrar kiya hai ki tamaam hilaanay vaalee qurbaaniyon ka uthaaya hua hissa tera hai. yah hamesha kay liyay teray aur teray betay-betiyon ka hissa hai. teray gharaanay ka har fard usay kha sakta hai. shart yah hai ki vah paak ho. ¹²jab log rabb ko apnee faslon ka pahela phal pesh karengay to vah tera hee hissa hoga. main tujhay zaitoon kay tel, naee mai aur anaaj ka behtareen hissa deta hoon. ¹³faslon ka jo bhee pahela phal vah rabb ko pesh karengay vah tera hee hoga. teray gharaanay ka har paak fard usay kha sakta hai. ¹⁴israaeel men jo bhee cheez rabb kay liyay makhsoos-o-muqaddas kee gaee hai vah teree hogee. ¹⁵har insaan aur har haivaan ka jo pahelautha rabb ko pesh kiya jaata hai vah tera hee hai. lekin laazim hai ki too har insaan aur har naapaak jaanvar kay pahelauthay ka fidya day kar usay chhudaaay.

¹⁶jab vah ek maah kay hain to un kay ivz chaandee kay paanch sikkay dena. (har sikkay ka vazan maqdis kay baaton kay mutaabiq 11 graam ho). ¹⁷lekin gaay-bailon aur bhed-bakriyon kay pahelay bachchon ka fidya yaanee muaavaza na dena. vah makhsoos-o-muqaddas hain. un ka khoon qurbaangaah par chhidak dena aur un kee charbee jala dena. aisee qurbaanee rabb ko pasand hogee. ¹⁸un ka gosht vaisay hee tumhaaray liyay ho, jaisay hilaanay vaalee qurbaanee ka seena aur dahenee raan bhee tumhaaray liyay hain.

¹⁹muqaddas qurbaaniyon men say tamaam uthaanay vaalee qurbaaniyaan tera aur teray betay-betiyon ka hissa hain. main nay usay hamesha kay liyay tujhay diya hai. yah namak ka daaimee ahd hai jo main nay teray aur teree aulaad kay saath qaaim kiya hai.”

laaviyon ka hissaa

²⁰rabb nay haaroon say kaha, “too meeraas men zameen naheen paaega. israaeel men tujhay koee hissa naheen diya jaaega, kyoonki israaeeliyon kay darmiyaan main hee tera hissa aur teree meeraas hoon. ²¹apnee paidaavaar ka jo dasvaan hissa israaeelee mujhay detay hain vah main laaviyon ko deta hoon. yah un kee viraasat hai, jo unhen mulaaqaat kay khaimay men khidmat karnay kay badlay men miltee hai. ²²ab say israaeelee mulaaqaat kay khaimay kay qareeb na aaen, varna unhen apnee khata ka nateeja bardaasht karna padega aur vah halaak ho jaaengay. ²³sirf laavee mulaaqaat kay khaimay men khidmat karen. agar is men koee ghaltee ho jaaay to vahee qusoorvaar thaherengay. yah ek daaimee usool hai. unhen israaeel men meeraas men zameen naheen milegee. ²⁴kyoonki main nay unhen vahee dasvaan hissa meeraas kay taur par diya hai jo israaeelee mujhay uthaanay vaalee qurbaanee kay taur par pesh kartay hain. is vajah say main nay un kay baaray men kaha ki unhen baaqee israaeeliyon kay saath meeraas men zameen naheen milegee.”

laaviyon ka dasvaan hissaa

²⁵rabb nay moosa say kaha, ²⁶“laaviyon ko bataana ki tumhen israaeeliyon kee paidaavaar ka dasvaan hissa milega. yah rabb kee taraf say tumhaaree viraasat hogee. laazim hai ki tum is ka dasvaan hissa rabb ko uthaanay vaalee qurbaanee kay taur par pesh karo. ²⁷tumhaaree yah qurbaanee naay anaaj ya naay angoor kay ras kee qurbaanee kay baraabar qaraar dee jaaegee. ²⁸is tarah tum bhee rabb ko israaeeliyon kee paidaavaar kay dasven hissay men say uthaanay vaalee qurbaanee pesh karogay. rabb kay liyay yah qurbaanee haaroon imaam ko dena. ²⁹jo bhee tumhen mila hai us men say sab say achchha aur muqaddas hissa rabb ko dena. ³⁰jab tum is ka sab say achchha hissa pesh karogay to usay naay anaaj ya naay angoor kay ras kee qurbaanee kay baraabar qaraar diya jaaega. ³¹tum apnay gharaanon samet is ka baaqee hissa kaheen bhee kha saktay ho, kyoonki yah mulaaqaat kay khaimay men tumhaaree khidmat ka ajr hai. ³²agar tum nay pahelay is ka behtareen hissa pesh kiya ho to phir isay khaanay men tumhaara koee qusoor naheen hoga. phir israaeeliyon kee makhsoos-o-muqaddas qurbaaniyaan tum say naapaak naheen ho jaaengee aur tum naheen marogay.”