Gintee 13

mulk-ay-kan’aan men israaeelee jaasoos

¹phir rabb nay moosa say kaha, ²“kuchh aadmee mulk-ay-kan’aan ka jaaiza lenay kay liyay bhej day, kyoonki main usay israaeeliyon ko denay ko hoon. har qabeelay men say ek raahanuma ko chun kar bhej day.”

³moosa nay rabb kay kahenay par unhen dasht-ay-faaraan say bheja. sab israaeelee raahanuma thay. ⁴un kay naam yah hain : roobin kay qabeelay say sammooa bin zakkoor,

⁵shamaaoon kay qabeelay say saafat bin horee,

⁶yahoodaah kay qabeelay say kaalib bin yafunna,

⁷ishkaar kay qabeelay say ijaal bin yoosuf,

⁸ifraaeem kay qabeelay say hosea bin noon,

⁹binyameen kay qabeelay say faltee bin rafoo,

¹⁰zabooloon kay qabeelay say jaddeeel bin sodee,

¹¹yoosuf kay betay manassee kay qabeelay say jiddee bin soosee,

¹²daan kay qabeelay say ammeeel bin jamallee,

¹³aashar kay qabeelay say satoor bin meekaael,

¹⁴naftaalee kay qabeelay say nakhbee bin vufsee,

¹⁵jad kay qabeelay say jiyooel bin maakee.

¹⁶moosa nay in hee baarah aadmiyon ko mulk ka jaaiza lenay kay liyay bheja. us nay hosea ka naam yashooa yaanee ‘rabb najaat hai’ men badal diya.

¹⁷unhen rukhsat karnay say pahelay us nay kaha, “dasht-ay-najab say guzar kar pahaadee ilaaqay tak pahuncho. ¹⁸maaloom karo ki yah kis tarah ka mulk hai aur us kay baashinday kaisay hain. kya vah taaqatvar hain ya kamzor, taadaad men kam hain ya ziyaada? ¹⁹jis mulk men vah bastay hain kya vah achchha hai ki naheen? vah kis qism kay shaheron men rahetay hain? kya un kee chaaradeevaariyaan hain ki naheen? ²⁰mulk kee zameen zarkhez hai ya banjar? us men darakht hain ki naheen? aur jur’at karkay mulk ka kuchh phal chun kar lay aao.” us vaqt pahelay angoor pak gaay thay.

²¹chunaanchay in aadmiyon nay safar karkay dasht-ay-seen say rahob tak mulk ka jaaiza liya. rahob labo-hamaat kay qareeb hai. ²²vah dasht-ay-najab say guzar kar habroon pahunchay jahaan anaaq kay betay akheemaan, seesee aur talmee rahetay thay. (habroon ko misr kay shaher zuan say saat saal pahelay taameer kiya gaya tha). ²³jab vah vaadee-ay-iskaal tak pahunchay to unhon nay ek daalee kaat lee jis par angoor ka guchchha laga hua tha. do aadmiyon nay yah angoor, kuchh anaar aur kuchh anjeer laathee par latkaaay aur usay utha kar chal paday. ²⁴us jagah ka naam us guchchhay kay sabab say jo israaeeliyon nay vahaan say kaat liya iskaal yaanee guchchha rakha gaya.

²⁵chaalees din tak mulk ka khoj lagaatay lagaatay vah laut aaay. ²⁶vah moosa, haaroon aur israaeel kee pooree jamaaat kay paas aaay jo dasht-ay-faaraan men qaadis kee jagah par intizaar kar rahay thay. vahaan unhon nay sab kuchh bataaya jo unhon nay maaloom kiya tha aur unhen vah phal dikhaaay jo lay kar aaay thay. ²⁷unhon nay moosa ko riport dee, “ham us mulk men gaay jahaan aap nay hamen bheja tha. vaaqaee us mulk men doodh aur shahed kee kasrat hai. yahaan hamaaray paas us kay kuchh phal bhee hain. ²⁸lekin us kay baashinday taaqatvar hain. un kay shaheron kee faseelen hain, aur vah nihaayat baday hain. ham nay vahaan anaaq kee aulaad bhee dekhee. ²⁹amaaleeqee dasht-ay-najab men rahetay hain jabki hittee, yaboosee aur amoree pahaadee ilaaqay men aabaad hain. kan’aanee saahilee ilaaqay aur darya-ay-yardan kay kinaaray kinaaray bastay hain.”

³⁰kaalib nay moosa kay saamnay jamaashuda logon ko ishaara kiya ki vah khaamosh ho jaaen. phir us nay kaha, “aaen, ham mulk men daakhil ho jaaen aur us par qabza kar len, kyoonki ham yaqeenan yah karnay kay qaabil hain.” ³¹lekin doosray aadmiyon nay jo us kay saath mulk ko dekhnay gaay thay kaha, “ham un logon par hamla naheen kar saktay, kyoonki vah ham say taaqatvar hain.” ³²unhon nay israaeeliyon kay darmiyaan us mulk kay baaray men ghalat afwaahen phailaaeen jis kee tafteesh unhon nay kee thee. unhon nay kaha, “jis mulk men say ham guzray taaki us ka jaaiza len vah apnay baashindon ko hadap kar leta hai. jo bhee us men raheta hai nihaayat daraazaqad hai. ³³ham nay vahaan deo bhee dekhay. (anaaq kay betay deon kee aulaad thay). un kay saamnay ham apnay aap ko tiddee jaisa mahsoos kar rahay thay, aur ham un kee nazar men aisay thay bhee.”