Mattee 13
beej bonay vaalay kee tamseel
1usee din eesa ghar say nikal kar jheel kay kinaaray baith gaya. 2itna bada hujoom us kay gird jama ho gaya ki aakhirkaar vah ek kashtee men baith gaya jabki log kinaaray par khaday rahay. 3phir us nay unhen bahut see baaten tamseelon men sunaaeen.
“ek kisaan beej bonay kay liyay nikla. 4jab beej idhar udhar bikhar gaya to kuchh daanay raastay par giray aur parindon nay a kar unhen chug liya. 5kuchh pathreelee zameen par giray jahaan mittee kee kamee thee. vah jald ug aaay kyoonki mittee gaheree naheen thee. 6lekin jab sooraj nikla to pauday jhulas gaay aur choonki vah jad na pakad sakay is liyay sookh gaay. 7kuchh khudrau kaantedaar paudon kay darmiyaan bhee giray. vahaan vah ugnay to lagay, lekin khudrau paudon nay saath saath badh kar unhen phalnay phoolnay na diya. chunaanchay vah bhee khatm ho gaay. 8lekin aisay daanay bhee thay jo zarkhez zameen men giray aur badhtay badhtay tees guna, saath guna balki sau guna tak ziyaada phal laaay. 9jo sun sakta hai vah sun lay!”
tamseelon ka maqsad
10shaagird us kay paas a kar poochhnay lagay, “aap logon say tamseelon men baat kyoon kartay hain?”
11us nay javaab diya, “tum ko to aasmaan kee baadshaahee kay bhed samajhnay kee liyaaqat dee gaee hai, lekin unhen yah liyaaqat naheen dee gaee. 12jis kay paas kuchh hai usay aur diya jaaega aur us kay paas kasrat kee cheezen hongee. lekin jis kay paas kuchh naheen hai us say vah bhee chheen liya jaaega jo us kay paas hai. 13is liyay main tamseelon men un say baat karta hoon. kyoonki vah dekhtay huay kuchh naheen dekhtay, vah suntay huay kuchh naheen suntay aur kuchh naheen samajhtay. 14un men yasaayaah nabee kee yah peshgoee pooree ho rahee hai :
‘tum apnay kaanon say sunoge
magar kuchh naheen samjhogay,
tum apnee aankhon say dekhoge
magar kuchh naheen jaanogay.
15kyoonki is qaum ka dil behiss ho gaya hai.
vah mushkil say apnay kaanon say suntay hain,
unhon nay apnee aankhon ko band kar rakha hai,
aisa na ho ki vah apnee aankhon say dekhen,
apnay kaanon say sunen,
apnay dil say samjhen,
meree taraf rujoo karen
aur main unhen shifa doon.’
16lekin tumhaaree aankhen mubaarak hain kyoonki vah dekh saktee hain aur tumhaaray kaan mubaarak hain kyoonki vah sun saktay hain. 17main tum ko sachch bataata hoon ki jo kuchh tum dekh rahay ho bahut say nabee aur raastbaaz isay dekh na paaay agarchi vah is kay aarzoomand thay. aur jo kuchh tum sun rahay ho isay vah sunnay na paaay, agarchi vah is kay khwaahishmand thay.
beej bonay vaalay kee tamseel ka matlab
18ab suno ki beej bonay vaalay kee tamseel ka matlab kya hai. 19raastay par giray huay daanay vah log hain jo baadshaahee ka kalaam suntay to hain, lekin usay samajhtay naheen. phir iblees a kar vah kalaam chheen leta hai jo un kay dilon men boya gaya hai. 20pathreelee zameen par giray huay daanay vah log hain jo kalaam suntay hee usay khushee say qabool to kar letay hain, 21lekin vah jad naheen pakadtay aur is liyay ziyaada der tak qaaim naheen rahetay. joon hee vah kalaam par eemaan laanay kay baais kisee museebat ya eezaarasaanee say dochaar ho jaaen to vah bargashta ho jaatay hain. 22khudrau kaantedaar paudon kay darmiyaan giray huay daanay vah log hain jo kalaam suntay to hain, lekin phir rozmarra kee pareshaaniyaan aur daulat ka fareb kalaam ko phalnay phoolnay naheen deta. nateejay men vah phal laanay tak naheen pahunchta. 23is kay muqaablay men zarkhez zameen men giray huay daanay vah log hain jo kalaam ko sun kar usay samajh letay aur badhtay badhtay tees guna, saath guna balki sau guna tak phal laatay hain.”
khudrau paudon kee tamseel
24eesa nay unhen ek aur tamseel sunaaee. “aasmaan kee baadshaahee us kisaan say mutaabiqat rakhtee hai jis nay apnay khet men achchha beej bo diya. 25lekin jab log so rahay thay to us kay dushman nay a kar anaaj kay paudon kay darmiyaan khudrau paudon ka beej bo diya. phir vah chala gaya. 26jab anaaj phoot nikla aur fasal paknay lagee to khudrau pauday bhee nazar aaay. 27naukar maalik kay paas aaay aur kahenay lagay, ‘janaab, kya aap nay apnay khet men achchha beej naheen boya tha? to phir yah khudrau pauday kahaan say a gaay hain?’
28us nay javaab diya, ‘kisee dushman nay yah kar diya hai.’
naukron nay poochha, ‘kya ham ja kar unhen ukhaaden?’
29‘naheen,’ us nay kaha. ‘aisa na ho ki khudrau paudon kay saath saath tum anaaj kay pauday bhee ukhaad daalo. 30unhen fasal kee kataaee tak mil kar badhnay do. us vaqt main fasal kee kataaee karnay vaalon say kahoonga ki pahelay khudrau paudon ko chun lo aur unhen jalaanay kay liyay gathon men baandh lo. phir hee anaaj ko jama karkay godaam men laao’.”
raaee kay daanay kee tamseel
31eesa nay unhen ek aur tamseel sunaaee. “aasmaan kee baadshaahee raaee kay daanay kee maanind hai jo kisee nay lay kar apnay khet men bo diya. 32go yah beejon men sab say chhota daana hai, lekin badhtay badhtay yah sabziyon men sab say bada ho jaata hai. balki yah darakht sa ban jaata hai aur parinday a kar us kee shaakhon men ghonslay bana letay hain.”
khameer kee tamseel
33us nay unhen ek aur tamseel bhee sunaaee. “aasmaan kee baadshaahee khameer kee maanind hai jo kisee aurat nay lay kar taqreeban 27 kilograam aatay men mila diya. go vah us men chhup gaya to bhee hotay hotay pooray gundhay huay aatay ko khameer bana diya.”
tamseelon men baat karnay ka sabab
34eesa nay yah tamaam baaten hujoom kay saamnay tamseelon kee soorat men keen. tamseel kay baghair us nay un say baat hee naheen kee. 35yoon nabee kee yah peshgoee pooree huee ki “main tamseelon men baat karoonga, main duniya kee takhleeq say lay kar aaj tak chhupee huee baaten bayaan karoonga.”
khudrau paudon kee tamseel ka matlab
36phir eesa hujoom ko rukhsat karkay ghar kay andar chala gaya. us kay shaagird us kay paas a kar kahenay lagay, “khet men khudrau paudon kee tamseel ka matlab hamen samjhaaen.”
37us nay javaab diya, “achchha beej bonay vaala ibn-ay-aadam hai. 38khet duniya hai jabki achchhay beej say muraad baadshaahee kay farzand hain. khudrau pauday iblees kay farzand hain 39aur unhen bonay vaala dushman iblees hai. fasal kee kataaee ka matlab duniya ka ikhtitaam hai jabki fasal kee kataaee karnay vaalay farishtay hain. 40jis tarah tamseel men khudrau pauday ukhaaday jaatay aur aag men jalaaay jaatay hain usee tarah duniya kay ikhtitaam par bhee kiya jaaega. 41ibn-ay-aadam apnay farishton ko bhej dega, aur vah us kee baadshaahee say bargashtagee ka har sabab aur shareeat kee khilaafvarzee karnay vaalay har shakhs ko nikaaltay jaaengay. 42vah unhen bhadaktee bhattee men phaink dengay jahaan log rotay aur daant peestay rahengay. 43phir raastbaaz apnay baap kee baadshaahee men sooraj kee tarah chamkengay. jo sun sakta hai vah sun lay!
chhupay huay khazaanay kee tamseel
44aasmaan kee baadshaahee khet men chhupay khazaanay kee maanind hai. jab kisee aadmee ko us kay baaray men maaloom hua to us nay usay dubaara chhupa diya. phir vah khushee kay maaray chala gaya, apnee tamaam milkiyat farokht kar dee aur us khet ko khareed liya.
motee kee tamseel
45neez, aasmaan kee baadshaahee aisay saudaagar kee maanind hai jo achchhay motiyon kee talaash men tha. 46jab usay ek nihaayat qeemtee motee kay baaray men maaloom hua to vah chala gaya, apnee tamaam milkiyat farokht kar dee aur us motee ko khareed liya.
jaal kee tamseel
47aasmaan kee baadshaahee jaal kee maanind bhee hai. usay jheel men daala gaya to har qism kee machhliyaan pakdee gaeen. 48jab vah bhar gaya to machheron nay usay kinaaray par khainch liya. phir unhon nay baith kar qaabil-ay-istemaal machhliyaan chun kar tokriyon men daal deen aur naaqaabil-ay-istemaal machhliyaan phaink deen. 49duniya kay ikhtitaam par aisa hee hoga. farishtay aaengay aur buray logon ko raastbaazon say alag karke 50unhen bhadaktee bhattee men phaink dengay jahaan log rotay aur daant peestay rahengay.”
naee aur puraanee sachchaaiyaan
51eesa nay poochha, “kya tum ko in tamaam baaton kee samajh a gaee hai?”
“jee,” shaagirdon nay javaab diya.
52us nay un say kaha, “is liyay shareeat ka har aalim jo aasmaan kee baadshaahee men shaagird ban gaya hai aisay maalik-ay-makaan kee maanind hai jo apnay khazaanay say naay aur puraanay javaahir nikaalta hai.”
eesa ko naasrat men radd kiya jaata hai
53yah tamseelen sunaanay kay baad eesa vahaan say chala gaya. 54apnay vatnee shaher naasrat pahunch kar vah ibaadatkhaanay men logon ko taaleem denay laga. us kee baaten sun kar vah hairatzada huay. unhon nay poochha, “usay yah hikmat aur mojizay karnay kee yah qudrat kahaan say haasil huee hai? 55kya yah badhaee ka beta naheen hai? kya us kee maan ka naam mariyam naheen hai, aur kya us kay bhaaee yaaqoob, yoosuf, shamaaoon aur yahooda naheen hain? 56kya us kee bahenen hamaaray saath naheen raheteen? to phir usay yah sab kuchh kahaan say mil gaya?” 57yoon vah us say thokar kha kar usay qabool karnay say qaasir rahay.
eesa nay un say kaha, “nabee kee izzat har jagah kee jaatee hai siva-ay-us kay vatnee shaher aur us kay apnay khaandaan kay.” 58aur un kay eemaan kee kamee kay baais us nay vahaan ziyaada mojizay na kie