Mattee 14
yaheha ka qatl
1us vaqt galeel kay hukmaraan herodes antipaas ko eesa kay baaray men ittila milee. 2is par us nay apnay darbaariyon say kaha, “yah yaheya baptisma denay vaala hai jo murdon men say jee utha hai, is liyay us kee mojizaana taaqten is men nazar aatee hain.”
3vajah yah thee ki herodes nay yaheya ko giriftaar karkay jel men daala tha. yah herodiyaas kee khaatir hua tha jo pahelay herodes kay bhaaee filippus kee beevee thee. 4yaheya nay herodes ko bataaya tha, “herodiyaas say teree shaadee naajaaiz hai.” 5herodes yaheya ko qatl karna chaahata tha, lekin avaam say darta tha kyoonki vah usay nabee samajhtay thay.
6herodes kee saalagirah kay mauqay par herodiyaas kee betee un kay saamnay naachee. herodes ko us ka naachna itna pasand aayaa 7ki us nay qasam kha kar us say vaada kiya, “jo bhee too maangegee main tujhay doonga.”
8apnee maan kay sikhaanay par betee nay kaha, “mujhay yaheya baptisma denay vaalay ka sar tray men mangva den.”
9yah sun kar baadshaah ko dukh hua. lekin apnee qasmon aur mehamaanon kee maujoodgee kee vajah say us nay usay denay ka hukm day diya. 10chunaanchay yaheya ka sar qalam kar diya gaya. 11phir tray men rakh kar andar laaya gaya aur ladkee ko day diya gaya. ladkee usay apnee maan kay paas lay gaee. 12baad men yaheya kay shaagird aaay aur us kee laash lay kar usay dafnaaya. phir vah eesa kay paas gaay aur usay ittila dee.
eesa 5000 mardon ko khaana khilaata hai
13yah khabar sun kar eesa logon say alag ho kar kashtee par savaar hua aur kisee veeraan jagah chala gaya. lekin hujoom ko us kee khabar milee. log paidal chal kar shaheron say nikal aaay aur us kay peechhay lag gaay. 14jab eesa nay kashtee par say utar kar baday hujoom ko dekha to usay logon par bada taras aaya. vaheen us nay un kay mareezon ko shifa dee.
15jab din dhalnay laga to us kay shaagird us kay paas aaay aur kaha, “yah jagah veeraan hai aur din dhalnay laga hai. in ko rukhsat kar den taaki yah ird-gird kay deehaaton men ja kar khaanay kay liyay kuchh khareed len.”
16eesa nay javaab diya, “inhen jaanay kee zaroorat naheen, tum khud inhen khaanay ko do.”
17unhon nay javaab diya, “hamaaray paas sirf paanch rotiyaan aur do machhliyaan hain.”
18us nay kaha, “unhen yahaan meray paas lay aao,” 19aur logon ko ghaas par baithnay ka hukm diya. eesa nay un paanch rotiyon aur do machhliyon ko lay kar aasmaan kee taraf dekha aur shukrguzaaree kee dua kee. phir us nay rotiyon ko tod tod kar shaagirdon ko diya, aur shaagirdon nay yah rotiyaan logon men taqseem kar deen. 20sab nay jee bhar kar khaaya. jab shaagirdon nay bachay huay tukday jama kiay to baarah tokray bhar gaay. 21khavaateen aur bachchon kay ilaava khaanay vaalay taqreeban 5,000 mard thay.
eesa paanee par chalta hai
22is kay ain baad eesa nay shaagirdon ko majboor kiya ki vah kashtee par savaar ho kar aagay niklen aur jheel kay paar chalay jaaen. itnay men vah hujoom ko rukhsat karna chaahata tha. 23unhen khairbaad kahenay kay baad vah dua karnay kay liyay akela pahaad par chadh gaya. shaam kay vaqt vah vahaan akela thaa 24jabki kashtee kinaaray say kaafee door ho gaee thee. laheren kashtee ko bahut tang kar rahee theen kyoonki hava us kay khilaaf chal rahee thee.
25taqreeban teen bajay raat kay vaqt eesa paanee par chaltay huay un kay paas aaya. 26jab shaagirdon nay usay jheel kee satah par chaltay huay dekha to unhon nay dahshat khaaee. “yah koee bhoot hai,”unhon nay kaha aur dar kay maaray cheekhen maarnay lagay.
27lekin eesa fauran un say mukhaatib ho kar bola, “hausla rakho! main hee hoon. mat ghabraao.”
28is par patras bol utha, “khudaavand, agar aap hee hain to mujhay paanee par apnay paas aanay ka hukm den.”
29eesa nay javaab diya, “a.” patras kashtee par say utar kar paanee par chaltay chaltay eesa kee taraf badhnay laga. 30lekin jab us nay tez hava par ghaur kiya to vah ghabra gaya aur doobnay laga. vah chilla utha, “khudaavand, mujhay bachaaen!”
31eesa nay fauran apna haath badha kar usay pakad liya. us nay kaha, “ai kamaetiqaad! too shak men kyoon pad gaya tha?”
32donon kashtee par savaar huay to hava tham gaee. 33phir kashtee men maujood shaagirdon nay usay sijda karkay kaha, “yaqeenan aap allaah kay farzand hain!”
gannesarat men mareezon kee shifaa
34jheel ko paar karkay vah gannesarat shaher kay paas pahunch gaay. 35jab us jagah kay logon nay eesa ko pahechaan liya to unhon nay ird-gird kay pooray ilaaqay men is kee khabar phailaaee. unhon nay apnay tamaam mareezon ko us kay paas la kar 36us say minnat kee ki vah unhen sirf apnay libaas kay daaman ko chhoonay day. aur jis nay bhee usay chhua usay shifa milee.