Mattee 20
angoor kay baagh men mazdoor
1kyoonki aasmaan kee baadshaahee us zameendaar say mutaabiqat rakhtee hai jo ek din subah-saveray nikla taaki apnay angoor kay baagh kay liyay mazdoor dhoonday. 2vah un say dihaadee kay liyay chaandee ka ek sikka denay par muttafiq hua aur unhen apnay angoor kay baagh men bhej diya. 3nau bajay vah dubaara nikla to dekha ki kuchh log abhee tak mandee men faarigh baithay hain. 4us nay un say kaha, ‘tum bhee ja kar meray angoor kay baagh men kaam karo. main tumhen munaasib ujrat doonga.’ 5chunaanchay vah kaam karnay kay liyay chalay gaay. baarah bajay aur teen bajay dopaher kay vaqt bhee vah nikla aur is tarah kay faarigh mazdooron ko kaam par lagaaya. 6phir shaam kay paanch baj gaay. vah nikla to dekha ki abhee tak kuchh log faarigh baithay hain. us nay un say poochha, ‘tum kyoon poora din faarigh baithay rahay ho?’ 7unhon nay javaab diya, ‘is liyay ki kisee nay hamen kaam par naheen lagaaya.’ us nay un say kaha, ‘tum bhee ja kar meray angoor kay baagh men kaam karo.’
8din dhal gaya to zameendaar nay apnay afsar ko bataaya, ‘mazdooron ko bula kar unhen mazdooree day day, aakhir men aanay vaalon say shuroo karkay pahelay aanay vaalon tak.’ 9jo mazdoor paanch bajay aaay thay unhen chaandee ka ek ek sikka mil gaya. 10is liyay jab vah aaay jo pahelay kaam par lagaaay gaay thay to unhon nay ziyaada milnay kee tavaqqo kee. lekin unhen bhee chaandee ka ek ek sikka mila. 11is par vah zameendaar kay khilaaf budbudaanay lagay, 12‘yah aadmee jinhen aakhir men lagaaya gaya unhon nay sirf ek ghanta kaam kiya. to bhee aap nay unhen hamaaray baraabar kee mazdooree dee haalaanki hamen din ka poora bojh aur dhoop kee shiddat bardaasht karnee padee.’
13lekin zameendaar nay un men say ek say baat kee, ‘yaar, main nay ghalat kaam naheen kiya. kya too chaandee kay ek sikkay kay liyay mazdooree karnay par muttafiq na hua tha? 14apnay paisay lay kar chala ja. main aakhir men kaam par lagnay vaalon ko utna hee dena chaahata hoon jitna tujhay. 15kya mera haq naheen ki main jaisa chaahoon apnay paisay kharch karoon? ya kya too is liyay hasad karta hai ki main fayyaazdil hoon?’
16yoon avval aakhir men aaengay aur jo aakhiree hain vah avval ho jaaengay.”
eesa teesree martaba apnee maut ka zikr karta hai
17ab jab eesa yarooshalam kee taraf badh raha tha to baarah shaagirdon ko ek taraf lay ja kar us nay un say kaha, 18“ham yarooshalam kee taraf badh rahay hain. vahaan ibn-ay-aadam ko raahanuma imaamon aur shareeat kay ulma kay havaalay kar diya jaaega. vah us par saza-ay-maut ka fatwa day kar 19usay ghairyahoodiyon kay havaalay kar dengay taaki vah us ka mazaaq udaaen, us ko koday maaren aur usay masloob karen. lekin teesray din vah jee uthega.”
yaaqoob aur yoohanna kee maan kee guzaarish
20phir zabdee kay beton yaaqoob aur yoohanna kee maan apnay beton ko saath lay kar eesa kay paas aaee aur sijda karkay kaha, “aap say ek guzaarish hai.”
21eesa nay poochha, “too kya chaahatee hai?”
us nay javaab diya, “apnee baadshaahee men meray in beton men say ek ko apnay daaen haath baithnay den aur doosray ko baaen haath.”
22eesa nay kaha, “tum ko naheen maaloom ki kya maang rahay ho. kya tum vah piyaala pee saktay ho jo main peenay ko hoon?” “jee, ham pee saktay hain,” unhon nay javaab diya.
23phir eesa nay un say kaha, “tum mera piyaala to zaroor piyogay, lekin yah faisla karna mera kaam naheen ki kaun meray daaen haath baithega aur kaun baaen haath. meray baap nay yah maqaam un hee kay liyay tayyaar kiya hai jin ko us nay khud muqarrar kiya hai.”
24jab baaqee das shaagirdon nay yah suna to unhen yaaqoob aur yoohanna par ghussa aaya. 25is par eesa nay un sab ko bula kar kaha, “tum jaantay ho ki qaumon kay hukmaraan apnee r’aaya par rob daaltay hain aur un kay baday afsar un par apnay ikhtiyaar ka ghalat istemaal kartay hain. 26lekin tumhaaray darmiyaan aisa naheen hai. jo tum men bada hona chaahay vah tumhaara khaadim bane 27aur jo tum men avval hona chaahay vah tumhaara ghulaam banay. 28kyoonki ibn-ay-aadam bhee is liyay naheen aaya ki khidmat lay balki is liyay ki khidmat karay aur apnee jaan fidya kay taur par day kar bahuton ko chhudaaay.”
do andhon kee shifaa
29jab vah yareehoo shaher say nikalnay lagay to ek bada hujoom un kay peechhay chal raha tha. 30do andhay raastay kay kinaaray baithay thay. jab unhon nay suna ki eesa guzar raha hai to vah chillaanay lagay, “khudaavand, ibn-ay-daaood, ham par rahem karen.”
31hujoom nay unhen daant kar kaha, “khaamosh!” lekin vah aur bhee oonchee aavaaz say pukaartay rahay, “khudaavand, ibn-ay-daaood, ham par rahem karen.”
32eesa ruk gaya. us nay unhen apnay paas bulaaya aur poochha, “tum kya chaahatay ho ki main tumhaaray liyay karoon?”
33unhon nay javaab diya, “khudaavand, yah ki ham dekh saken.”
34eesa ko un par taras aaya. us nay un kee aankhon ko chhua to vah fauran bahaal ho gaeen. phir vah us kay peechhay chalnay lagay.