Mattee 16

fareesee ilaahee nishaan ka taqaaza kartay hain

¹ek din fareesee aur sadooqee eesa kay paas aaay. usay parakhnay kay liyay unhon nay mutaalba kiya ki vah unhen aasmaan kee taraf say koee ilaahee nishaan dikhaaay taaki us ka ikhtiyaar saabit ho jaaay. ²lekin us nay javaab diya, “shaam ko tum kahetay ho, ‘kal mausam saaf hoga kyoonki aasmaan surkh nazar aata hai.’ ³aur subah kay vaqt kahetay ho, ‘aaj toofaan hoga kyoonki aasmaan surkh hai aur baadal chhaaay huay hain.’ gharaz tum aasmaan kee haalat par ghaur karkay saheeh nateeja nikaal letay ho, lekin zamaanon kee alaamaton par ghaur karkay saheeh nateejay tak pahunchna tumhaaray bas kee baat naheen hai. ⁴sirf shareer aur zinaakaar nasal ilaahee nishaan ka taqaaza kartee hai. lekin usay koee bhee ilaahee nishaan pesh naheen kiya jaaega siva-ay-yoonus nabee kay nishaan kay.”

yah kah kar eesa unhen chhod kar chala gaya.

fareesiyon aur sadooqiyon ka khameer

⁵jheel ko paar kartay vaqt shaagird apnay saath khaana laana bhool gaay thay. ⁶eesa nay un say kaha, “khabardaar, fareesiyon aur sadooqiyon kay khameer say hoshyaar rahena.”

⁷shaagird aapas men bahs karnay lagay, “vah is liyay kah rahay hongay ki ham khaana saath naheen laaay.”

⁸eesa ko maaloom hua ki vah kya soch rahay hain. us nay kaha, “tum aapas men kyoon bahs kar rahay ho ki hamaaray paas rotee naheen hai? ⁹kya tum abhee tak naheen samajhtay? kya tumhen yaad naheen ki main nay paanch rotiyaan lay kar 5,000 aadmiyon ko khaana khila diya aur ki tum nay bachay huay tukdon kay kitnay tokray uthaaay thay? ¹⁰ya kya tum bhool gaay ho ki main nay saat rotiyaan lay kar 4,000 aadmiyon ko khaana khilaaya aur ki tum nay bachay huay tukdon kay kitnay tokray uthaaay thay? ¹¹tum kyoon naheen samajhtay ki main tum say khaanay kee baat naheen kar raha? suno meree baat! fareesiyon aur sadooqiyon kay khameer say hoshyaar raho!”

¹²phir unhen samajh aaee ki eesa unhen rotee kay khameer say aagaah naheen kar raha tha balki fareesiyon aur sadooqiyon kee taaleem say.

patras ka iqraar

¹³jab eesa qaisriya-filippee kay ilaaqay men pahuncha to us nay shaagirdon say poochha, “ibn-ay-aadam logon kay nazdeek kaun hai?”

¹⁴unhon nay javaab diya, “kuchh kahetay hain yaheya baptisma denay vaala, kuchh yah ki aap ilyaas nabee hain. kuchh yah bhee kahetay hain ki yaramiyaah ya nabiyon men say ek.”

¹⁵us nay poochha, “lekin tumhaaray nazdeek main kaun hoon?”

¹⁶patras nay javaab diya, “aap zinda khuda kay farzand maseeh hain.”

¹⁷eesa nay kaha, “shamaaoon bin yoonus, too mubaarak hai, kyoonki kisee insaan nay tujh par yah zaahir naheen kiya balki meray aasmaanee baap nay. ¹⁸main tujhay yah bhee bataata hoon ki too patras yaanee patthar hai, aur isee patthar par main apnee jamaaat ko taameer karoonga, aisee jamaaat jis par paataal kay darvaazay bhee ghaalib naheen aaengay. ¹⁹main tujhay aasmaan kee baadshaahee kee kunjiyaan day doonga. jo kuchh too zameen par baandhega vah aasmaan par bhee bandhega. aur jo kuchh too zameen par kholega vah aasmaan par bhee khulega.”

²⁰phir eesa nay apnay shaagirdon ko hukm diya, “kisee ko bhee na bataao ki main maseeh hoon.”

eesa apnee maut ka zikr karta hai

²¹us vaqt say eesa apnay shaagirdon par vaazih karnay laga, “laazim hai ki main yarooshalam ja kar qaum kay buzurgon, raahanuma imaamon aur shareeat kay ulma kay haathon bahut dukh uthaaoon. mujhay qatl kiya jaaega, lekin teesray din main jee uthoonga.”

²²is par patras usay ek taraf lay ja kar samjhaanay laga. “ai khudaavand, allaah na karay ki yah kabhee bhee aap kay saath ho.”

²³eesa nay mud kar patras say kaha, “shaitaan, meray saamnay say hat ja! too meray liyay thokar ka baais hai, kyoonki too allaah kee soch naheen rakhta balki insaan kee.”

²⁴phir eesa nay apnay shaagirdon say kaha, “jo meray peechhay aana chaahay vah apnay aap ka inkaar karay aur apnee saleeb utha kar meray peechhay ho lay. ²⁵kyoonki jo apnee jaan ko bachaaay rakhna chaahay vah usay kho dega. lekin jo meree khaatir apnee jaan kho day vahee usay pa lega. ²⁶kya faaida hai agar kisee ko pooree duniya haasil ho jaaay, lekin vah apnee jaan say maheroom ho jaaay? insaan apnee jaan kay badlay kya day sakta hai? ²⁷kyoonki ibn-ay-aadam apnay baap kay jalaal men apnay farishton kay saath aaega, aur us vaqt vah har ek ko us kay kaam ka badla dega. ²⁸main tumhen sachch bataata hoon, yahaan kuchh aisay log khaday hain jo marnay say pahelay hee ibn-ay-aadam ko us kee baadshaahee men aatay huay dekhengay.”