Gintee 11

tabaera men rabb kee aag

¹ek din log khoob shikaayat karnay lagay. jab yah shikaayaten rabb tak pahuncheen to usay ghussa aaya aur us kee aag un kay darmiyaan bhadak uthee. jaltay jaltay us nay khaimaagaah ka ek kinaara bhasm kar diya. ²log madad kay liyay moosa kay paas a kar chillaanay lagay to us nay rabb say dua kee, aur aag bujh gaee. ³us maqaam ka naam tabaera yaanee jalna pad gaya, kyoonki rabb kee aag un kay darmiyaan jal uthee thee.

moosa 70 raahanuma chunta hai

⁴israaeeliyon kay saath jo ajnabee safar kar rahay thay vah gosht khaanay kee shadeed aarzoo karnay lagay. tab israaeelee bhee ro paday aur kahenay lagay, “kaun hamen gosht khilaaega? ⁵misr men ham machhlee muft kha saktay thay. haay, vahaan kay kheeray, tarbooz, gandnay, pyaaz aur lahesan kitnay achchhay thay! ⁶lekin ab to hamaaree jaan sookh gaee hai. yahaan bas mann hee mann nazar aata raheta hai.”

⁷mann dhaniay kay daanon kee maanind tha, aur us ka rang googal kay goond kee maanind tha. ^8-9 raat kay vaqt vah khaimaagaah men os kay saath zameen par girta tha. subah kay vaqt log idhar udhar ghoomtay phirtay huay usay jama kartay thay. phir vah usay chakkee men pees kar ya ukhlee men koot kar ubaaltay ya rotee banaatay thay. us ka zaaiqa aisee rotee ka sa tha jis men zaitoon ka tel daala gaya ho.

¹⁰tamaam khaandaan apnay apnay khaimay kay darvaazay par ronay lagay to rabb ko shadeed ghussa aaya. un ka shor moosa ko bhee bahut bura laga. ¹¹us nay rabb say poochha, “too nay apnay khaadim kay saath itna bura sulook kyoon kiya? main nay kis kaam say tujhay itna naaraaz kiya ki too nay in tamaam logon ka bojh mujh par daal diya? ¹²kya main nay haamila ho kar is pooree qaum ko janm diya ki too mujh say kaheta hai, ‘isay us tarah utha kar lay chalna jis tarah aaya sheerakhwaar bachchay ko utha kar har jagah saath liyay phirtee hai. isee tarah isay us mulk men lay jaana jis ka vaada main nay qasam kha kar in kay baapdaada say kiya hai.’ ¹³ai allaah, main in tamaam logon ko kahaan say gosht muhayya karoon? vah meray saamnay rotay rahetay hain ki hamen khaanay kay liyay gosht do. ¹⁴main akela in tamaam logon kee zimmaadaaree naheen utha sakta. yah bojh meray liyay hadd say ziyaada bhaaree hai. ¹⁵agar too is par israar karay to phir behatar hai ki abhee mujhay maar day taaki main apnee tabaahee na dekhoon.”

¹⁶javaab men rabb nay moosa say kaha, “meray paas israaeel kay 70 buzurg jama kar. sirf aisay log chun jin kay baaray men tujhay maaloom hai ki vah logon kay buzurg aur nigahbaan hain. unhen mulaaqaat kay khaimay kay paas lay a. vahaan vah teray saath khaday ho jaaen, ¹⁷to main utar kar teray saath hamkalaam hoonga. us vaqt main us rooh men say kuchh loonga jo main nay tujh par naazil kiya tha aur usay un par naazil karoonga. tab vah qaum ka bojh uthaanay men teree madad karengay aur too is men akela naheen rahega. ¹⁸logon ko bataana, ‘apnay aap ko makhsoos-o-muqaddas karo, kyoonki kal tum gosht khaaogay. rabb nay tumhaaree sunee jab tum ro paday ki kaun hamen gosht khilaaega, misr men hamaaree haalat behatar thee. ab rabb tumhen gosht muhayya karega aur tum usay khaaogay. ¹⁹tum usay na sirf ek, do ya paanch din khaaogay balki 10 ya 20 din say bhee ziyaada arsay tak. ²⁰tum ek poora maheena khoob gosht khaaogay, yahaan tak ki vah tumhaaree naak say niklega aur tumhen us say ghin aaegee. aur yah is sabab say hoga ki tum nay rabb ko jo tumhaaray darmiyaan hai radd kiya aur rotay rotay us kay saamnay kaha ki ham kyoon misr say niklay’.”

²¹lekin moosa nay etiraaz kiya, “agar qaum kay paidal chalnay vaalay ginay jaaen to chhah laakh hain. too kis tarah hamen ek maah tak gosht muhayya karega? ²²kya gaay-bailon ya bhed-bakriyon ko itnee miqdaar men zabah kiya ja sakta hai ki kaafee ho? agar samundar kee tamaam machhliyaan un kay liyay pakdee jaaen to kya kaafee hongee?”

²³rabb nay kaha, “kya rabb ka ikhtiyaar kam hai? ab too khud dekh lega ki meree baaten durust hain ki naheen.”

²⁴chunaanchay moosa nay vahaan say nikal kar logon ko rabb kee yah baaten bataaeen. us nay un kay buzurgon men say 70 ko chun kar unhen mulaaqaat kay khaimay kay ird-gird khada kar diya. ²⁵tab rabb baadal men utar kar moosa say hamkalaam hua. jo rooh us nay moosa par naazil kiya tha us men say us nay kuchh lay kar un 70 buzurgon par naazil kiya. jab rooh un par aaya to vah nubuvvat karnay lagay. lekin aisa phir kabhee na hua.

²⁶ab aisa hua ki in sattar buzurgon men say do khaimaagaah men rah gaay thay. un kay naam ildaad aur medaad thay. unhen chuna to gaya tha lekin vah mulaaqaat kay khaimay kay paas naheen aaay thay. is kay baavujood rooh un par bhee naazil hua aur vah khaimaagaah men nubuvvat karnay lagay. ²⁷ek naujavaan bhaag kar moosa kay paas aaya aur kaha, “ildaad aur medaad khaimaagaah men hee nubuvvat kar rahay hain.”

²⁸yashooa bin noon jo javaanee say moosa ka madadgaar tha bol utha, “moosa meray aaqa, unhen rok den!” ²⁹lekin moosa nay javaab diya, “kya too meree khaatir ghairat kha raha hai? kaash rabb kay tamaam log nabee hotay aur vah un sab par apna rooh naazil karta!” ³⁰phir moosa aur israaeel kay buzurg khaimaagaah men vaapas aaay.

³¹tab rabb kee taraf say zordaar hava chalnay lagee jis nay samundar ko paar karnay vaalay bateron kay ghol dhakel kar khaimaagaah kay ird-gird zameen par phaink diay. un kay ghol teen fut oonchay aur khaimaagaah kay chaaron taraf 30 kilomeetar tak paday rahay. ³²us pooray din aur raat aur aglay pooray din log nikal kar bateren jama kartay rahay. har ek nay kam az kam das badee tokriyaan bhar leen. phir unhon nay un ka gosht khaimay kay ird-gird zameen par phaila diya taaki vah khushk ho jaaay.

³³lekin gosht kay pahelay tukday abhee munh men thay ki rabb ka ghazab un par aan pada, aur us nay un men sakht vaba phailnay dee. ³⁴chunaanchay maqaam ka naam qabrot-hattaava yaanee ‘laalach kee qabren’ rakha gaya, kyoonki vahaan unhon nay un logon ko dafan kiya jo gosht kay laalach men a gaay thay.

³⁵is kay baad israaeelee qabrot-hattaava say ravaana ho kar haseeraat pahunch gaay. vahaan vah khaimaazan huay.