Gintee 1

israaeeliyon kee pahelee mardumashumaaree

¹israaeeliyon ko misr say niklay huay ek saal say ziyaada arsa guzar gaya tha. ab tak vah dasht-ay-seena men thay. doosray saal kay doosray maheenay kay pahelay din rabb mulaaqaat kay khaimay men moosa say hamkalaam hua. us nay kaha,

²“too aur haaroon tamaam israaeeliyon kee mardumashumaaree kumbon aur aabaaee gharaanon kay mutaabiq karna. un tamaam mardon kee faherist banaanaa ³jo kam az kam bees saal kay aur jang ladnay kay qaabil hon. ⁴is men har qabeelay kay ek khaandaan ka sarparast tumhaaree madad karay. ⁵yah un kay naam hain : roobin kay qabeelay say ileesoor bin shadiyoor,

⁶shamaaoon kay qabeelay say saloomeeel bin sooreeshaddee,

⁷yahoodaah kay qabeelay say nahson bin ammeenadaab,

⁸ishkaar kay qabeelay say nataneeel bin zughar,

⁹zabooloon kay qabeelay say iliyaab bin helon,

¹⁰yoosuf kay betay ifraaeem kay qabeelay say ileesma bin ammeehood, yoosuf kay betay manassee kay qabeelay say jamaleeel bin fadaahsoor,

¹¹binyameen kay qabeelay say abidaan bin jidaaoonee,

¹²daan kay qabeelay say akheeazar bin ammeeshaddee,

¹³aashar kay qabeelay say fajaeeel bin akraan,

¹⁴jad kay qabeelay say iliyaasaf bin daooel,

¹⁵naftaalee kay qabeelay say akheera bin enaan.”

¹⁶yahee mard jamaaat say is kaam kay liyay bulaaay gaay. vah apnay qabeelon kay raahanuma aur kumbon kay sarparast thay. ¹⁷in kee madad say moosa aur haaroon ne ¹⁸usee din pooree jamaaat ko ikattha kiya. har israaeelee mard jo kam az kam 20 saal ka tha rajistar men darj kiya gaya. rajistar kee tarteeb un kay kumbon aur aabaaee gharaanon kay mutaabiq thee.

¹⁹sab kuchh vaisa hee kiya gaya jaisa rabb nay hukm diya tha. moosa nay seena kay registaan men logon kee mardumashumaaree kee. nateeja yah nikla :

^20-21 roobin kay qabeelay kay 46,500 mard,

^22-23 shamaaoon kay qabeelay kay 59,300 mard,

^24-25 jad kay qabeelay kay 45,650 mard,

^26-27 yahoodaah kay qabeelay kay 74,600 mard,

^28-29 ishkaar kay qabeelay kay 54,400 mard,

^30-31 zabooloon kay qabeelay kay 57,400 mard,

^32-33 yoosuf kay betay ifraaeem kay qabeelay kay 40,500 mard,

^34-35 yoosuf kay betay manassee kay qabeelay kay 32,200 mard,

^36-37 binyameen kay qabeelay kay 35,400 mard,

^38-39 daan kay qabeelay kay 62,700 mard,

^40-41 aashar kay qabeelay kay 41,500 mard,

^42-43 naftaalee kay qabeelay kay 53,400 mard.

⁴⁴moosa, haaroon aur qabeelon kay baarah raahanumaaon nay in tamaam aadmiyon ko gina. ^45-46 un kee pooree taadaad 6,03,550 thee.

⁴⁷lekin laaviyon kee mardumashumaaree na huee, ⁴⁸kyoonki rabb nay moosa say kaha tha, ⁴⁹“israaeeliyon kee mardumashumaaree men laaviyon ko shaamil na karna. ⁵⁰is kay bajaay unhen shareeat kee sukoonatgaah aur us ka saara saamaan sambhaalnay kee zimmaadaaree dena. vah safar kartay vaqt yah khaima aur us ka saara saamaan utha kar lay jaaen, us kee khidmat kay liyay haazir rahen aur ruktay vaqt usay apnay khaimon say gheray rakhen. ⁵¹ravaana hotay vaqt vahee khaimay ko sameten aur ruktay vaqt vahee usay lagaaen. agar koee aur us kay qareeb aaay to usay saza-ay-maut dee jaaegee. ⁵²baaqee israaeelee khaimaagaah men apnay apnay dastay kay mutaabiq aur apnay apnay alam kay ird-gird apnay khaimay lagaaen. ⁵³lekin laavee apnay khaimon say shareeat kee sukoonatgaah ko gher len taaki mera ghazab kisee ghalat shakhs kay nazdeek aanay say israaeeliyon kee jamaaat par naazil na ho jaaay. yoon laaviyon ko shareeat kee sukoonatgaah ko sambhaalna hai.”

⁵⁴israaeeliyon nay vaisa hee kiya jaisa rabb nay moosa ko hukm diya tha.