Mattee 7
auron ka munsif bannaa
1doosron kee adaalat mat karna, varna tumhaaree adaalat bhee kee jaaegee. 2kyoonki jitnee sakhtee say tum doosron ka faisla kartay ho utnee sakhtee say tumhaara bhee faisla kiya jaaega. aur jis paimaanay say tum naaptay ho usee paimaanay say tum bhee naapay jaaogay. 3too kyoon ghaur say apnay bhaaee kee aankh men paday tinkay par nazar karta hai jabki tujhay vah shaheteer nazar naheen aata jo teree apnee aankh men hai? 4too kyoonkar apnay bhaaee say kah sakta hai, ‘thahero, mujhay tumhaaree aankh men pada tinka nikaalnay do,’ jabki teree apnee aankh men shaheteer hai. 5riyaakaar! pahelay apnee aankh kay shaheteer ko nikaal. tab hee tujhay bhaaee ka tinka saaf nazar aaega aur too usay achchhee tarah say dekh kar nikaal sakega.
6kutton ko muqaddas khuraak mat khilaana aur sooaron kay aagay apnay motee na phainkna. aisa na ho ki vah unhen paaon talay raunden aur mud kar tum ko phaad daalen.
maangtay rahenaa
7maangtay raho to tum ko diya jaaega. dhoondtay raho to tum ko mil jaaega. khatkhataatay raho to tumhaaray liyay darvaaza khol diya jaaega. 8kyoonki jo bhee maangta hai vah paata hai, jo dhoondta hai usay milta hai, aur jo khatkhataata hai us kay liyay darvaaza khol diya jaata hai. 9tum men say kaun apnay betay ko patthar dega agar vah rotee maangay? 10ya kaun usay saamp dega agar vah machhlee maangay? koee naheen! 11jab tum buray honay kay baavujood itnay samajhdaar ho ki apnay bachchon ko achchhee cheezen day saktay ho to phir kitnee ziyaada yaqeenee baat hai ki tumhaara aasmaanee baap maangnay vaalon ko achchhee cheezen dega.
12har baat men doosron kay saath vahee sulook karo jo tum chaahatay ho ki vah tumhaaray saath karen. kyoonki yahee shareeat aur nabiyon kee taaleemaat ka lubb-ay-lubaab hai.
tang darvaazaa
13tang darvaazay say daakhil ho, kyoonki halaakat kee taraf lay jaanay vaala raasta kushaada aur us ka darvaaza chauda hai. bahut say log us men daakhil ho jaatay hain. 14lekin zindagee kee taraf lay jaanay vaala raasta tang hai aur us ka darvaaza chhota. kam hee log usay paatay hain.
har darakht ka apna phal hota hai
15jhootay nabiyon say khabardaar raho! go vah bhedon ka bhes badal kar tumhaaray paas aatay hain, lekin andar say vah ghaaratagar bhediay hotay hain. 16un ka phal dekh kar tum unhen pahechaan logay. kya khaardaar jhaadiyon say angoor today jaatay hain ya oontakataaron say anjeer? hargiz naheen. 17isee tarah achchha darakht achchha phal laata hai aur kharaab darakht kharaab phal. 18na achchha darakht kharaab phal la sakta hai, na kharaab darakht achchha phal. 19jo bhee darakht achchha phal naheen laata usay kaat kar aag men jhonka jaata hai. 20yoon tum un ka phal dekh kar unhen pahechaan logay.
sirf asal pairokaar daakhil honge
21har ek jo mujhay ‘khudaavand, khudaavand’ kah kar pukaarta hai aasmaan kee baadshaahee men daakhil na hoga. sirf vahee daakhil hoga jo meray aasmaanee baap kee marzee par amal karta hai. 22adaalat kay din bahut say log mujh say kahengay, ‘ai khudaavand, khudaavand! kya ham nay teray hee naam men nubuvvat naheen kee, teray hee naam say badruhen naheen nikaaleen, teray hee naam say mojizay naheen kiay?’ 23us vaqt main un say saaf saaf kah doonga, ‘meree kabhee tum say jaan pahechaan na thee. ai badkaaro! meray saamnay say chalay jaao.’
do qism kay makaan
24lihaaza jo bhee meree yah baaten sun kar un par amal karta hai vah us samajhdaar aadmee kee maanind hai jis nay apnay makaan kee bunyaad chataan par rakhee. 25baarish honay lagee, sailaab aaya aur aandhee makaan ko jhanjhodnay lagee. lekin vah na gira, kyoonki us kee bunyaad chataan par rakhee gaee thee.
26lekin jo bhee meree yah baaten sun kar un par amal naheen karta vah us ahemaq kee maanind hai jis nay apna makaan saheeh bunyaad daalay baghair ret par taameer kiya. 27jab baarish honay lagee, sailaab aaya aur aandhee makaan ko jhanjhodnay lagee to yah makaan dhadaam say gir gaya.”
eesa ka ikhtiyaar
28jab eesa nay yah baaten khatm kar leen to log us kee taaleem sun kar hakka-bakka rah gaay, 29kyoonki vah un kay ulma kee tarah naheen balki ikhtiyaar kay saath sikhaata tha.