Matthew 18

Mattee 18

kaun sab say bada hai?

¹us vaqt shaagird eesa kay paas a kar poochhnay lagay, “aasmaan kee baadshaahee men kaun sab say bada hai?”

²javaab men eesa nay ek chhotay bachchay ko bula kar un kay darmiyaan khada kiyaa ³aur kaha, “main tum ko sachch bataata hoon agar tum badal kar chhotay bachchon kee maanind na bano to tum kabhee aasmaan kee baadshaahee men daakhil naheen hogay. ⁴is liyay jo bhee apnay aap ko is bachchay kee tarah chhota banaaega vah aasmaan men sab say bada hoga. ⁵aur jo bhee meray naam men is jaisay chhotay bachchay ko qabool karay vah mujhay qabool karta hai.

aazmaaishen

⁶lekin jo koee in chhoton men say kisee ko gunaah karnay par uksaaay us kay liyay behatar hai ki us kay galay men badee chakkee ka paat baandh kar usay samundar kee gaheraaiyon men dubo diya jaaay. ⁷duniya par un cheezon kee vajah say afsos jo gunaah karnay par uksaatee hain. laazim hai ki aisee aazmaaishen aaen, lekin us shakhs par afsos jis kee maarifat vah aaen.

⁸agar tera haath ya paaon tujhay gunaah karnay par uksaaay to usay kaat kar phaink dena. is say pahelay ki tujhay do haathon ya do paaon samet jahennum kee abdee aag men phainka jaaay, behatar yah hai ki ek haath ya paaon say maheroom ho kar abdee zindagee men daakhil ho. ⁹aur agar teree aankh tujhay gunaah karnay par uksaaay to usay nikaal kar phaink dena. is say pahelay ki tujhay do aankhon samet jahennum kee aag men phainka jaaay behatar yah hai ki ek aankh say maheroom ho kar abdee zindagee men daakhil ho.

khoee huee bhed kee tamseel

¹⁰khabardaar! tum in chhoton men say kisee ko bhee haqeer na jaanna. kyoonki main tum ko bataata hoon ki aasmaan par in kay farishtay har vaqt meray baap kay chiharay ko dekhtay rahetay hain. ¹¹[kyoonki ibn-ay-aadam khoay huon ko dhoondnay aur najaat denay aaya hai.]

¹²tumhaara kya khayaal hai? agar kisee aadmee kee 100 bheden hon aur ek bhatak kar gum ho jaaay to vah kya karega? kya vah baaqee 99 bheden pahaadee ilaaqay men chhod kar bhatkee huee bhed ko dhoondnay naheen jaaega? ¹³aur main tum ko sachch bataata hoon ki bhatkee huee bhed kay milnay par vah us kay baaray men un baaqee 99 bhedon kee nisbat kaheen ziyaada khushee manaaega jo bhatkee naheen. ¹⁴bilkul isee tarah aasmaan par tumhaara baap naheen chaahata ki in chhoton men say ek bhee halaak ho jaaay.

gunaah men paday bhaaee say sulook

¹⁵agar teray bhaaee nay tera gunaah kiya ho to akelay us kay paas ja kar us par us ka gunaah zaahir kar. agar vah teree baat maanay to too nay apnay bhaaee ko jeet liya. ¹⁶lekin agar vah na maanay to ek ya do aur logon ko apnay saath lay ja taaki tumhaaree har baat kee do ya teen gavaahon say tasdeeq ho jaaay. ¹⁷agar vah un kee baat bhee na maanay to jamaaat ko bata dena. aur agar vah jamaaat kee bhee na maanay to us kay saath ghaireemaandaar ya taiks lenay vaalay ka sa sulook kar.

baandhnay aur kholnay ka ikhtiyaar

¹⁸main tum ko sachch bataata hoon ki jo kuchh bhee tum zameen par baandhogay aasmaan par bhee bandhega, aur jo kuchh zameen par khologay aasmaan par bhee khulega.

¹⁹main tum ko yah bhee bataata hoon ki agar tum men say do shakhs kisee baat ko maangnay par muttafiq ho jaaen to mera aasmaanee baap tum ko bakhshega. ²⁰kyoonki jahaan bhee do ya teen afraad meray naam men jama ho jaaen vahaan main un kay darmiyaan hoonga.”

muaaf na karnay vaalay naukar kee tamseel

²¹phir patras nay eesa kay paas a kar poochha, “khudaavand, jab mera bhaaee mera gunaah karay to main kitnee baar usay muaaf karoon? saat baar tak?”

²²eesa nay javaab diya, “main tujhay bataata hoon, saat baar naheen balki 77 baar. ²³is liyay aasmaan kee baadshaahee ek baadshaah kee maanind hai jo apnay naukron kay karzon ka hisaab-kitaab karna chaahata tha. ²⁴hisaab-kitaab shuroo kartay vaqt ek aadmee us kay saamnay pesh kiya gaya jo arbon kay hisaab say us ka qarzdaar tha. ²⁵vah yah raqam ada na kar saka, is liyay us kay maalik nay yah qarz vasool karnay kay liyay hukm diya ki usay baal-bachchon aur tamaam milkiyat samet farokht kar diya jaaay. ²⁶yah sun kar naukar munh kay bal gira aur minnat karnay laga, ‘mujhay muhalat den, main pooree raqam ada kar doonga.’ ²⁷baadshaah ko us par taras aaya. us nay us ka qarz muaaf karkay usay jaanay diya.

²⁸lekin jab yahee naukar baahar nikla to ek hamkhidmat mila jo us ka chand hazaar roopon ka qarzdaar tha. usay pakad kar vah us ka gala daba kar kahenay laga, ‘apna qarz ada kar!’ ²⁹doosra naukar gir kar minnat karnay laga, ‘mujhay muhalat den, main aap ko saaree raqam ada kar doonga.’ ³⁰lekin vah is kay liyay tayyaar na hua, balki ja kar usay us vaqt tak jel men dalvaaya jab tak vah pooree raqam ada na kar day. ³¹jab baaqee naukron nay yah dekha to unhen shadeed dukh hua aur unhon nay apnay maalik kay paas ja kar sab kuchh bata diya jo hua tha. ³²is par maalik nay us naukar ko apnay paas bula liya aur kaha, ‘shareer naukar! jab too nay meree minnat kee to main nay tera poora qarz muaaf kar diya. ³³kya laazim na tha ki too bhee apnay saathee naukar par utna rahem karta jitna main nay tujh par kiya tha?’ ³⁴ghussay men maalik nay usay jel kay afsaron kay havaalay kar diya taaki us par us vaqt tak tashaddud kiya jaaay jab tak vah qarz kee pooree raqam ada na kar day.

³⁵mera aasmaanee baap tum men say har ek kay saath bhee aisa hee karega agar tum nay apnay bhaaee ko pooray dil say muaaf na kiya.”