Mattee 15
baapdaada kee taaleem
1phir kuchh fareesee aur shareeat kay aalim yarooshalam say a kar eesa say poochhnay lagay, 2“aap kay shaagird baapdaada kee rivaayat kyoon todtay hain? kyoonki vah haath dhoay baghair rotee khaatay hain.”
3eesa nay javaab diya, “aur tum apnee rivaayaat kee khaatir allaah ka hukm kyoon todtay ho? 4kyoonki allaah nay farmaaya, ‘apnay baap aur apnee maan kee izzat karna’ aur ‘jo apnay baap ya maan par laanat karay usay saza-ay-maut dee jaaay.’ 5lekin jab koee apnay vaalidain say kahay, ‘main aap kee madad naheen kar sakta, kyoonki main nay mannat maanee hai ki jo kuchh mujhay aap ko dena tha vah allaah kay liyay vaqf hai’ to tum isay jaaiz qaraar detay ho. 6yoon tum kahetay ho ki usay apnay maan-baap kee izzat karnay kee zaroorat naheen hai. aur isee tarah tum allaah kay kalaam ko apnee rivaayat kee khaatir mansookh kar letay ho. 7riyaakaaro! yasaayaah nabee nay tumhaaray baaray men kya khoob nubuvvat kee hai,
8‘yah qaum apnay honton say to mera ehatiraam kartee hai
lekin us ka dil mujh say door hai.
9vah meree parastish kartay to hain, lekin befaaida.
kyoonki vah sirf insaan hee kay ahkaam sikhaatay hain’.”
insaan ko kya kuchh naapaak kar deta hai?
10phir eesa nay hujoom ko apnay paas bula kar kaha, “sab meree baat suno aur isay samajhnay kee koshish karo. 11koee aisee cheez hai naheen jo insaan kay munh men daakhil ho kar usay naapaak kar sakay, balki jo kuchh insaan kay munh say nikalta hai vahee usay naapaak kar deta hai.”
12is par shaagirdon nay us kay paas a kar poochha, “kya aap ko maaloom hai ki fareesee yah baat sun kar naaraaz huay hain?”
13us nay javaab diya, “jo bhee pauda meray aasmaanee baap nay naheen lagaaya usay jad say ukhaada jaaega. 14unhen chhod do, vah andhay raah dikhaanay vaalay hain. agar ek andha doosray andhay kee raahanumaaee karay to donon gadhay men gir jaaengay.”
15patras bol utha, “is tamseel ka matlab hamen bataaen.”
16eesa nay kaha, “kya tum abhee tak itnay naasamajh ho? 17kya tum naheen samajh saktay ki jo kuchh insaan kay munh men daakhil ho jaata hai vah us kay meday men jaata hai aur vahaan say nikal kar ja-ay-zaroorat men? 18lekin jo kuchh insaan kay munh say nikalta hai vah dil say aata hai. vahee insaan ko naapaak karta hai. 19dil hee say buray khayaalaat, qatl-o-ghaarat, zinaakaaree, haraamkaaree, choree, jhootee gavaahee aur buhtaan nikaltay hain. 20yahee kuchh insaan ko naapaak kar deta hai, lekin haath dhoay baghair khaana khaanay say vah naapaak naheen hota.”
ghairyahoodee aurat ka eemaan
21phir eesa galeel say ravaana ho kar shimaal men soor aur saida kay ilaaqay men aaya. 22is ilaaqay kee ek kan’aanee khaatoon us kay paas a kar chillaanay lagee, “khudaavand, ibn-ay-daaood, mujh par rahem karen. ek badruh meree betee ko bahut sataatee hai.”
23lekin eesa nay javaab men ek lafz bhee na kaha. is par us kay shaagird us kay paas a kar us say guzaarish karnay lagay, “usay faarigh kar den, kyoonki vah hamaaray peechhay peechhay cheekhtee chillaatee hai.”
24eesa nay javaab diya, “mujhay sirf israaeel kee khoee huee bhedon kay paas bheja gaya hai.”
25aurat us kay paas a kar munh kay bal jhuk gaee aur kaha, “khudaavand, meree madad karen!”
26us nay usay bataaya, “yah munaasib naheen ki bachchon say khaana lay kar kutton kay saamnay phaink diya jaaay.”
27us nay javaab diya, “jee khudaavand, lekin kuttay bhee vah tukday khaatay hain jo un kay maalik kee mez par say farsh par gir jaatay hain.”
28eesa nay kaha, “ai aurat, tera eemaan bada hai. teree darakhwaast pooree ho jaaay.” usee lamhay aurat kee betee ko shifa mil gaee.
eesa bahut say mareezon ko shifa deta hai
29phir eesa vahaan say ravaana ho kar galeel kee jheel kay kinaaray pahunch gaya. vahaan vah pahaad par chadh kar baith gaya. 30logon kee badee taadaad us kay paas aaee. vah apnay langday, andhay, maflooj, goongay aur kaee aur qism kay mareez bhee saath lay aaay. unhon nay unhen eesa kay saamnay rakha to us nay unhen shifa dee. 31hujoom hairatzada ho gaya. kyoonki goongay bol rahay thay, apaahajon kay aaza bahaal ho gaay, langday chalnay aur andhay dekhnay lagay thay. yah dekh kar bheed nay israaeel kay khuda kee tamjeed kee.
eesa 4000 mardon ko khaana khilaata hai
32phir eesa nay apnay shaagirdon ko bula kar un say kaha, “mujhay in logon par taras aata hai. inhen meray saath thaheray teen din ho chukay hain aur in kay paas khaanay kee koee cheez naheen hai. lekin main inhen is bhookee haalat men rukhsat naheen karna chaahata. aisa na ho ki vah raastay men thak kar choor ho jaaen.”
33us kay shaagirdon nay javaab diya, “is veeraan ilaaqay men kahaan say itna khaana mil sakega ki yah log kha kar ser ho jaaen?”
34eesa nay poochha, “tumhaaray paas kitnee rotiyaan hain?” unhon nay javaab diya, “saat, aur chand ek chhotee machhliyaan.”
35eesa nay hujoom ko zameen par baithnay ko kaha. 36phir saat rotiyon aur machhliyon ko lay kar us nay shukrguzaaree kee dua kee aur unhen tod tod kar apnay shaagirdon ko taqseem karnay kay liyay day diya. 37sab nay jee bhar kar khaaya. baad men jab khaanay kay bachay huay tukday jama kiay gaay to saat baday tokray bhar gaay. 38khavaateen aur bachchon kay ilaava khaanay vaalay 4,000 mard thay.
39phir eesa logon ko rukhsat karkay kashtee par savaar hua aur magdan kay ilaaqay men chala gaya.