Gintee 12

mariyam aur haaroon kee mukhaalafat

¹ek din mariyam aur haaroon moosa kay khilaaf baaten karnay lagay. vajah yah thee ki us nay koosh kee ek aurat say shaadee kee thee. ²unhon nay poochha, “kya rabb sirf moosa kee maarifat baat karta hai? kya us nay ham say bhee baat naheen kee?” rabb nay un kee yah baaten suneen.

³lekin moosa nihaayat haleem tha. duniya men us jaisa haleem koee naheen tha. ⁴achaanak rabb moosa, haaroon aur mariyam say mukhaatib hua, “tum teenon baahar nikal kar mulaaqaat kay khaimay kay paas aao.”

teenon vahaan pahunchay. ⁵tab rabb baadal kay satoon men utar kar mulaaqaat kay khaimay kay darvaazay par khada hua. us nay haaroon aur mariyam ko bulaaya to donon aaay. ⁶us nay kaha, “meree baat suno. jab tumhaaray darmiyaan nabee hota hai to main apnay aap ko roya men us par zaahir karta hoon ya khwaab men us say mukhaatib hota hoon. ⁷lekin meray khaadim moosa kee aur baat hai. usay main nay apnay pooray gharaanay par muqarrar kiya hai. ⁸us say main roo-ba-roo hamkalaam hota hoon. us say main muammon kay zareeay naheen balki saaf saaf baat karta hoon. vah rabb kee soorat dekhta hai. to phir tum meray khaadim kay khilaaf baaten karnay say kyoon na daray?”

⁹rabb ka ghazab un par aan pada, aur vah chala gaya. ¹⁰jab baadal ka satoon khaimay say door hua to mariyam kee jild barf kee maanind safed thee. vah kodh ka shikaar ho gaee thee. haaroon us kee taraf muda to us kee haalat dekhee ¹¹aur moosa say kaha, “meray aaqa, meharbaanee karkay hamen is gunaah kee saza na den jo hamaaree hamaaqat kay baais sarzad hua hai. ¹²mariyam ko is haalat men na chhoden. vah to aisay bachchay kee maanind hai jo murda paida hua ho, jis kay jism ka aadha hissa gal chuka ho.”

¹³tab moosa nay pukaar kar rabb say kaha, “ai allaah, meharbaanee karkay usay shifa day.” ¹⁴rabb nay javaab men moosa say kaha, “agar mariyam ka baap us kay munh par thookta to kya vah pooray haftay tak sharm mahsoos na kartee? usay ek haftay kay liyay khaimaagaah kay baahar band rakh. is kay baad usay vaapas laaya ja sakta hai.”

¹⁵chunaanchay mariyam ko ek haftay kay liyay khaimaagaah kay baahar band rakha gaya. log us vaqt tak safar kay liyay ravaana na huay jab tak usay vaapas na laaya gaya. ¹⁶jab vah vaapas aaee to israaeelee haseeraat say ravaana ho kar faaraan kay registaan men khaimaazan huay.