Mattee 21
yarooshalam men purjosh istiqbaal
1vah yarooshalam kay qareeb bait-fagay pahunchay. yah gaaon zaitoon kay pahaad par vaaqay tha. eesa nay do shaagirdon ko bhejaa 2aur kaha, “saamnay vaalay gaaon men jaao. vahaan tum ko fauran ek gadhee nazar aaegee jo apnay bachchay kay saath bandhee huee hogee. unhen khol kar yahaan lay aao. 3agar koee yah dekh kar tum say kuchh kahay to usay bata dena, ‘khudaavand ko in kee zaroorat hai.’ yah sun kar vah fauran inhen bhej dega.”
4yoon nabee kee yah peshgoee pooree huee,
5‘siyyoon betee ko bata dena,
dekh, tera baadshaah teray paas a raha hai.
vah haleem hai aur gadhay par,
haan gadhee kay bachchay par savaar hai.’
6donon shaagird chalay gaay. unhon nay vaisa hee kiya jaisa eesa nay unhen bataaya tha. 7vah gadhee ko bachchay samet lay aaay aur apnay kapday un par rakh diay. phir eesa un par baith gaya. 8jab vah chal pada to bahut ziyaada logon nay us kay aagay aagay raastay men apnay kapday bichha diay. baaz nay shaakhen bhee us kay aagay aagay raastay men bichha deen jo unhon nay darakhton say kaat lee theen. 9log eesa kay aagay aur peechhay chal rahay thay aur chilla kar yah naaray laga rahay thay,
“ibn-ay-daaood ko hoshaanaa [a] hoshaana (ibraanee : meharbaanee karkay hamen bacha). yahaan is men hamd-o-sana ka unsur bhee paaya jaata hai. !
mubaarak hai vah jo rabb kay naam say aata hai.
aasmaan kee bulandiyon par hoshaanaa [b] hoshaana (ibraanee : meharbaanee karkay hamen bacha). yahaan is men hamd-o-sana ka unsur bhee paaya jaata hai. .”
10jab eesa yarooshalam men daakhil hua to poora shaher hil gaya. sab nay poochha, “yah kaun hai?”
11hujoom nay javaab diya, “yah eesa hai, vah nabee jo galeel kay naasrat say hai.”
eesa bait-ul-muqaddas men jaata hai
12aur eesa bait-ul-muqaddas men ja kar un sab ko nikaalnay laga jo vahaan qurbaaniyon kay liyay darkaar cheezon kee khareed-o-farokht kar rahay thay. us nay sikkon ka tabaadla karnay vaalon kee mezen aur kabootar bechanay vaalon kee kursiyaan ulat deen 13aur un say kaha, “kalaam-ay-muqaddas men likha hai, ‘mera ghar dua ka ghar kahelaaega.’ lekin tum nay usay daakuon kay adday men badal diya hai.”
14andhay aur langday bait-ul-muqaddas men us kay paas aaay aur us nay unhen shifa dee. 15lekin raahanuma imaam aur shareeat kay ulma naaraaz huay jab unhon nay us kay hairat’angez kaam dekhay aur yah ki bachchay bait-ul-muqaddas men “ibn-ay-daaood ko hoshaana” chilla rahay hain. 16unhon nay us say poochha, “kya aap sun rahay hain ki yah bachchay kya kah rahay hain?”
“jee,” eesa nay javaab diya, “kya tum nay kalaam-ay-muqaddas men kabhee naheen padha ki ‘too nay chhotay bachchon aur sheerakhwaaron kee zabaan ko tayyaar kiya hai taaki vah teree tamjeed karen’?”
17phir vah unhen chhod kar shaher say nikla aur bait-aniyaah pahuncha jahaan us nay raat guzaaree.
anjeer kay darakht par laanat
18aglay din subah-saveray jab vah yarooshalam laut raha tha to eesa ko bhook lagee. 19raastay kay qareeb anjeer ka ek darakht dekh kar vah us kay paas gaya. lekin jab vah vahaan pahuncha to dekha ki phal naheen laga balki sirf pattay hee pattay hain. is par us nay darakht say kaha, “ab say kabhee bhee tujh men phal na lagay!” darakht fauran sookh gaya.
20yah dekh kar shaagird hairaan huay aur kaha, “anjeer ka darakht itnee jaldee say kis tarah sookh gaya?”
21eesa nay javaab diya, “main tum ko sachch bataata hoon, agar tum shak na karo balki eemaan rakho to phir tum na sirf aisa kaam kar sakogay balki is say bhee bada. tum is pahaad say kahogay, ‘uth, apnay aap ko samundar men gira day’ to yah ho jaaega. 22agar tum eemaan rakho to jo kuchh bhee tum dua men maangogay vah tum ko mil jaaega.”
kis nay eesa ko ikhtiyaar diya?
23eesa bait-ul-muqaddas men daakhil ho kar taaleem denay laga. itnay men raahanuma imaam aur qaum kay buzurg us kay paas aaay aur poochha, “aap yah sab kuchh kis ikhtiyaar say kar rahay hain? kis nay aap ko yah ikhtiyaar diya hai?”
24eesa nay javaab diya, “mera bhee tum say ek savaal hai. is ka javaab do to phir tum ko bata doonga ki main yah kis ikhtiyaar say kar raha hoon. 25mujhay bataao ki yaheya ka baptisma kahaan say tha - kya vah aasmaanee tha ya insaanee?”
vah aapas men bahs karnay lagay, “agar ham kahen ‘aasmaanee’ to vah poochhega, ‘to phir tum us par eemaan kyoon na laaay?’ 26lekin ham kaisay kah saktay hain ki vah insaanee tha? ham to aam logon say dartay hain, kyoonki vah sab maantay hain ki yaheya nabee tha.” 27chunaanchay unhon nay javaab diya, “ham naheen jaantay.”
eesa nay kaha, “phir main bhee tum ko naheen bataata ki main yah sab kuchh kis ikhtiyaar say kar raha hoon.
do beton kee tamseel
28tumhaara kya khayaal hai? ek aadmee kay do betay thay. baap baday betay kay paas gaya aur kaha, ‘beta, aaj angoor kay baagh men ja kar kaam kar.’ 29betay nay javaab diya, ‘main jaana naheen chaahata,’ lekin baad men us nay apna khayaal badal liya aur baagh men chala gaya. 30itnay men baap chhotay betay kay paas bhee gaya aur usay baagh men jaanay ko kaha. ‘jee janaab, main jaaoonga,’ chhotay betay nay kaha. lekin vah na gaya. 31ab mujhay bataao ki kis betay nay apnay baap kee marzee pooree kee?”
“pahelay betay nay,” unhon nay javaab diya.
eesa nay kaha, “main tum ko sachch bataata hoon ki taiks lenay vaalay aur kasbiyaan tum say pahelay allaah kee baadshaahee men daakhil ho rahay hain. 32kyoonki yaheya tum ko raastbaazee kee raah dikhaanay aaya aur tum us par eemaan na laaay. lekin taiks lenay vaalay aur kasbiyaan us par eemaan laaay. aur yah dekh kar bhee tum nay apna khayaal na badla aur us par eemaan na laaay.
angoor kay baagh men muzaareon kee baghaavat
33ek aur tamseel suno. ek zameendaar tha jis nay angoor ka baagh lagaaya. us nay us kee chaardeevaaree banaaee, angooron ka ras nikaalnay kay liyay ek gadhay kee khudaaee kee aur paheredaaron kay liyay burj taameer kiya. phir vah usay muzaareon kay sapurd karkay bairoon-ay-mulk chala gaya. 34jab angoor ko todnay ka vaqt qareeb a gaya to us nay apnay naukron ko muzaareon kay paas bhej diya taaki vah un say maalik ka hissa vasool karen. 35lekin muzaareon nay us kay naukron ko pakad liya. unhon nay ek kee pitaaee kee, doosray ko qatl kiya aur teesray ko sangasaar kiya. 36phir maalik nay mazeed naukron ko un kay paas bhej diya jo pahelay kee nisbat ziyaada thay. lekin muzaareon nay un kay saath bhee vahee sulook kiya. 37aakhirkaar zameendaar nay apnay betay ko un kay paas bheja. us nay kaha, ‘aakhir meray betay ka to lihaaz karengay.’ 38lekin betay ko dekh kar muzaaray ek doosray say kahenay lagay, ‘yah zameen ka vaaris hai. aao, ham isay qatl karkay us kee meeraas par qabza kar len.’ 39unhon nay usay pakad kar baagh say baahar phaink diya aur qatl kiya.”
40eesa nay poochha, “ab bataao, baagh ka maalik jab aaega to un muzaareon kay saath kya karega?”
41unhon nay javaab diya, “vah unhen buree tarah tabaah karega aur baagh ko doosron kay sapurd kar dega, aisay muzaareon kay sapurd jo vaqt par usay fasal ka us ka hissa dengay.”
42eesa nay un say kaha, “kya tum nay kabhee kalaam ka yah havaala naheen padha,
‘jis patthar ko makaan banaanay vaalon nay radd kiya,
vah konay ka bunyaadee patthar ban gaya.
yah rabb nay kiyaa
aur dekhnay men kitna hairat’angez hai’?
43is liyay main tumhen bataata hoon ki allaah kee baadshaahee tum say lay lee jaaegee aur ek aisee qaum ko dee jaaegee jo is kay mutaabiq phal laaegee. 44jo is patthar par girega vah tukday tukday ho jaaega, jabki jis par vah khud girega usay vah pees daalega.”
45eesa kee tamseelen sun kar raahanuma imaam aur fareesee samajh gaay ki vah hamaaray baaray men baat kar raha hai. 46unhon nay eesa ko giriftaar karnay kee koshish kee, lekin vah avaam say dartay thay kyoonki vah samajhtay thay ki eesa nabee hai.