Matthew 24

Mattee 24

bait-ul-muqaddas par aanay vaalee tabaahee

¹eesa bait-ul-muqaddas ko chhod kar nikal raha tha ki us kay shaagird us kay paas aaay aur bait-ul-muqaddas kee mukhtalif imaaraton kee taraf us kee tavajjuh dilaanay lagay. ²lekin eesa nay javaab men kaha, “kya tum ko yah sab kuchh nazar aata hai? main tum ko sachch bataata hoon ki yahaan patthar par patthar naheen rahega balki sab kuchh dha diya jaaega.”

museebaton aur eezaarasaaniyon kee peshgoee

³baad men eesa zaitoon kay pahaad par baith gaya. shaagird akelay us kay paas aaay. unhon nay kaha, “hamen zara bataaen, yah kab hoga? kya kya nazar aaega jis say pata chalega ki aap aanay vaalay hain aur yah duniya khatm honay vaalee hai?”

⁴eesa nay javaab diya, “khabardaar raho ki koee tumhen gumraah na kar day. ⁵kyoonki bahut say log mera naam lay kar aaengay aur kahengay, ‘main hee maseeh hoon.’ yoon vah bahuton ko gumraah kar dengay. ⁶jangon kee khabren aur afwaahen tum tak pahunchengee, lekin muhtaat raho taaki tum ghabra na jaao. kyoonki laazim hai ki yah sab kuchh pesh aaay. to bhee abhee aakhirat naheen hogee. ⁷ek qaum doosree kay khilaaf uth khadee hogee, aur ek baadshaahee doosree kay khilaaf. kaal padengay aur jagah jagah zalzlay aaengay. ⁸lekin yah sirf dard-ay-zah kee ibtida hee hogee.

⁹phir vah tum ko badee museebat men daal dengay aur tum ko qatl karengay. tamaam qaumen tum say is liyay nafrat karengee ki tum meray pairokaar ho. ¹⁰us vaqt bahut say log eemaan say bargashta ho kar ek doosray ko dushman kay havaalay karengay aur ek doosray say nafrat karengay. ¹¹bahut say jhootay nabee khaday ho kar bahut say logon ko gumraah kar dengay. ¹²bedeenee kay badh jaanay kee vajah say beshatar logon kee muhabbat thandee pad jaaegee. ¹³lekin jo aakhir tak qaaim rahega usay najaat milegee. ¹⁴aur baadshaahee kee is khushkhabaree kay paighaam ka elaan pooree duniya men kiya jaaega taaki tamaam qaumon kay saamnay us kee gavaahee dee jaaay. phir hee aakhirat aaegee.

bait-ul-muqaddas kee behuramtee

¹⁵ek din aaega jab tum muqaddas maqaam men vah kuchh khada dekhogay jis ka zikr daanyaal nabee nay kiya aur jo behuramtee aur tabaahee ka baais hai.” (qaaree is par dhyaan day!) ¹⁶“us vaqt yahoodiya kay rahenay vaalay bhaag kar pahaadee ilaaqay men panaah len. ¹⁷jo apnay ghar kee chhat par ho vah ghar men say kuchh saath lay jaanay kay liyay na utray. ¹⁸jo khet men ho vah apnee chaadar saath lay jaanay kay liyay vaapas na jaaay. ¹⁹un khavaateen par afsos jo un dinon men haamila hon ya apnay bachchon ko doodh pilaatee hon. ²⁰dua karo ki tum ko sardiyon kay mausam men ya sabat kay din hijrat na karnee paday. ²¹kyoonki us vaqt aisee shadeed museebat hogee ki duniya kee takhleeq say aaj tak dekhnay men na aaee hogee. is qism kee museebat baad men bhee kabhee naheen aaegee. ²²aur agar is museebat ka dauraaniya mukhtasar na kiya jaata to koee na bachta. lekin allaah kay chunay huon kee khaatir is ka dauraaniya mukhtasar kar diya jaaega.

²³us vaqt agar koee tum ko bataaay, ‘dekho, maseeh yahaan hai’ ya ‘vah vahaan hai’ to us kee baat na maanna. ²⁴kyoonki jhootay maseeh aur jhootay nabee uth khaday hongay jo baday ajeeb-o-ghareeb nishaan aur mojizay dikhaaengay taaki allaah kay chunay huay logon ko bhee ghalat raastay par daal den - agar yah mumkin hota. ²⁵dekho, main nay tumhen pahelay say is say aagaah kar diya hai.

²⁶chunaanchay agar koee tum ko bataaay, ‘dekho, vah registaan men hai’ to vahaan jaanay kay liyay na nikalna. aur agar koee kahay, ‘dekho, vah androonee kamron men hai’ to us ka yaqeen na karna. ²⁷kyoonki jis tarah baadal kee bijlee mashriq men kadak kar maghrib tak chamaktee hai usee tarah ibn-ay-aadam kee aamad bhee hogee.

²⁸jahaan bhee laash padee ho vahaan giddh jama ho jaaengay.

ibn-ay-aadam kee aamad

²⁹museebat kay un dinon kay ain baad sooraj taareek ho jaaega aur chaand kee raushnee khatm ho jaaegee. sitaaray aasmaan par say gir padengay aur aasmaan kee quvvaten hilaaee jaaengee. ³⁰us vaqt ibn-ay-aadam ka nishaan aasmaan par nazar aaega. tab duniya kee tamaam qaumen maatam karengee. vah ibn-ay-aadam ko badee qudrat aur jalaal kay saath aasmaan kay baadlon par aatay huay dekhengee. ³¹aur vah apnay farishton ko bigal kee oonchee aavaaz kay saath bhej dega taaki us kay chunay huon ko chaaron taraf say jama karen, aasmaan kay ek siray say doosray siray tak ikattha karen.

anjeer kay darakht say sabaq

³²anjeer kay darakht say sabaq seekho. joon hee us kee shaakhen narm aur lachakdaar ho jaatee hain aur un say komplen phoot nikaltee hain to tum ko maaloom ho jaata hai ki garmiyon ka mausam qareeb a gaya hai. ³³isee tarah jab tum yah vaaqiaat dekhogay to jaan logay ki ibn-ay-aadam kee aamad qareeb balki darvaazay par hai. ³⁴main tum ko sachch bataata hoon ki is nasal kay khatm honay say pahelay pahelay yah sab kuchh vaaqay hoga. ³⁵aasmaan-o-zameen to jaatay rahengay, lekin meree baaten hamesha tak qaaim rahengee.

kisee ko bhee us kee aamad ka vaqt maaloom naheen

³⁶lekin kisee ko bhee ilm naheen ki yah kis din ya kaun see ghadee roonuma hoga. aasmaan kay farishton aur farzand ko bhee ilm naheen balki sirf baap ko. ³⁷jab ibn-ay-aadam aaega to haalaat nooh kay dinon jaisay hongay. ³⁸kyoonki sailaab say pahelay kay dinon men log us vaqt tak khaatay-peetay aur shaadiyaan kartay karaatay rahay jab tak nooh kashtee men daakhil na ho gaya. ³⁹vah us vaqt tak aanay vaalee museebat kay baaray men laailm rahay jab tak sailaab a kar un sab ko baha na lay gaya. jab ibn-ay-aadam aaega to isee qism kay haalaat hongay. ⁴⁰us vaqt do afraad khet men hongay, ek ko saath lay liya jaaega jabki doosray ko peechhay chhod diya jaaega. ⁴¹do khavaateen chakkee par gandum pees rahee hongee, ek ko saath lay liya jaaega jabki doosree ko peechhay chhod diya jaaega.

⁴²is liyay chaukas raho, kyoonki tum naheen jaantay ki tumhaara khudaavand kis din a jaaega. ⁴³yaqeen jaano, agar kisee ghar kay maalik ko maaloom hota ki chor kab aaega to vah zaroor chaukas raheta aur usay apnay ghar men naqab lagaanay na deta. ⁴⁴tum bhee tayyaar raho, kyoonki ibn-ay-aadam aisay vaqt aaega jab tum us kee tavaqqo naheen karogay.

vafaadaar naukar

⁴⁵chunaanchay kaun sa naukar vafaadaar aur samajhdaar hai? farz karo ki ghar kay maalik nay kisee naukar ko baaqee naukron par muqarrar kiya ho. us kee ek zimmaadaaree yah bhee hai ki unhen vaqt par khaana khilaaay. ⁴⁶vah naukar mubaarak hoga jo maalik kee vaapsee par yah sab kuchh kar raha hoga. ⁴⁷main tum ko sachch bataata hoon ki yah dekh kar maalik usay apnee pooree jaaydaad par muqarrar karega. ⁴⁸lekin farz karo ki naukar apnay dil men sochay, ‘maalik kee vaapsee men abhee der hai.’ ⁴⁹vah apnay saathee naukron ko peetnay aur sharaabiyon kay saath khaanay-peenay lagay. ⁵⁰agar vah aisa karay to maalik aisay din aur vaqt aaega jis kee tavaqqo naukar ko naheen hogee. ⁵¹in haalaat ko dekh kar vah naukar ko tukday tukday kar daalega aur usay riyaakaaron men shaamil karega, vahaan jahaan log rotay aur daant peestay rahengay.