Gintee 10
1rabb nay moosa say kaha, 2“chaandee kay do bigal ghad kar banva lay. unhen jamaaat ko jama karnay aur qabeelon ko ravaana karnay kay liyay istemaal kar. 3jab donon ko der tak bajaaya jaaay to pooree jamaaat mulaaqaat kay khaimay kay darvaazay par a kar teray saamnay jama ho jaaay. 4lekin agar ek hee bajaaya jaaay to sirf kumbon kay buzurg teray saamnay jama ho jaaen. 5agar un kee aavaaz sirf thodee der kay liyay sunaaee day to maqdis kay mashriq men maujood qabeelay ravaana ho jaaen. 6phir jab un kee aavaaz doosree baar thodee der kay liyay sunaaee day to maqdis kay junoob men maujood qabeelay ravaana ho jaaen. jab un kee aavaaz thodee der kay liyay sunaaee day to yah ravaana honay ka elaan hoga. 7is kay muqaablay men jab un kee aavaaz der tak sunaaee day to yah is baat ka elaan hoga ki jamaaat jama ho jaaay.
8bigal bajaanay kee zimmaadaaree haaroon kay beton yaanee imaamon ko dee jaaay. yah tumhaaray aur aanay vaalee naslon kay liyay daaimee usool ho. 9un kee aavaaz us vaqt bhee thodee der kay liyay suna do jab tum apnay mulk men kisee zaalim dushman say jang ladnay kay liyay niklogay. tab rabb tumhaara khuda tumhen yaad karkay dushman say bachaaega.
10isee tarah un kee aavaaz maqdis men khushee kay mauqon par sunaaee day yaanee muqarrara eedon aur naay chaand kee eedon par. in mauqon par vah bhasm honay vaalee qurbaaniyaan aur salaamatee kee qurbaaniyaan chadhaatay vaqt bajaaay jaaen. phir tumhaara khuda tumhen yaad karega. main rabb tumhaara khuda hoon.”
seena pahaad say ravaangee
11israaeeliyon ko misr say niklay ek saal say zaaid arsa ho chuka tha. doosray saal kay beesven din baadal mulaaqaat kay khaimay par say utha. 12phir israaeelee muqarrara tarteeb kay mutaabiq dasht-ay-seena say ravaana huay. chaltay chaltay baadal faaraan kay registaan men utar aaya.
13us vaqt vah pahelee dafa us tarteeb say ravaana huay jo rabb nay moosa kee maarifat muqarrar kee thee. 14pahelay yahoodaah kay qabeelay kay teen dastay apnay alam kay tahet chal paday. teenon ka kamaandar nahson bin ammeenadaab tha. 15saath chalnay vaalay qabeelay ishkaar ka kamaandar nataneeel bin zughar tha. 16zabooloon ka qabeela bhee saath chala jis ka kamaandar iliyaab bin helon tha. 17is kay baad mulaaqaat ka khaima utaara gaya. jairsonee aur miraaree usay utha kar chal diay. 18in laaviyon kay baad roobin kay qabeelay kay teen dastay apnay alam kay tahet chalnay lagay. teenon ka kamaandar ileesoor bin shadiyoor tha. 19saath chalnay vaalay qabeelay shamaaoon ka kamaandar saloomeeel bin sooreeshaddee tha. 20jad ka qabeela bhee saath chala jis ka kamaandar iliyaasaf bin daooel tha. 21phir laaviyon men say qihaatee maqdis ka saamaan utha kar ravaana huay. laazim tha ki un kay aglee manzil par pahunchnay tak mulaaqaat ka khaima laga diya gaya ho. 22is kay baad ifraaeem kay qabeelay kay teen dastay apnay alam kay tahet chal diay. un ka kamaandar ileesma bin ammeehood tha. 23ifraaeem kay saath chalnay vaalay qabeelay manassee ka kamaandar jamaleeel bin fadaahsoor tha. 24binyameen ka qabeela bhee saath chala jis ka kamaandar abidaan bin jidaaoonee tha. 25aakhir men daan kay teen dastay aqbee muhaafiz kay taur par apnay alam kay tahet ravaana huay. un ka kamaandar akheeazar bin ammeeshaddee tha. 26daan kay saath chalnay vaalay qabeelay aashar ka kamaandar fajaeeel bin akraan tha. 27naftaalee ka qabeela bhee saath chala jis ka kamaandar akheera bin enaan tha. 28israaeelee isee tarteeb say ravaana huay.
moosa hobaab ko saath chalnay par majboor karta hai
29moosa nay apnay midiyaanee susar raooel yaanee yitro kay betay hobaab say kaha, “ham us jagah kay liyay ravaana ho rahay hain jis ka vaada rabb nay ham say kiya hai. hamaaray saath chalen! ham aap par ehsaan karengay, kyoonki rabb nay israaeel par ehsaan karnay ka vaada kiya hai.” 30lekin hobaab nay javaab diya, “main saath naheen jaaoonga balki apnay mulk aur rishtedaaron kay paas vaapas chala jaaoonga.” 31moosa nay kaha, “meharbaanee karkay hamen na chhoden. kyoonki aap hee jaantay hain ki ham registaan men kahaan kahaan apnay deray daal saktay hain. aap registaan men hamen raasta dikha saktay hain. 32agar aap hamaaray saath jaaen to ham aap ko us ehsaan men shareek karengay jo rabb ham par karega.”
ahd kay sandooq ka safar
33chunaanchay unhon nay rabb kay pahaad say ravaana ho kar teen din safar kiya. is dauraan rabb ka ahd ka sandooq un kay aagay aagay chala taaki un kay liyay aaraam karnay kee jagah maaloom karay. 34jab kabhee vah ravaana hotay to rabb ka baadal din kay vaqt un kay oopar raheta. 35sandooq kay ravaana hotay vaqt moosa kaheta, “ai rabb, uth. teray dushman tittar-bittar ho jaaen. tujh say nafrat karnay vaalay teray saamnay say faraar ho jaaen.” 36aur jab bhee vah ruk jaata to moosa kaheta, “ai rabb, israaeel kay hazaaron khaandaanon kay paas vaapas a.”