Mattee 19
talaaq kay baaray men taaleem
1yah kahenay kay baad eesa galeel ko chhod kar yahoodiya men darya-ay- yardan kay paar chala gaya. 2bada hujoom us kay peechhay ho liya aur us nay unhen vahaan shifa dee.
3kuchh fareesee aaay aur usay phansaanay kee gharaz say savaal kiya, “kya jaaiz hai ki mard apnee beevee ko kisee bhee vajah say talaaq day?”
4eesa nay javaab diya, “kya tum nay kalaam-ay-muqaddas men naheen padha ki ibtida men khaaliq nay unhen mard aur aurat banaaya? 5aur us nay farmaaya, ‘is liyay mard apnay maan-baap ko chhod kar apnee beevee kay saath paivast ho jaata hai. vah donon ek ho jaatay hain.’ 6yoon vah kalaam-ay-muqaddas kay mutaabiq do naheen rahetay balki ek ho jaatay hain. jisay allaah nay joda hai usay insaan juda na karay.”
7unhon nay etiraaz kiya, “to phir moosa nay yah kyoon farmaaya ki aadmee talaaqnaama likh kar beevee ko rukhsat kar day?”
8eesa nay javaab diya, “moosa nay tumhaaree sakhtdilee kee vajah say tum ko apnee beevee ko talaaq denay kee ijaazat dee. lekin ibtida men aisa na tha. 9main tumhen bataata hoon, jo apnee beevee ko jis nay zina na kiya ho talaaq day aur kisee aur say shaadee karay, vah zina karta hai.”
10shaagirdon nay us say kaha, “agar shauhar aur beevee ka aapas ka taalluq aisa hai to shaadee na karna behatar hai.”
11eesa nay javaab diya, “har koee yah baat samajh naheen sakta balki sirf vah jisay is qaabil bana diya gaya ho. 12kyoonki kuchh paidaaish hee say shaadee karnay kay qaabil naheen hotay, baaz ko doosron nay yoon banaaya hai aur baaz nay aasmaan kee baadshaahee kee khaatir shaadee karnay say inkaar kiya hai. lihaaza jo yah samajh sakay vah samajh lay.”
eesa chhotay bachchon ko barkat deta hai
13ek din chhotay bachchon ko eesa kay paas laaya gaya taaki vah un par apnay haath rakh kar dua karay. lekin shaagirdon nay laanay vaalon ko malaamat kee. 14yah dekh kar eesa nay kaha, “bachchon ko meray paas aanay do aur unhen na roko, kyoonki aasmaan kee baadshaahee in jaisay logon ko haasil hai.”
15us nay un par apnay haath rakhay aur phir vahaan say chala gaya.
ameer mushkil say allaah kee baadshaahee men daakhil ho saktay hain
16phir ek aadmee eesa kay paas aaya. us nay kaha, “ustaad, main kaun sa nek kaam karoon taaki abdee zindagee mil jaaay?”
17eesa nay javaab diya, “too mujhay nekee kay baaray men kyoon poochh raha hai? sirf ek hee nek hai. lekin agar too abdee zindagee men daakhil hona chaahata hai to ahkaam kay mutaabiq zindagee guzaar.”
18aadmee nay poochha, “kaun say ahkaam?”
eesa nay javaab diya, “qatl na karna, zina na karna, choree na karna, jhootee gavaahee na dena, 19apnay baap aur apnee maan kee izzat karna aur apnay padosee say vaisee muhabbat rakhna jaisee too apnay aap say rakhta hai.”
20javaan aadmee nay javaab diya, “main nay in tamaam ahkaam kee pairvee kee hai, ab kya rah gaya hai?”
21eesa nay usay bataaya, “agar too kaamil hona chaahata hai to ja aur apnee pooree jaaydaad farokht karkay paisay ghareebon men taqseem kar day. phir teray liyay aasmaan par khazaana jama ho jaaega. is kay baad a kar meray peechhay ho lay.”
22yah sun kar naujavaan maayoos ho kar chala gaya, kyoonki vah nihaayat daulatmand tha.
23is par eesa nay apnay shaagirdon say kaha, “main tum ko sachch bataata hoon ki daulatmand kay liyay aasmaan kee baadshaahee men daakhil hona mushkil hai. 24main yah dubaara kaheta hoon, ameer kay aasmaan kee baadshaahee men daakhil honay kee nisbat ziyaada aasaan yah hai ki oont sooee kay naakay men say guzar jaaay.”
25yah sun kar shaagird nihaayat hairatzada huay aur poochhnay lagay, “phir kis ko najaat haasil ho saktee hai?”
26eesa nay ghaur say un kee taraf dekh kar javaab diya, “yah insaan kay liyay to naamumkin hai, lekin allaah kay liyay sab kuchh mumkin hai.”
27phir patras bol utha, “ham to apna sab kuchh chhod kar aap kay peechhay ho liyay hain. hamen kya milega?”
28eesa nay un say kaha, “main tum ko sachch bataata hoon, duniya kee naee takhleeq par jab ibn-ay-aadam apnay jalaalee takht par baithega to tum bhee jinhon nay meree pairvee kee hai baarah takhton par baith kar israaeel kay baarah qabeelon kee adaalat karogay. 29aur jis nay bhee meree khaatir apnay gharon, bhaaiyon, bahenon, baap, maan, bachchon ya kheton ko chhod diya hai usay sau guna ziyaada mil jaaega aur meeraas men abdee zindagee paaega. 30lekin bahut say log jo ab avval hain us vaqt aakhir hongay aur jo ab aakhir hain vah avval hongay.