Mattee 17
pahaad par eesa kee soorat badal jaatee hai
1chhah din kay baad eesa sirf patras, yaaqoob aur yoohanna ko apnay saath lay kar oonchay pahaad par chadh gaya. 2vahaan us kee shakl-o-soorat un kay saamnay badal gaee. us ka chihara sooraj kee tarah chamaknay laga, aur us kay kapday noor kee maanind safed ho gaay. 3achaanak ilyaas aur moosa zaahir huay aur eesa say baaten karnay lagay. 4patras bol utha, “khudaavand, kitnee achchhee baat hai ki ham yahaan hain. agar aap chaahen to main teen jhompadiyaan banaaoonga, ek aap kay liyay, ek moosa kay liyay aur ek ilyaas kay liyay.”
5vah abhee baat kar hee raha tha ki ek chamakdaar baadal a kar un par chha gaya aur baadal men say ek aavaaz sunaaee dee, “yah mera piyaara farzand hai, jis say main khush hoon. is kee suno.”
6yah sun kar shaagird dahshat kha kar aundhay munh gir gaay. 7lekin eesa nay a kar unhen chhua. us nay kaha, “utho, mat daro.” 8jab unhon nay nazar uthaaee to eesa kay siva kisee ko na dekha.
9vah pahaad say utarnay lagay to eesa nay unhen hukm diya, “jo kuchh tum nay dekha hai usay us vaqt tak kisee ko na bataana jab tak ki ibn-ay-aadam murdon men say jee na uthay.”
10shaagirdon nay us say poochha, “shareeat kay ulma kyoon kahetay hain ki maseeh kee aamad say pahelay ilyaas ka aana zarooree hai?”
11eesa nay javaab diya, “ilyaas to zaroor sab kuchh bahaal karnay kay liyay aaega. 12lekin main tum ko bataata hoon ki ilyaas to a chuka hai aur unhon nay usay naheen pahechaana balki us kay saath jo chaaha kiya. isee tarah ibn-ay-aadam bhee un kay haathon dukh uthaaega.”
13phir shaagirdon ko samajh aaee ki vah un kay saath yaheya baptisma denay vaalay kee baat kar raha tha.
eesa ladkay men say badruh nikaalta hai
14jab vah neechay hujoom kay paas pahunchay to ek aadmee nay eesa kay saamnay a kar ghutnay teke 15aur kaha, “khudaavand, meray betay par rahem karen, usay mirgee kay dauray padtay hain aur usay shadeed takleef uthaanee padtee hai. kaee baar vah aag ya paanee men gir jaata hai. 16main usay aap kay shaagirdon kay paas laaya tha, lekin vah usay shifa na day sakay.”
17eesa nay javaab diya, “eemaan say khaalee aur tedhee nasal! main kab tak tumhaaray saath rahoon, kab tak tumhen bardaasht karoon? ladkay ko meray paas lay aao.” 18eesa nay badruh ko daanta, to vah ladkay men say nikal gaee. usee lamhay usay shifa mil gaee.
19baad men shaagirdon nay alaahidagee men eesa kay paas a kar poochha, “ham badruh ko kyoon na nikaal sakay?”
20us nay javaab diya, “apnay eemaan kee kamee kay sabab say. main tumhen sachch bataata hoon, agar tumhaara eemaan raaee kay daanay kay baraabar bhee ho to phir tum is pahaad ko kah sakogay, ‘idhar say udhar khisak ja,’ to vah khisak jaaega. aur tumhaaray liyay kuchh bhee naamumkin naheen hoga. 21[lekin is qism kee badruh dua aur rozay kay baghair naheen nikaltee.]”
eesa doosree baar apnee maut ka zikr karta hai
22jab vah galeel men jama huay to eesa nay unhen bataaya, “ibn-ay-aadam ko aadmiyon kay havaalay kar diya jaaega. 23vah usay qatl karengay, lekin teen din kay baad vah jee uthega.” yah sun kar shaagird nihaayat ghamgeen huay.
bait-ul-muqaddas ka taiks
24vah kafarnahoom pahunchay to bait-ul-muqaddas ka taiks jama karnay vaalay patras kay paas a kar poochhnay lagay, “kya aap ka ustaad bait-ul-muqaddas ka taiks ada naheen karta?”
25“jee, vah karta hai,” patras nay javaab diya. vah ghar men aaya to eesa pahelay hee bolnay laga, “kya khayaal hai shamaaoon, duniya kay baadshaah kin say dyootee aur taiks letay hain, apnay farzandon say ya ajnabiyon say?”
26patras nay javaab diya, “ajnabiyon say.” eesa bola “to phir un kay farzand taiks denay say baree huay. 27lekin ham unhen naaraaz naheen karna chaahatay. is liyay jheel par ja kar us men doree daal dena. jo machhlee too pahelay pakdega us ka munh kholna to us men say chaandee ka sikka niklega. usay lay kar unhen meray aur apnay liyay ada kar day.”