Mattee 11

yaheya ka eesa say savaal

¹apnay shaagirdon ko yah hidaayaat denay kay baad eesa un kay shaheron men taaleem denay aur munaadee karnay kay liyay ravaana hua.

²yaheya nay jo us vaqt jel men tha suna ki eesa kya kya kar raha hai. is par us nay apnay shaagirdon ko us kay paas bhej diyaa ³taaki vah us say poochhen, “kya aap vahee hain jisay aana hai ya ham kisee aur kay intizaar men rahen?”

⁴eesa nay javaab diya, “yaheya kay paas vaapas ja kar usay sab kuchh bata dena jo tum nay dekha aur suna hai. ⁵‘andhay dekhtay, langday chaltay phirtay hain, kodhiyon ko paak-saaf kiya jaata hai, baheray suntay hain, murdon ko zinda kiya jaata hai aur ghareebon ko allaah kee khushkhabaree sunaaee jaatee hai.’ ⁶mubaarak hai vah jo meray sabab say thokar kha kar bargashta naheen hota.”

⁷yaheya kay yah shaagird chalay gaay to eesa hujoom say yaheya kay baaray men baat karnay laga, “tum registaan men kya dekhnay gaay thay? ek sarkanda jo hava kay har jhonkay say hilta hai? beshak naheen. ⁸ya kya vahaan ja kar aisay aadmee kee tavaqqo kar rahay thay jo nafees aur mulaaim libaas pahenay huay hai? naheen, jo shaandaar kapday pahentay hain vah shaahee mahelon men paaay jaatay hain. ⁹to phir tum kya dekhnay gaay thay? ek nabee ko? bilkul saheeh, balki men tum ko bataata hoon ki vah nabee say bhee bada hai. ¹⁰usee kay baaray men kalaam-ay-muqaddas men likha hai, ‘dekh, main apnay paighambar ko teray aagay aagay bhej deta hoon jo teray saamnay raasta tayyaar karega.’ ¹¹main tum ko sachch bataata hoon ki is duniya men paida honay vaala koee bhee shakhs yaheya say bada naheen hai. to bhee aasmaan kee baadshaahee men daakhil honay vaala sab say chhota shakhs us say bada hai. ¹²yaheya baptisma denay vaalay kee khidmat say lay kar aaj tak aasmaan kee baadshaahee par zabardastee kee ja rahee hai, aur zabardast usay chheen rahay hain. ¹³kyoonki tamaam nabee aur tauret nay yaheya kay daur tak is kay baaray men peshgoee kee hai. ¹⁴aur agar tum yah maannay kay liyay tayyaar ho to maano ki vah ilyaas nabee hai jisay aana tha. ¹⁵jo sun sakta hai vah sun lay!

¹⁶main is nasal ko kis say tashbeeh doon? vah un bachchon kee maanind hain jo baazaar men baithay khel rahay hain. un men say kuchh oonchee aavaaz say doosray bachchon say shikaayat kar rahay hain, ¹⁷‘ham nay baansree bajaaee to tum na naachay. phir ham nay noha kay geet gaaay, lekin tum nay chhaatee peet kar maatam na kiya.’ ¹⁸dekho, yaheya aaya aur na khaaya, na piya. yah dekh kar log kahetay hain ki us men badruh hai. ¹⁹phir ibn-ay-aadam khaata aur peeta hua aaya. ab kahetay hain, ‘dekho yah kaisa petoo aur sharaabee hai. aur vah taiks lenay vaalon aur gunaahgaaron ka dost bhee hai.’ lekin hikmat apnay aamaal say hee saheeh saabit huee hai.”

tauba na karnay vaalay shaheron par afsos

²⁰phir eesa un shaheron ko daantnay laga jin men us nay ziyaada mojizay kiay thay, kyoonki unhon nay tauba naheen kee thee. ²¹“ai khuraazeen, tujh par afsos! bait-saida, tujh par afsos! agar soor aur saida men vah mojizay kiay gaay hotay jo tum men huay to vahaan kay log kab kay taat odh kar aur sar par raakh daal kar tauba kar chukay hotay. ²²jee haan, adaalat kay din tumhaaree nisbat soor aur saida ka haal ziyaada qaabil-ay-bardaasht hoga. ²³aur ai kafarnahoom, kya tujhay aasmaan tak sarfaraaz kiya jaaega? hargiz naheen, balki too utarta utarta paataal tak pahunchega. agar sadoom men vah mojizay kiay gaay hotay jo tujh men huay hain to vah aaj tak qaaim raheta. ²⁴haan, adaalat kay din teree nisbat sadoom ka haal ziyaada qaabil-ay-bardaasht hoga.”

baap kee tamjeed

²⁵us vaqt eesa nay kaha, “ai baap, aasmaan-o-zameen kay maalik! main teree tamjeed karta hoon ki too nay yah baaten daanaaon aur aqalmandon say chhupa kar chhotay bachchon par zaahir kar dee hain. ²⁶haan meray baap, yahee tujhay pasand aaya.

²⁷meray baap nay sab kuchh meray sapurd kar diya hai. koee bhee farzand ko naheen jaanta siva-ay-baap kay. aur koee baap ko naheen jaanta siva-ay-farzand kay aur un logon kay jin par farzand baap ko zaahir karna chaahata hai.

²⁸ai thakemaanday aur bojh talay dabay huay logo, sab meray paas aao! main tum ko aaraam doonga. ²⁹mera jooa apnay oopar utha kar mujh say seekho, kyoonki main haleem aur narmdil hoon. yoon karnay say tumhaaree jaanen aaraam paaengee, ³⁰kyoonki mera jooa mulaaim aur mera bojh halka hai.”