Mattee 22
badee ziyaafat kee tamseel
1eesa nay ek baar phir tamseelon men un say baat kee. 2“aasmaan kee baadshaahee ek baadshaah say mutaabiqat rakhtee hai jis nay apnay betay kee shaadee kee ziyaafat kee tayyaariyaan karvaaeen. 3jab ziyaafat ka vaqt a gaya to us nay apnay naukron ko mehamaanon kay paas yah ittila denay kay liyay bheja ki vah aaen, lekin vah aana naheen chaahatay thay. 4phir us nay mazeed kuchh naukron ko bhej kar kaha, ‘mehamaanon ko bataana ki main nay apna khaana tayyaar kar rakha hai. bailon aur motay-taazay bachhdon ko zabah kiya gaya hai, 5sab kuchh tayyaar hai. aaen, ziyaafat men shareek ho jaaen.’ lekin mehamaanon nay parva na kee balki apnay mukhtalif kaamon men lag gaay. ek apnay khet ko chala gaya, doosra apnay kaarobaar men masroof ho gaya. 6baaqiyon nay baadshaah kay naukron ko pakad liya aur un say bura sulook karkay unhen qatl kiya. 7baadshaah baday taish men a gaya. us nay apnee fauj ko bhej kar qaatilon ko tabaah kar diya aur un ka shaher jala diya. 8phir us nay apnay naukron say kaha, ‘shaadee kee ziyaafat to tayyaar hai, lekin jin mehamaanon ko main nay daavat dee thee vah aanay kay laaiq naheen thay. 9ab vahaan jaao jahaan sadken shaher say nikaltee hain aur jis say bhee mulaaqaat ho jaaay usay ziyaafat kay liyay daavat day dena.’ 10chunaanchay naukar sadkon par niklay aur jis say bhee mulaaqaat huee usay laaay, khwaah vah achchha tha ya bura. yoon shaadee haal mehamaanon say bhar gaya.
11lekin jab baadshaah mehamaanon say milnay kay liyay andar aaya to usay ek aadmee nazar aaya jis nay shaadee kay liyay munaasib kapday naheen pahenay thay. 12baadshaah nay poochha, ‘dost, tum shaadee ka libaas pahenay baghair andar kis tarah aaay?’ vah aadmee koee javaab na day saka. 13phir baadshaah nay apnay darbaariyon ko hukm diya, ‘is kay haath aur paaon baandh kar isay baahar taareekee men phaink do, vahaan jahaan log rotay aur daant peestay rahengay.’
14kyoonki bulaaay huay to bahut hain, lekin chunay huay kam.”
kya taiks dena jaaiz hai?
15phir fareesiyon nay ja kar aapas men mashvra kiya ki ham eesa ko kis tarah aisee baat karnay kay liyay ubhaaren jis say usay pakda ja sakay. 16is maqsad kay tahet unhon nay apnay shaagirdon ko herodes kay pairokaaron samet eesa kay paas bheja. unhon nay kaha, “ustaad, ham jaantay hain ki aap sachchay hain aur diyaanatdaaree say allaah kee raah kee taaleem detay hain. aap kisee kee parva naheen kartay kyoonki aap ghairjaanibdaar hain. 17ab hamen apnee raay bataaen. kya romee shahenshaah ko taiks dena jaaiz hai ya naajaaiz?”
18lekin eesa nay un kee buree neeyat pahechaan lee. us nay kaha, “riyaakaaro, tum mujhay kyoon phansaana chaahatay ho? 19mujhay vah sikka dikhaao jo taiks ada karnay kay liyay istemaal hota hai.”
vah us kay paas chaandee ka ek romee sikka lay aae 20to us nay poochha, “kis kee soorat aur naam is par kanda hai?”
21unhon nay javaab diya, “shahenshaah ka.”
us nay kaha, “to jo shahenshaah ka hai shahenshaah ko do aur jo allaah ka hai allaah ko.”
22us ka yah javaab sun kar vah hakka-bakka rah gaay aur usay chhod kar chalay gaay.
kya ham jee uthengay?
23us din sadooqee eesa kay paas aaay. sadooqee naheen maantay ki roz-ay-qiyaamat murday jee uthengay. unhon nay eesa say ek savaal kiya. 24“ustaad, moosa nay hamen hukm diya ki agar koee shaadeeshuda aadmee beaulaad mar jaaay aur us ka bhaaee ho to bhaaee ka farz hai ki vah beva say shaadee karkay apnay bhaaee kay liyay aulaad paida karay. 25ab farz karen ki hamaaray darmiyaan saat bhaaee thay. pahelay nay shaadee kee, lekin beaulaad faut hua. is liyay doosray bhaaee nay beva say shaadee kee. 26lekin vah bhee beaulaad mar gaya. phir teesray bhaaee nay us say shaadee kee. yah silsila saatven bhaaee tak jaaree raha. yakay baad deegray har bhaaee beva say shaadee karnay kay baad mar gaya. 27aakhir men beva bhee faut ho gaee. 28ab bataaen ki qiyaamat kay din vah kis kee beevee hogee? kyoonki saat kay saat bhaaiyon nay us say shaadee kee thee.”
29eesa nay javaab diya, “tum is liyay ghaltee par ho ki na tum kalaam-ay-muqaddas say vaaqif ho, na allaah kee qudrat say. 30kyoonki qiyaamat kay din log na shaadee karengay na un kee shaadee karaaee jaaegee balki vah aasmaan par farishton kee maanind hongay. 31rahee yah baat ki murday jee uthengay, kya tum nay vah baat naheen padhee jo allaah nay tum say kahee? 32us nay farmaaya, ‘main ibraaheem ka khuda, ishaaq ka khuda aur yaaqoob ka khuda hoon,’ haalaanki us vaqt teenon kaafee arsay say mar chukay thay. is ka matlab hai ki yah haqeeqat men zinda hain. kyoonki allaah murdon ka naheen balki zindon ka khuda hai.”
33yah sun kar hujoom us kee taaleem kay baais hairaan rah gaya.
avval hukm
34jab fareesiyon nay suna ki eesa nay sadooqiyon ko laajvaab kar diya hai to vah jama huay. 35un men say ek nay jo shareeat ka aalim tha usay phansaanay kay liyay savaal kiya, 36“ustaad, shareeat men sab say bada hukm kaun sa hai?”
37eesa nay javaab diya, “‘rabb apnay khuda say apnay pooray dil, apnee pooree jaan aur apnay pooray zahen say piyaar karna.’ 38yah avval aur sab say bada hukm hai. 39aur doosra hukm is kay baraabar yah hai, ‘apnay padosee say vaisee muhabbat rakhna jaisee too apnay aap say rakhta hai.’ 40tamaam shareeat aur nabiyon kee taaleemaat in do ahkaam par mabnee hain.”
maseeh kay baaray men savaal
41jab fareesee ikatthay thay to eesa nay un say poochha, 42“tumhaara maseeh kay baaray men kya khayaal hai? vah kis ka farzand hai?”
unhon nay javaab diya, “vah daaood ka farzand hai.”
43eesa nay kaha, “to phir daaood rooh-ul-quds kee maarifat usay kis tarah ‘rab’ kaheta hai? kyoonki vah farmaata hai,
44‘rabb nay meray rabb say kaha,
meray dahenay haath baith,
jab tak main teray dushmanon ko
teray paaon kay neechay na kar doon.’
45daaood to khud maseeh ko rabb kaheta hai. to phir vah kis tarah us ka farzand ho sakta hai?”
46koee bhee javaab na day saka, aur us din say kisee nay bhee us say mazeed kuchh poochhnay kee jur’at na kee.