Naahoom 1
allaah kay ghazab ka izhaar
1zail men neenva kay baaray men vah kalaam qalamband hai jo allaah nay roya men naahoom ilqooshee ko dikhaaya.
2rabb ghairatmand aur intiqaam lenay vaala khuda hai. intiqaam letay vaqt rabb apna poora ghussa utaarta hai. rabb apnay mukhaalifon say badla leta aur apnay dushmanon say naaraaz raheta hai.
3rabb tahemmul say bharpoor hai, aur us kee qudrat azeem hai. vah qusoorvaar ko kabhee bhee saza diay baghair naheen chhodta.
vah aandhee aur toofaan say ghira hua chalta hai, aur baadal us kay paaon talay kee gard hotay hain.
4vah samundar ko daantta to vah sookh jaata, us kay hukm par tamaam darya khushk ho jaatay hain. tab basan aur karmil kee shaadaab hariyaalee murjha jaatee aur lubnaan kay phool kamla jaatay hain.
5us kay saamnay pahaad laraz uthtay, pahaadiyaan pighal jaatee hain. us kay huzoor pooree zameen apnay baashindon samet laraz uthtee hai.
6kaun us kee naaraazee aur us kay shadeed qaher ka saamna kar sakta hai? us ka ghazab aag kee tarah bhadak kar zameen par naazil hota hai, us kay aanay par patthar phat kar tukday tukday ho jaatay hain.
7rabb meharbaan hai. museebat kay din vah mazboot qil’a hai, aur jo us men panaah letay hain unhen vah jaanta hai.
8lekin apnay dushmanon par vah sailaab laaega jo un kay maqaam ko gharq karega. jahaan bhee dushman bhaag jaaay vahaan us par taareekee chha jaanay dega.
9rabb kay khilaaf mansooba baandhnay ka kya faaida? vah to tumhen ek dam tabaah kar dega, doosree baar tum par aafat laanay kee zaroorat hee naheen hogee.
10kyoonki go dushman ghanee aur khaardaar jhaadiyon aur nashay men dhut sharaabee kee maanind hain, lekin vah jald hee khushk bhoosay kee tarah bhasm ho jaaengay.
11ai neenva, tujh say vah nikal aaya jis nay rabb kay khilaaf buray mansoobay baandhay, jis nay shaitaanee mashvray diay.
12lekin apnee qaum say rabb farmaata hai, “go dushman taaqatvar aur beshumaar kyoon na hon to bhee unhen mitaaya jaaega aur vah ghaaib ho jaaengay. beshak main nay tujhay past kar diya, lekin aainda aisa naheen karoonga. 13ab main vah jooa tod daaloonga jo unhon nay teree gardan par rakh diya tha, main teree zanjeeron ko phaad daaloonga.”
14lekin neenva say rabb farmaata hai, “aainda teree koee aulaad qaaim naheen rahegee jo tera naam rakhay. jitnay bhee but aur mujassmay teray mandir men paday hain un sab ko main nest-o-naabood kar doonga. main teree qabr tayyaar kar raha hoon, kyoonki too kuchh bhee naheen hai.”
neenva kee shikast
15vah dekho, pahaadon par us kay qadam chal rahay hain jo amn-o-amaan kee khushkhabaree sunaata hai. ai yahoodaah, ab apnee eeden mana, apnee mannaten pooree kar! kyoonki aainda shaitaanee aadmee tujh men naheen ghusega, vah saraasar mit gaya hai.