Gintee 17
haaroon kee laathee say komplen nikaltee hain
1rabb nay moosa say kaha, 2“israaeeliyon say baat karkay un say 12 laathiyaan mangva lay, har qabeelay kay sardaar say ek laathee. har laathee par us kay maalik ka naam likhna. 3laavee kee laathee par haaroon ka naam likhna, kyoonki har qabeelay kay sardaar kay liyay ek laathee hogee. 4phir un ko mulaaqaat kay khaimay men ahd kay sandooq kay saamnay rakh jahaan meree tum say mulaaqaat hotee hai. 5jis aadmee ko main nay chun liya hai us kee laathee say komplen phoot nikalengee. is tarah main tumhaaray khilaaf israaeeliyon kee budabudaahat khatm kar doonga.”
6chunaanchay moosa nay israaeeliyon say baat kee, aur qabeelon kay har sardaar nay usay apnee laathee dee. in 12 laathiyon men haaroon kee laathee bhee shaamil thee. 7moosa nay unhen mulaaqaat kay khaimay men ahd kay sandooq kay saamnay rakha. 8aglay din jab vah mulaaqaat kay khaimay men daakhil hua to us nay dekha ki laavee kay qabeelay kay sardaar haaroon kee laathee say na sirf komplen phoot niklee hain balki phool aur pakay huay baadaam bhee lagay hain.
9moosa tamaam laathiyaan rabb kay saamnay say baahar la kar israaeeliyon kay paas lay aaya, aur unhon nay un ka muaaina kiya. phir har ek nay apnee apnee laathee vaapas lay lee. 10rabb nay moosa say kaha, “haaroon kee laathee ahd kay sandooq kay saamnay rakh day. yah baaghee israaeeliyon ko yaad dilaaegee ki vah apna budbudaana band karen, varna halaak ho jaaengay.”
11moosa nay aisa hee kiya. 12lekin israaeeliyon nay moosa say kaha, “haay, ham mar jaaengay. haay, ham halaak ho jaaengay, ham sab halaak ho jaaengay. 13jo bhee rabb kay maqdis kay qareeb aaay vah mar jaaega. kya ham sab hee halaak ho jaaengay?”