Naahoom 2

¹ai neenva, sab kuchh muntashir karnay vaala tujh par hamla karnay a raha hai, chunaanchay qilaay kee paheraadaaree kar! raastay par dhyaan day, kamarbasta ho ja, jahaan tak mumkin hai difa kee tayyaariyaan kar!

²go yaaqoob tabaah aur us kay angooron kay baagh naabood ho gaay hain, lekin ab rabb israaeel kee shaan-o-shaukat bahaal karega.

³vah dekho, neenva par hamla karnay vaalay soormaaon kee dhaalen surkh hain, faujee qirmizee rang kee vardiyaan pahenay huay hain. dushman nay apnay rathon ko tayyaar kar rakha hai, aur vah bhadaktee mash’alon kee tarah chamak rahay hain. saath saath sipaahee apnay nezay lahera rahay hain. ⁴ab rath galiyon men say andha-dhund guzar rahay hain. chaukon men vah idhar udhar bhaag rahay hain. yoon lag raha hai ki bhadaktee mash’alen ya baadal kee bijliyaan idhar udhar chamak rahee hain.

⁵hukmaraan apnay cheeda afsaron ko bula leta hai, aur vah thokar kha kha kar aagay badhtay hain. vah daud kar faseel kay paas pahunch jaatay, jaldee say hifaaztee dhaal khadee kartay hain. ⁶phir darya kay darvaazay khul jaatay aur shaahee mahel ladkhadaanay lagta hai. ⁷tab dushman malika kay kapday utaar kar usay lay jaatay hain. us kee laundiyaan chhaatee peet peet kar kabootaron kee tarah ghoon ghoon kartee hain. ⁸neenva badee der say achchhay-khaasay taalaab kee maanind tha, lekin ab log us say bhaag rahay hain. logon ko kaha jaata hai, “ruk jaao, ruko to sahee!” lekin koee naheen rukta. sab sar par paaon rakh kar shaher say bhaag rahay hain, aur koee naheen mudta.

⁹aao, neenva kee chaandee loot lo, us ka sona chheen lo! kyoonki zakheeray kee intiha naheen, us kay khazaanon kee daulat la-mahdood hai. ¹⁰lootnay vaalay kuchh naheen chhodtay. jald hee shaher khaalee aur veeraan-o-sunsaan ho jaata hai. har dil hausla haar jaata, har ghutna kaamp uthta, har kamar thartharaanay lagtee aur har chiharay ka rang maand pad jaata hai.

¹¹ab neenva betee kee kya haisiyat rahee? pahelay vah sherbabar kee maand thee, aisee jagah jahaan javaan sheron ko gosht khilaaya jaata, jahaan sher aur shernee apnay bachchon samet taheltay thay. koee unhen dara kar bhaga naheen sakta tha. ¹²us vaqt sher apnay bachchon kay liyay bahut kuchh phaad leta aur apnee sherniyon kay liyay bhee gala ghoont kar maar daalta tha. us kee maanden aur chhupnay kee jagahen phaaday huay shikaar say bharee rahetee theen.

¹³rabb-ul-afwaaj farmaata hai, “ai neenva, ab main tujh say nipat leta hoon. main teray rathon ko nazar-ay-aatish kar doonga, aur teray javaan sher talvaar kee zad men a kar mar jaaengay. main honay doonga ki aainda tujhay zameen par kuchh na milay jisay phaad kar kha sakay. aainda teray qaasidon kee aavaaz kabhee sunaaee naheen degee.”