Meekaah 7

apnee qaum par afsos

¹haay, mujh par afsos! main us shakhs kee maanind hoon jo fasal kay jama honay par angoor kay baagh men say guzar jaata hai taaki bacha hua thoda bahut phal mil jaaay, lekin ek guchchha tak baaqee naheen. main us aadmee kee maanind hoon jo anjeer ka pahela phal milnay kee ummeed rakhta hai lekin ek bhee naheen milta. ²mulk men say diyaanatdaar mit gaay hain, ek bhee eemaandaar naheen raha. sab taak men baithay hain taaki ek doosray ko qatl karen, har ek apna jaal bichha kar apnay bhaaee ko pakadnay kee koshish karta hai. ³donon haath ghalat kaam karnay men ek jaisay maahir hain. hukmaraan aur qaazee rishvat khaatay, baday log mutalavvinamizaajee say kabhee yah, kabhee vah talab kartay hain. sab mil kar saazishen karnay men masroof rahetay hain. ⁴un men say sab say shareef shakhs khaardaar jhaadee kee maanind hai, sab say eemaandaar aadmee kaantedaar baad say achchha naheen.

lekin vah din aanay vaala hai jis ka elaan tumhaaray paheredaaron nay kiya hai. tab allaah tujh say nipat lega, sab kuchh ulat-palat ho jaaega.

⁵kisee par bhee bharosa mat rakhna, na apnay padosee par, na apnay dost par. apnee beevee say bhee baat karnay say muhtaat raho. ⁶kyoonki beta apnay baap kee haisiyat naheen maanta, betee apnee maan kay khilaaf khadee ho jaatee aur bahoo apnee saas kee mukhaalafat kartee hai. tumhaaray apnay hee ghar vaalay tumhaaray dushman hain.

⁷lekin main khud rabb kee raah dekhoonga, apnee najaat kay khuda kay intizaar men rahoonga. kyoonki mera khuda meree sunega.

rabb hamen riha karegaa

⁸ai meray dushman, mujhay dekh kar shaadiyaana mat baja! go main gir gaya hoon taaham dubaara khada ho jaaoonga, go andheray men baitha hoon taaham rabb meree raushnee hai. ⁹main nay rabb ka hee gunaah kiya hai, is liyay mujhay us ka ghazab bhugatna padega. kyoonki jab tak vah meray haq men muqaddma lad kar mera insaaf na karay us vaqt tak main us ka qaher bardaasht karoonga. tab vah mujhay taareekee say nikaal kar raushnee men laaega, aur main apnee aankhon say us kay insaaf aur vafaadaaree ka mushaahada karoonga.

¹⁰mera dushman yah dekh kar saraasar sharminda ho jaaega, haalaanki is vaqt vah kah raha hai, “rabb tera khuda kahaan hai?” meree apnee aankhen us kee sharmindagee dekhengee, kyoonki us vaqt usay galee men kachray kee tarah paaon talay raunda jaaega.

¹¹ai israaeel, vah din aanay vaala hai jab teree deevaaren naay siray say taameer ho jaaengee. us din teree sarhadden vasee ho jaaengee. ¹²log chaaron taraf say teray paas aaengay. vah asoor say, misr kay shaheron say, darya-ay-furaat kay ilaaqay say balki doordaraaz saahilee aur pahaadee ilaaqon say bhee aaengay. ¹³zameen apnay baashindon kay baais veeraan-o-sunsaan ho jaaegee, aakhirkaar un kee harkaton ka kadva phal nikal aaega.

¹⁴ai rabb, apnee laathee say apnee qaum kee gallaabaanee kar! kyoonki teree meeraas ka yah revad is vaqt jangal men tanha raheta hai, haalaanki gird-o-navaah kee zameen zarkhez hai. qadeem zamaanay kee tarah unhen basan aur jiliaad kee shaadaab charaagaahon men charnay day! ¹⁵rabb farmaata hai, “misr say nikaltay vaqt kee tarah main tujhay mojizaat dikha doonga.” ¹⁶yah dekh kar aqvaam sharminda ho jaaengee aur apnee tamaam taaqat kay baavujood kuchh naheen kar paaengee. vah ghabra kar munh par haath rakhengee, un kay kaan baheray ho jaaengay. ¹⁷saamp aur rengnay vaalay jaanvaron kee tarah vah khaak chaatengee aur thartharaatay huay apnay qilaon say nikal aaengee . vah dar kay maaray rabb hamaaray khuda kee taraf rujoo karengee, haan tujh say dahshat khaaengee.

¹⁸ai rabb, tujh jaisa khuda kahaan hai? too hee gunaahon ko muaaf kar deta, too hee apnee meeraas kay bachay huon kay jaraaim say darguzar karta hai. too hamesha tak ghussay naheen raheta balki shafqat pasand karta hai. ¹⁹too dubaara ham par rahem karega, dubaara hamaaray gunaahon ko paaon talay kuchal kar samundar kee gaheraaiyon men phaink dega. ²⁰too yaaqoob aur ibraaheem kee aulaad par apnee vafa aur shafqat dikha kar vah vaada poora karega jo too nay qasam kha kar qadeem zamaanay men hamaaray baapdaada say kiya tha.