Mattee 28

eesa jee uthta hai

¹itwaar ko subah-saveray hee mariyam magdaleenee aur doosree mariyam qabr ko dekhnay kay liyay nikleen. sooraj tuloo ho raha tha. ²achaanak ek shadeed zalzla aaya, kyoonki rabb ka ek farishta aasmaan say utar aaya aur qabr kay paas ja kar us par paday patthar ko ek taraf ludhka diya. phir vah us par baith gaya. ³us kee shakl-o-soorat bijlee kee tarah chamak rahee thee aur us ka libaas barf kee maanind safed tha. ⁴paheredaar itnay dar gaay ki vah laraztay laraztay murda say ho gaay.

⁵farishtay nay khavaateen say kaha, “mat daro. mujhay maaloom hai ki tum eesa ko dhoond rahee ho jo masloob hua tha. ⁶vah yahaan naheen hai. vah jee utha hai, jis tarah us nay farmaaya tha. aao, us jagah ko khud dekh lo jahaan vah pada tha. ⁷aur ab jaldee say ja kar us kay shaagirdon ko bata do ki vah jee utha hai aur tumhaaray aagay aagay galeel pahunch jaaega. vaheen tum usay dekhogay. ab main nay tum ko is say aagaah kiya hai.”

⁸khavaateen jaldee say qabr say chalee gaeen. vah sahemee huee lekin badee khush theen aur daudee daudee us kay shaagirdon ko yah khabar sunaanay gaeen.

⁹achaanak eesa un say mila. us nay kaha, “salaam.” vah us kay paas aaeen, us kay paaon pakday aur usay sijda kiya. ¹⁰eesa nay un say kaha, “mat daro. jaao, meray bhaaiyon ko bata do ki vah galeel ko chalay jaaen. vahaan vah mujhay dekhengay.”

paheredaaron kee riport

¹¹khavaateen abhee raastay men theen ki paheredaaron men say kuchh shaher men gaay aur raahanuma imaamon ko sab kuchh bata diya. ¹²raahanuma imaamon nay qaum kay buzurgon kay saath ek meeting mun’aqid kee aur paheredaaron ko rishvat kee badee raqam denay ka faisla kiya. ¹³unhon nay unhen bataaya, “tum ko kahena hai, ‘jab ham raat kay vaqt so rahay thay to us kay shaagird aaay aur usay chura lay gaay.’ ¹⁴agar yah khabar gavarnar tak pahunchay to ham usay samjha lengay. tum ko fikr karnay kee zaroorat naheen.”

¹⁵chunaanchay paheredaaron nay rishvat lay kar vah kuchh kiya jo unhen sikhaaya gaya tha. un kee yah kahaanee yahoodiyon kay darmiyaan bahut phailaaee gaee aur aaj tak un men raaij hai.

eesa apnay shaagirdon par zaahir hota hai

¹⁶phir gyaarah shaagird galeel kay us pahaad kay paas pahunchay jahaan eesa nay unhen jaanay ko kaha tha. ¹⁷vahaan usay dekh kar unhon nay usay sijda kiya. lekin kuchh shak men pad gaay. ¹⁸phir eesa nay un kay paas a kar kaha, “aasmaan aur zameen ka kul ikhtiyaar mujhay day diya gaya hai. ¹⁹is liyay jaao, tamaam qaumon ko shaagird bana kar unhen baap, farzand aur rooh-ul-quds kay naam say baptisma do. ²⁰aur unhen yah sikhaao ki vah un tamaam ahkaam kay mutaabiq zindagee guzaaren jo main nay tumhen diay hain. aur dekho, main duniya kay ikhtitaam tak hamesha tumhaaray saath hoon.”