Mattee 8
kodh say shifaa
1eesa pahaad say utra to badee bheed us kay peechhay chalnay lagee. 2phir ek aadmee us kay paas aaya jo kodh ka mareez tha. munh kay bal gir kar us nay kaha, “khudaavand, agar aap chaahen to mujhay paak-saaf kar saktay hain.”
3eesa nay apna haath badha kar usay chhua aur kaha, “main chaahata hoon, paak-saaf ho ja.” is par vah fauran us beemaaree say paak-saaf ho gaya. 4eesa nay us say kaha, “khabardaar! yah baat kisee ko na bataana balki bait-ul-muqaddas men imaam kay paas ja taaki vah tera muaaina karay. apnay saath vah qurbaanee lay ja jis ka taqaaza moosa kee shareeat un say kartee hai jinhen kodh say shifa milee hai. yoon alaaniya tasdeeq ho jaaegee ki too vaaqaee paak-saaf ho gaya hai.”
romee afsar kay ghulaam kee shifaa
5jab eesa kafarnahoom men daakhil hua to sau faujiyon par muqarrar ek afsar us kay paas a kar us kee minnat karnay laga, 6“khudaavand, mera ghulaam maflooj haalat men ghar men pada hai, aur usay shadeed dard ho raha hai.”
7eesa nay us say kaha, “main a kar usay shifa doonga.”
8afsar nay javaab diya, “naheen khudaavand, main is laaiq naheen ki aap meray ghar jaaen. bas yaheen say hukm karen to mera ghulaam shifa pa jaaega. 9kyoonki mujhay khud aala afsaron kay hukm par chalna padta hai aur meray ma-tahet bhee faujee hain. ek ko kaheta hoon, ‘ja!’ to vah jaata hai aur doosray ko ‘a!’ to vah aata hai. isee tarah main apnay naukar ko hukm deta hoon, ‘yah kar’ to vah karta hai.”
10yah sun kar eesa nihaayat hairaan hua. us nay mud kar apnay peechhay aanay vaalon say kaha, “main tum ko sachch bataata hoon, main nay israaeel men bhee is qism ka eemaan naheen paaya. 11main tumhen bataata hoon, bahut say log mashriq aur maghrib say a kar ibraaheem, ishaaq aur yaaqoob kay saath aasmaan kee baadshaahee kee ziyaafat men shareek hongay. 12lekin baadshaahee kay asal vaarison ko nikaal kar andheray men daal diya jaaega, us jagah jahaan log rotay aur daant peestay rahengay.” 13phir eesa afsar say mukhaatib hua, “ja, teray saath vaisa hee ho jaisa tera eemaan hai.”
aur afsar kay ghulaam ko usee ghadee shifa mil gaee.
bahut say mareezon kee shifaa
14eesa patras kay ghar men aaya. vahaan us nay patras kee saas ko bistar par paday dekha. usay bukhaar tha. 15us nay us ka haath chhoo liya to bukhaar utar gaya aur vah uth kar us kee khidmat karnay lagee.
16shaam huee to badroohon kee girift men paday bahut say logon ko eesa kay paas laaya gaya. us nay badroohon ko hukm day kar nikaal diya aur tamaam mareezon ko shifa dee. 17yoon yasaayaah nabee kee yah peshgoee pooree huee ki “us nay hamaaree kamzoriyaan lay leen aur hamaaree beemaariyaan utha leen.”
pairvee kee sanjeedgee
18jab eesa nay apnay gird bada hujoom dekha to us nay shaagirdon ko jheel paar karnay ka hukm diya. 19ravaana honay say pahelay shareeat ka ek aalim us kay paas a kar kahenay laga, “ustaad, jahaan bhee aap jaaengay main aap kay peechhay chalta rahoonga.”
20eesa nay javaab diya, “lomdiyaan apnay bhaton men aur parinday apnay ghonslon men aaraam kar saktay hain, lekin ibn-ay-aadam kay paas sar rakh kar aaraam karnay kee koee jagah naheen.”
21kisee aur shaagird nay us say kaha, “khudaavand, mujhay pahelay ja kar apnay baap ko dafan karnay kee ijaazat den.”
22lekin eesa nay usay bataaya, “meray peechhay ho lay aur murdon ko apnay murday dafan karnay day.”
eesa aandhee ko thama deta hai
23phir vah kashtee par savaar hua aur us kay peechhay us kay shaagird bhee. 24achaanak jheel par sakht aandhee chalnay lagee aur kashtee laheron men doobnay lagee. lekin eesa so raha tha. 25shaagird us kay paas gaay aur usay jaga kar kahenay lagay, “khudaavand, hamen bacha, ham tabaah ho rahay hain!”
26us nay javaab diya, “ai kamaetiqaado! ghabraatay kyoon ho?” khaday ho kar us nay aandhee aur maujon ko daanta to laheren bilkul saakit ho gaeen. 27shaagird hairaan ho kar kahenay lagay, “yah kis qism ka shakhs hai? hava aur jheel bhee us ka hukm maantee hain.”
do badruh-girifta aadmiyon kee shifaa
28vah jheel kay paar gadreeniyon kay ilaaqay men pahunchay to badruh-girifta do aadmee qabron men say nikal kar eesa ko milay. vah itnay khatarnaak thay ki vahaan say koee guzar naheen sakta tha. 29cheekhen maar maar kar unhon nay kaha, “allaah kay farzand, hamaara aap kay saath kya vaasta? kya aap hamen muqarrara vaqt say pahelay azaab men daalnay aaay hain?”
30kuchh faasilay par sooaron ka bada ghol char raha tha. 31badroohon nay eesa say iltija kee, “agar aap hamen nikaaltay hain to sooaron kay us ghol men bhej den.”
32eesa nay unhen hukm diya, “jaao.” badruhen nikal kar sooaron men ja ghuseen. is par pooray ka poora ghol bhaag bhaag kar pahaadee kee dhalaan par say utra aur jheel men jhapat kar doob mara. 33yah dekh kar sooaron kay gallaabaan bhaag gaay. shaher men ja kar unhon nay logon ko sab kuchh sunaaya aur vah bhee jo badruh-girifta aadmiyon kay saath hua tha. 34phir poora shaher nikal kar eesa ko milnay aaya. usay dekh kar unhon nay us kee minnat kee ki hamaaray ilaaqay say chalay jaaen.