Gintee 14

log kan’aan men daakhil naheen hona chaahate

¹us raat tamaam log cheekhen maar maar kar rotay rahay. ²sab moosa aur haaroon kay khilaaf budbudaanay lagay. pooree jamaaat nay un say kaha, “kaash ham misr ya is registaan men mar gaay hotay! ³rabb hamen kyoon us mulk men lay ja raha hai? kya is liyay ki dushman hamen talvaar say qatl karay aur hamaaray baal-bachchon ko loot lay? kya behatar naheen hoga ki ham misr vaapas jaaen?” ⁴unhon nay ek doosray say kaha, “aao, ham raahanuma chun kar misr vaapas chalay jaaen.”

⁵tab moosa aur haaroon pooree jamaaat kay saamnay munh kay bal giray. ⁶lekin yashooa bin noon aur kaalib bin yafunna baaqee das jaasooson say farq thay. pareshaanee kay aalam men unhon nay apnay kapday phaad kar ⁷pooree jamaaat say kaha, “jis mulk men say ham guzray aur jis kee tafteesh ham nay kee vah nihaayat hee achchha hai. ⁸agar rabb ham say khush hai to vah zaroor hamen us mulk men lay jaaega jis men doodh aur shahed kee kasrat hai. vah hamen zaroor yah mulk dega. ⁹rabb say baghaavat mat karna. us mulk kay rahenay vaalon say na daren. ham unhen hadap kar jaaengay. un kee panaah un say jaatee rahee hai jabki rabb hamaaray saath hai. chunaanchay un say mat daren.”

¹⁰yah sun kar pooree jamaaat unhen sangasaar karnay kay liyay tayyaar huee. lekin achaanak rabb ka jalaal mulaaqaat kay khaimay par zaahir hua, aur tamaam israaeeliyon nay usay dekha. ¹¹rabb nay moosa say kaha, “yah log mujhay kab tak haqeer jaanengay? vah kab tak mujh par eemaan rakhnay say inkaar karengay agarchi main nay un kay darmiyaan itnay mojizay kiay hain? ¹²main unhen vaba say maar daaloonga aur unhen roo-ay-zameen par say mita doonga. un kee jagah main tujh say ek qaum banaaoonga jo un say badee aur taaqatvar hogee.”

¹³lekin moosa nay rabb say kaha, “phir misree yah sun lengay! kyoonki too nay apnee qudrat say in logon ko misr say nikaal kar yahaan tak pahunchaaya hai. ¹⁴misree yah baat kan’aan kay baashindon ko bataaengay. yah log pahelay say sun chukay hain ki rabb is qaum kay saath hai, ki tujhay roo-ba-roo dekha jaata hai, ki tera baadal un kay oopar thahera raheta hai, aur ki too din kay vaqt baadal kay satoon men aur raat ko aag kay satoon men in kay aagay aagay chalta hai. ¹⁵agar too ek dam is pooree qaum ko tabaah kar daalay to baaqee qaumen yah sun kar kahengee, ¹⁶‘rabb in logon ko us mulk men lay jaanay kay qaabil naheen tha jis ka vaada us nay un say qasam kha kar kiya tha. isee liyay us nay unhen registaan men halaak kar diya.’ ¹⁷ai rabb, ab apnee qudrat yoon zaahir kar jis tarah too nay farmaaya hai. kyoonki too nay kaha, ¹⁸‘rabb tahemmul aur shafqat say bharpoor hai. vah gunaah aur naafarmaanee muaaf karta hai, lekin har ek ko us kee munaasib saza bhee deta hai. jab vaalidain gunaah karen to un kee aulaad ko bhee teesree aur chauthee pusht tak saza kay nataaij bhugatnay padengay.’ ¹⁹in logon ka qusoor apnee azeem shafqat kay mutaabiq muaaf kar. unhen us tarah muaaf kar jis tarah too unhen misr say nikaltay vaqt ab tak muaaf karta raha hai.”

²⁰rabb nay javaab diya, “teray kahenay par main nay unhen muaaf kar diya hai. ²¹is kay baavujood meree hayaat kee qasam aur meray jalaal kee qasam jo pooree duniya ko maamoor karta hai, ²²in logon men say koee bhee us mulk men daakhil naheen hoga. unhon nay mera jalaal aur meray mojizay dekhay hain jo main nay misr aur registaan men kar dikhaaay hain. to bhee unhon nay das dafa mujhay aazmaaya aur meree na sunee. ²³un men say ek bhee us mulk ko naheen dekhega jis ka vaada main nay qasam kha kar un kay baapdaada say kiya tha. jis nay bhee mujhay haqeer jaana hai vah kabhee usay naheen dekhega. ²⁴sirf mera khaadim kaalib mukhtalif hai. us kee rooh farq hai. vah pooray dil say meree pairvee karta hai, is liyay main usay us mulk men lay jaaoonga jis men us nay safar kiya hai. us kee aulaad mulk meeraas men paaegee. ²⁵lekin filahaal amaaleeqee aur kan’aanee us kee vaadiyon men aabaad rahengay. chunaanchay kal mud kar vaapas chalo. registaan men baher-ay-qulzum kee taraf ravaana ho jaao.”

²⁶rabb nay moosa aur haaroon say kaha, ²⁷“yah shareer jamaaat kab tak meray khilaaf budabudaatee rahegee? un kay gilay-shikvay mujh tak pahunch gaay hain. ²⁸is liyay unhen bataao, ‘rabb farmaata hai ki meree hayaat kee qasam, main tumhaaray saath vahee kuchh karoonga jo tum nay meray saamnay kaha hai. ²⁹tum is registaan men mar kar yaheen paday rahogay, har ek jo 20 saal ya is say zaaid ka hai, jo mardumashumaaree men gina gaya aur jo meray khilaaf budabudaaya. ³⁰go main nay haath utha kar qasam khaaee thee ki main tujhay us men basaaoonga tum men say koee bhee us mulk men daakhil naheen hoga. sirf kaalib bin yafunna aur yashooa bin noon daakhil hongay. ³¹tum nay kaha tha ki dushman hamaaray bachchon ko loot lengay. lekin un hee ko main us mulk men lay jaaoonga jisay tum nay radd kiya hai. ³²lekin tum khud daakhil naheen hogay. tumhaaree laashen is registaan men padee rahengee. ³³tumhaaray bachchay 40 saal tak yahaan registaan men gallaabaan hongay. unhen tumhaaree bevafaaee kay sabab say us vaqt tak takleef uthaanee padegee jab tak tum men say aakhiree shakhs mar na gaya ho. ³⁴tum nay chaalees din kay dauraan us mulk ka jaaiza liya. ab tumhen chaalees saal tak apnay gunaahon ka nateeja bhugatna padega. tab tumhen pata chalega ki is ka kya matlab hai ki main tumhaaree mukhaalafat karta hoon. ³⁵main, rabb nay yah baat farmaaee hai. main yaqeenan yah sab kuchh us saaree shareer jamaaat kay saath karoonga jis nay mil kar meree mukhaalafat kee hai. isee registaan men vah khatm ho jaaengay, yaheen mar jaaengay’.”

^36-37 jin aadmiyon ko moosa nay mulk ka jaaiza lenay kay liyay bheja tha, rabb nay unhen fauran muhalak vaba say maar daala, kyoonki un kay ghalat afwaahen phailaanay say pooree jamaaat budbudaanay lagee thee. ³⁸sirf yashooa bin noon aur kaalib bin yafunna zinda rahay.

³⁹jab moosa nay rabb kee yah baaten israaeeliyon ko bataaeen to vah khoob maatam karnay lagay. ⁴⁰aglee subah-saveray vah uthay aur yah kahetay huay oonchay pahaadee ilaaqay kay liyay ravaana huay ki ham say ghaltee huee hai, lekin ab ham haazir hain aur us jagah kee taraf ja rahay hain jis ka zikr rabb nay kiya hai.

⁴¹lekin moosa nay kaha, “tum kyoon rabb kee khilaafvarzee kar rahay ho? tum kaamyaab naheen hogay. ⁴²vahaan na jaao, kyoonki rabb tumhaaray saath naheen hai. tum dushmanon kay haathon shikast khaaogay, ⁴³kyoonki vahaan amaaleeqee aur kan’aanee tumhaara saamna karengay. choonki tum nay apna munh rabb say pher liya hai is liyay vah tumhaaray saath naheen hoga, aur dushman tumhen talvaar say maar daalega.”

⁴⁴to bhee vah apnay gharoor men jur’at karkay oonchay pahaadee ilaaqay kee taraf badhay, haalaanki na moosa aur na ahd kay sandooq hee nay khaimaagaah ko chhoda. ⁴⁵phir us pahaadee ilaaqay men rahenay vaalay amaaleeqee aur kan’aanee un par aan paday aur unhen maartay maartay hurma tak tittar-bittar kar diya.