Mattee 12
sabat kay baaray men savaal
1un dinon men eesa anaaj kay kheton men say guzar raha tha. sabat ka din tha. chaltay chaltay us kay shaagirdon ko bhook lagee aur vah anaaj kee baalen tod tod kar khaanay lagay. 2yah dekh kar fareesiyon nay eesa say shikaayat kee, “dekho, aap kay shaagird aisa kaam kar rahay hain jo sabat kay din mana hai.”
3eesa nay javaab diya, “kya tum nay naheen padha ki daaood nay kya kiya jab usay aur us kay saathiyon ko bhook lagee? 4vah allaah kay ghar men daakhil hua aur apnay saathiyon samet rabb kay liyay makhsoosashuda rotiyaan khaaeen, agarchi unhen is kee ijaazat naheen thee balki sirf imaamon ko? 5ya kya tum nay tauret men naheen padha ki go imaam sabat kay din bait-ul-muqaddas men khidmat kartay huay aaraam karnay ka hukm todtay hain to bhee vah beilzaam thahertay hain? 6main tumhen bataata hoon ki yahaan vah hai jo bait-ul-muqaddas say afzal hai. 7kalaam-ay-muqaddas men likha hai, ‘main qurbaanee naheen balki rahem pasand karta hoon.’ agar tum is ka matlab samajhtay to bequsooron ko mujrim na thaheraatay. 8kyoonki ibn-ay-aadam sabat ka maalik hai.”
sookhay haath vaalay aadmee kee shifaa
9vahaan say chaltay chaltay vah un kay ibaadatkhaanay men daakhil hua. 10us men ek aadmee tha jis ka haath sookha hua tha. log eesa par ilzaam lagaanay ka koee bahaana talaash kar rahay thay, is liyay unhon nay us say poochha, “kya shareeat sabat kay din shifa denay kee ijaazat detee hai?”
11eesa nay javaab diya, “agar tum men say kisee kee bhed sabat kay din gadhay men gir jaaay to kya usay naheen nikaalogay? 12aur bhed kee nisbat insaan kee kitnee ziyaada qadar-o-qeemat hai! gharaz shareeat nek kaam karnay kee ijaazat detee hai.” 13phir us nay us aadmee say jis ka haath sookha hua tha kaha, “apna haath aagay badha.”
us nay aisa kiya to us ka haath doosray haath kee maanind tandurust ho gaya. 14is par fareesee nikal kar aapas men eesa ko qatl karnay kee saazishen karnay lagay.
allaah ka chuna hua khaadim
15jab eesa nay yah jaan liya to vah vahaan say chala gaya. bahut say log us kay peechhay chal rahay thay. us nay un kay tamaam mareezon ko shifa day kar 16unhen taakeed kee, “kisee ko meray baaray men na bataao.” 17yoon yasaayaah nabee kee yah peshgoee pooree huee,
18‘dekho, mera khaadim jisay main nay chun liya hai,
mera piyaara jo mujhay pasand hai.
main apnay rooh ko us par daaloonga,
aur vah aqvaam men insaaf ka elaan karega.
19vah na to jhagdega, na chillaaega.
galiyon men us kee aavaaz sunaaee naheen degee.
20na vah kuchlay huay sarkanday ko todega,
na bujhtee huee battee ko bujhaaegaa
jab tak vah insaaf ko ghalba na bakhshay.
21usee kay naam say qaumen ummeed rakhengee.’
eesa aur badroohon ka sardaar
22phir ek aadmee ko eesa kay paas laaya gaya jo badruh kee girift men tha. vah andha aur goonga tha. eesa nay usay shifa dee to goonga bolnay aur dekhnay laga. 23hujoom kay tamaam log hakka-bakka rah gaay aur poochhnay lagay, “kya yah ibn-ay-daaood naheen?”
24lekin jab fareesiyon nay yah suna to unhon nay kaha, “yah sirf badroohon kay sardaar baal-zabool kee maarifat badroohon ko nikaalta hai.”
25un kay yah khayaalaat jaan kar eesa nay un say kaha, “jis baadshaahee men phoot pad jaaay vah tabaah ho jaaegee. aur jis shaher ya gharaanay kee aisee haalat ho vah bhee qaaim naheen rah sakta. 26isee tarah agar iblees apnay aap ko nikaalay to phir us men phoot pad gaee hai. is soorat men us kee baadshaahee kis tarah qaaim rah saktee hai? 27aur agar main badroohon ko baal-zabool kee madad say nikaalta hoon to tumhaaray betay unhen kis kay zareeay nikaaltay hain? chunaanchay vahee is baat men tumhaaray munsif hongay. 28lekin agar main allaah kay rooh kee maarifat badroohon ko nikaal deta hoon to phir allaah kee baadshaahee tumhaaray paas pahunch chukee hai.
29kisee zoraavar aadmee kay ghar men ghus kar us ka maal-o-asbaab lootna kis tarah mumkin hai jab tak ki usay baandha na jaaay? phir hee usay loota ja sakta hai.
30jo meray saath naheen vah meray khilaaf hai aur jo meray saath jama naheen karta vah bikherta hai. 31gharaz main tum ko bataata hoon ki insaan ka har gunaah aur kufr muaaf kiya ja sakega siva-ay-rooh-ul-quds kay khilaaf kufr baknay kay. isay muaaf naheen kiya jaaega. 32jo ibn-ay-aadam kay khilaaf baat karay usay muaaf kiya ja sakega, lekin jo rooh-ul-quds kay khilaaf baat karay usay na is jahaan men aur na aanay vaalay jahaan men muaaf kiya jaaega.
darakht us kay phal say pahechaana jaata hai
33achchhay phal kay liyay achchhay darakht kee zaroorat hotee hai. kharaab darakht say kharaab phal milta hai. darakht us kay phal say hee pahechaana jaata hai. 34ai saamp kay bachcho! tum jo buray ho kis tarah achchhee baaten kar saktay ho? kyoonki jis cheez say dil labrez hota hai vah chhalak kar zabaan par a jaatee hai. 35achchha shakhs apnay dil kay achchhay khazaanay say achchhee cheezen nikaalta hai jabki bura shakhs apnay buray khazaanay say buree cheezen.
36main tum ko bataata hoon ki qiyaamat kay din logon ko beparvaaee say kee gaee har baat ka hisaab dena padega. 37tumhaaree apnee baaton kee bina par tum ko raast ya naaraast thaheraaya jaaega.”
ilaahee nishaan ka taqaazaa
38phir shareeat kay kuchh ulma aur fareesiyon nay eesa say baat kee, “ustaad, ham aap kee taraf say ilaahee nishaan dekhna chaahatay hain.”
39us nay javaab diya, “sirf shareer aur zinaakaar nasal ilaahee nishaan ka taqaaza kartee hai. lekin usay koee bhee ilaahee nishaan pesh naheen kiya jaaega siva-ay-yoonus nabee kay nishaan kay. 40kyoonki jis tarah yoonus teen din aur teen raat machhlee kay pet men raha usee tarah ibn-ay-aadam bhee teen din aur teen raat zameen kee god men pada rahega. 41qiyaamat kay din neenva kay baashinday is nasal kay saath khaday ho kar isay mujrim thaheraaengay. kyoonki yoonus kay elaan par unhon nay tauba kee thee jabki yahaan vah hai jo yoonus say bhee bada hai. 42us din junoobee mulk saba kee malika bhee is nasal kay saath khadee ho kar isay mujrim qaraar degee. kyoonki vah doordaraaz mulk say sulaimaan kee hikmat sunnay kay liyay aaee thee jabki yahaan vah hai jo sulaimaan say bhee bada hai.
badruh kee vaapsee
43jab koee badruh kisee shakhs say nikaltee hai to vah veeraan ilaaqon men say guzartee huee aaraam kee jagah talaash kartee hai. lekin jab usay koee aisa maqaam naheen miltaa 44to vah kahetee hai, ‘main apnay us ghar men vaapas chalee jaaoongee jis men say niklee thee.’ vah vaapas a kar dekhtee hai ki ghar khaalee hai aur kisee nay jhaadoo day kar sab kuchh saleeqay say rakh diya hai. 45phir vah ja kar saat aur badruhen dhoond laatee hai jo us say badtar hotee hain, aur vah sab us shakhs men ghus kar rahenay lagtee hain. chunaanchay ab us aadmee kee haalat pahelay kee nisbat ziyaada buree ho jaatee hai. is shareer nasal ka bhee yahee haal hoga.”
eesa kee maan aur bhaaee
46eesa abhee hujoom say baat kar hee raha tha ki us kee maan aur bhaaee baahar khaday us say baat karnay kee koshish karnay lagay. 47kisee nay eesa say kaha, “aap kee maan aur bhaaee baahar khaday hain aur aap say baat karna chaahatay hain.”
48eesa nay poochha, “kaun hai meree maan aur kaun hain meray bhaaee?” 49phir apnay haath say shaagirdon kee taraf ishaara karkay us nay kaha, “dekho, yah meree maan aur meray bhaaee hain. 50kyoonki jo bhee meray aasmaanee baap kee marzee pooree karta hai vah mera bhaaee, meree bahen aur meree maan hai.”