Mattee 9
maflooj aadmee kee shifaa
1kashtee men baith kar eesa nay jheel ko paar kiya aur apnay shaher pahunch gaya. 2vahaan ek maflooj aadmee ko chaarpaaee par daal kar us kay paas laaya gaya. un ka eemaan dekh kar eesa nay kaha, “beta, hausla rakh. teray gunaah muaaf kar diay gaay hain.”
3yah sun kar shareeat kay kuchh ulma dil men kahenay lagay, “yah kufr bak raha hai!”
4eesa nay jaan liya ki yah kya soch rahay hain, is liyay us nay un say poochha, 5“tum dil men baree baaten kyoon soch rahay ho? kya maflooj say yah kahena ziyaada aasaan hai ki ‘teray gunaah muaaf kar diay gaay hain’ ya yah ki ‘uth aur chal phir?’ 6lekin main tum ko dikhaata hoon ki ibn-ay-aadam ko vaaqaee duniya men gunaah muaaf karnay ka ikhtiyaar hai.” yah kah kar vah maflooj say mukhaatib hua, “uth, apnee chaarpaaee utha kar ghar chala ja.”
7vah aadmee khada hua aur apnay ghar chala gaya. 8yah dekh kar hujoom par allaah ka khauf taaree ho gaya aur vah allaah kee tamjeed karnay lagay ki us nay insaan ko is qism ka ikhtiyaar diya hai.
mattee kee bulaahat
9aagay ja kar eesa nay ek aadmee ko dekha jo taiks lenay vaalon kee chaukee par baitha tha. us ka naam mattee tha. eesa nay us say kaha, “meray peechhay ho lay.” aur mattee uth kar us kay peechhay ho liya.
10baad men eesa mattee kay ghar men khaana kha raha tha. bahut say taiks lenay vaalay aur gunaahgaar bhee a kar eesa aur us kay shaagirdon kay saath khaanay men shareek huay. 11yah dekh kar fareesiyon nay us kay shaagirdon say poochha, “aap ka ustaad taiks lenay vaalon aur gunaahgaaron kay saath kyoon khaata hai?”
12yah sun kar eesa nay kaha, “sehatmandon ko daaktar kee zaroorat naheen hotee balki mareezon ko. 13pahelay jaao aur kalaam-ay-muqaddas kee is baat ka matlab jaan lo ki ‘main qurbaanee naheen balki rahem pasand karta hoon.’ kyoonki main raastbaazon ko naheen balki gunaahgaaron ko bulaanay aaya hoon.”
shaagird roza kyoon naheen rakhtay?
14phir yaheya kay shaagird us kay paas aaay aur poochha, “aap kay shaagird roza kyoon naheen rakhtay jabki ham aur fareesee roza rakhtay hain?”
15eesa nay javaab diya, “shaadee kay mehamaan kis tarah maatam kar saktay hain jab tak doolha un kay darmiyaan hai? lekin ek din aaega jab doolha un say lay liya jaaega. us vaqt vah zaroor roza rakhengay.
16koee bhee naay kapday ka tukda kisee puraanay libaas men naheen lagaata. agar vah aisa karay to naya tukda baad men sukad kar puraanay libaas say alag ho jaaega. yoon puraanay libaas kee phatee huee jagah pahelay kee nisbat ziyaada kharaab ho jaaegee. 17isee tarah angoor ka taaza ras puraanee aur belachak mashkon men naheen daala jaata. agar aisa kiya jaaay to puraanee mashken paida honay vaalee gais kay baais phat jaaengee. nateejay men mai aur mashken donon zaaay ho jaaengee. is liyay angoor ka taaza ras naee mashkon men daala jaata hai jo lachakdaar hotee hain. yoon ras aur mashken donon hee mahfooz rahetay hain.”
yaaeer kee betee aur beemaar aurat
18eesa abhee yah bayaan kar raha tha ki ek yahoodee raahanuma nay gir kar usay sijda kiya aur kaha, “meree betee abhee abhee maree hai. lekin a kar apna haath us par rakhen to vah dubaara zinda ho jaaegee.”
19eesa uth kar apnay shaagirdon samet us kay saath ho liya.
20chaltay chaltay ek aurat nay peechhay say a kar eesa kay libaas ka kinaara chhua. yah aurat baarah saal say khoon bahenay kee mareeza thee 21aur vah soch rahee thee, “agar main sirf us kay libaas ko hee chhoo loon to shifa pa loongee.”
22eesa nay mud kar usay dekha aur kaha, “betee, hausla rakh! teray eemaan nay tujhay bacha liya hai.” aur aurat ko usee vaqt shifa mil gaee.
23phir eesa raahanuma kay ghar men daakhil hua. baansree bajaanay vaalay aur bahut say log pahunch chukay thay aur bahut shor-sharaaba tha. yah dekh kar 24eesa nay kaha, “nikal jaao! ladkee mar naheen gaee balki so rahee hai.” log hans kar us ka mazaaq udaanay lagay. 25lekin jab sab ko nikaal diya gaya to vah andar gaya. us nay ladkee ka haath pakda to vah uth khadee huee. 26is mojizay kee khabar us pooray ilaaqay men phail gaee.
do andhon kee shifaa
27jab eesa vahaan say ravaana hua to do andhay us kay peechhay chal kar chillaanay lagay, “ibn-ay-daaood, ham par rahem karen.”
28jab eesa kisee kay ghar men daakhil hua to vah us kay paas aaay. eesa nay un say poochha, “kya tumhaara eemaan hai ki main yah kar sakta hoon?”
unhon nay javaab diya, “jee, khudaavand.”
29phir us nay un kee aankhen chhoo kar kaha, “tumhaaray saath tumhaaray eemaan kay mutaabiq ho jaaay.” 30un kee aankhen bahaal ho gaeen aur eesa nay sakhtee say unhen kaha, “khabardaar, kisee ko bhee is ka pata na chalay!”
31lekin vah nikal kar pooray ilaaqay men us kee khabar phailaanay lagay.
goongay aadmee kee shifaa
32jab vah nikal rahay thay to ek goonga aadmee eesa kay paas laaya gaya jo kisee badruh kay qabzay men tha. 33jab badruh ko nikaala gaya to goonga bolnay laga. hujoom hairaan rah gaya. unhon nay kaha, “aisa kaam israaeel men kabhee naheen dekha gaya.”
34lekin fareesiyon nay kaha, “vah badroohon kay sardaar hee kee madad say badroohon ko nikaalta hai.”
eesa ko logon par taras aata hai
35aur eesa safar kartay kartay tamaam shaheron aur gaaon men say guzra. jahaan bhee vah pahuncha vahaan us nay un kay ibaadatkhaanon men taaleem dee, baadshaahee kee khushkhabaree sunaaee aur har qism kay marz aur alaalat say shifa dee. 36hujoom ko dekh kar usay un par bada taras aaya, kyoonki vah pisay huay aur bebas thay, aisee bhedon kee tarah jin ka charvaaha na ho. 37us nay apnay shaagirdon say kaha, “fasal bahut hai, lekin mazdoor kam. 38is liyay fasal kay maalik say guzaarish karo ki vah apnee fasal kaatnay kay liyay mazeed mazdoor bhej day.”