Gintee 15
kan’aan men qurbaaniyaan pesh karnay ka tareeqaa
1rabb nay moosa say kaha, 2“israaeeliyon ko bataana ki jab tum us mulk men daakhil hogay jo main tumhen doongaa 3-4 to jalnay vaalee qurbaaniyaan yoon pesh karna :
agar tum apnay gaay-bailon ya bhed-bakriyon men say aisee qurbaanee pesh karna chaaho jis kee khushboo rabb ko pasand ho to saath saath dedh kilograam behtareen maida bhee pesh karo jo ek litar zaitoon kay tel kay saath milaaya gaya ho. is men koee farq naheen ki yah bhasm honay vaalee qurbaanee, mannat kee qurbaanee, dilee khushee kee qurbaanee ya kisee eed kee qurbaanee ho.
5har bhed ko pesh kartay vaqt ek litar mai bhee mai kee nazar kay taur par pesh karna. 6jab mendha qurbaan kiya jaaay 3 kilograam behtareen maida bhee saath pesh karna jo sava litar tel kay saath milaaya gaya ho. 7sava litar mai bhee mai kee nazar kay taur par pesh kee jaaay. aisee qurbaanee kee khushboo rabb ko pasand aaegee.
8agar too rabb ko bhasm honay vaalee qurbaanee, mannat kee qurbaanee ya salaamatee kee qurbaanee kay taur par javaan bail pesh karna chaahe 9to us kay saath saadhay 4 kilograam behtareen maida bhee pesh karna jo do litar tel kay saath milaaya gaya ho. 10do litar mai bhee mai kee nazar kay taur par pesh kee jaaay. aisee qurbaanee kee khushboo rabb ko pasand hai. 11laazim hai ki jab bhee kisee gaay, bail, bhed, mendhay, bakree ya bakray ko chadhaaya jaaay to aisa hee kiya jaaay.
12agar ek say zaaid jaanvaron ko qurbaan karna hai to har ek kay liyay muqarrara ghalla aur mai kee nazren bhee saath hee pesh kee jaaen.
13laazim hai ki har desee israaeelee jalnay vaalee qurbaaniyaan pesh kartay vaqt aisa hee karay. phir un kee khushboo rabb ko pasand aaegee. 14yah bhee laazim hai ki israaeel men aarizee ya mustaqil taur par rahenay vaalay pardesee in usoolon kay mutaabiq apnee qurbaaniyaan chadhaaen. phir un kee khushboo rabb ko pasand aaegee. 15mulk-ay-kan’aan men rahenay vaalay tamaam logon kay liyay paabandiyaan ek jaisee hain, khwaah vah desee hon ya pardesee, kyoonki rabb kee nazar men pardesee tumhaaray baraabar hai. yah tumhaaray aur tumhaaree aulaad kay liyay daaimee usool hai. 16tumhaaray aur tumhaaray saath rahenay vaalay pardesee kay liyay ek hee shareeat hai.”
fasal kay liyay shukrguzaaree kee qurbaanee
17rabb nay moosa say kaha, 18“israaeeliyon ko bataana ki jab tum us mulk men daakhil hogay jis men main tumhen lay ja raha hoon 19aur vahaan kee paidaavaar khaaogay to pahelay us ka ek hissa uthaanay vaalee qurbaanee kay taur par rabb ko pesh karna. 20fasal kay pahelay khaalis aatay men say meray liyay ek rotee bana kar uthaanay vaalee qurbaanee kay taur par pesh karo. vah gaahanay kee jagah kee taraf say rabb kay liyay uthaanay vaalee qurbaanee hogee. 21apnee fasal kay pahelay khaalis aatay men say yah qurbaanee pesh kiya karo. yah usool hamesha tak laagoo rahay.
naadaanista gunaahon kay liyay qurbaaniyaan
22ho sakta hai ki ghairiraadee taur par tum say ghaltee huee hai aur tum nay un ahkaam par pooray taur par amal naheen kiya jo rabb moosa ko day chuka hai 23ya jo vah aanay vaalee naslon ko dega. 24agar jamaaat is baat say naavaaqif thee aur ghairiraadee taur par us say ghaltee huee to phir pooree jamaaat ek javaan bail bhasm honay vaalee qurbaanee kay taur par pesh karay. saath hee vah muqarrara ghalla aur mai kee nazren bhee pesh karay. is kee khushboo rabb ko pasand hogee. is kay ilaava jamaaat gunaah kee qurbaanee kay liyay ek bakra pesh karay. 25imaam israaeel kee pooree jamaaat ka kaffaara day to unhen muaafee milegee, kyoonki un ka gunaah ghairiraadee tha aur unhon nay rabb ko bhasm honay vaalee qurbaanee aur gunaah kee qurbaanee pesh kee hai. 26israaeeliyon kee pooree jamaaat ko pardesiyon samet muaafee milegee, kyoonki gunaah ghairiraadee tha.
27agar sirf ek shakhs say ghairiraadee taur par gunaah hua ho to gunaah kee qurbaanee kay liyay vah ek yaksaala bakree pesh karay. 28imaam rabb kay saamnay us shakhs ka kaffaara day. jab kaffaara day diya gaya to usay muaafee haasil hogee. 29yahee usool pardesee par bhee laagoo hai. agar us say ghairiraadee taur par gunaah hua ho to vah muaafee haasil karnay kay liyay vahee kuchh karay jo israaeelee ko karna hota hai.
daanista gunaahon kay liyay saza-ay-maut
30lekin agar koee desee ya pardesee jaan-boojh kar gunaah karta hai to aisa shakhs rabb kee ihaanat karta hai, is liyay laazim hai ki usay us kee qaum men say mitaaya jaaay. 31us nay rabb ka kalaam haqeer jaan kar us kay ahkaam tod daalay hain, is liyay usay zaroor qaum men say mitaaya jaaay. vah apnay gunaah ka zimmaadaar hai.”
32jab israaeelee registaan men say guzar rahay thay to ek aadmee ko pakda gaya jo haftay kay din lakdiyaan jama kar raha tha. 33jinhon nay usay pakda tha vah usay moosa, haaroon aur pooree jamaaat kay paas lay aaay. 34choonki saaf maaloom naheen tha ki us kay saath kya kiya jaaay is liyay unhon nay usay giriftaar kar liya.
35phir rabb nay moosa say kaha, “is aadmee ko zaroor saza-ay-maut dee jaaay. pooree jamaaat usay khaimaagaah kay baahar lay ja kar sangasaar karay.” 36chunaanchay jamaaat nay usay khaimaagaah kay baahar lay ja kar sangasaar kiya, jis tarah rabb nay moosa ko hukm diya tha.
ahkaam kee yaad dilaanay vaalay phundane
37rabb nay moosa say kaha, 38“israaeeliyon ko bataana ki tum aur tumhaaray baad kee naslen apnay libaas kay kinaaron par phundanay lagaaen. har phundana ek qirmizee doree say libaas kay saath laga ho. 39in phundanon ko dekh kar tumhen rabb kay tamaam ahkaam yaad rahengay aur tum un par amal karogay. phir tum apnay dilon aur aankhon kee ghalat khwaahishon kay peechhay naheen padogay balki zinaakaaree say door rahogay. 40phir tum meray ahkaam ko yaad karkay un par amal karogay aur apnay khuda kay saamnay makhsoos-o-muqaddas rahogay. 41main rabb tumhaara khuda hoon jo tumhen misr say nikaal laaya taaki tumhaara khuda hoon. main rabb tumhaara khuda hoon.”