Mattee 10
baarah rasoolon ko ikhtiyaar diya jaata hai
1phir eesa nay apnay baarah rasoolon ko bula kar unhen naapaak roohen nikaalnay aur har qism kay marz aur alaalat say shifa denay ka ikhtiyaar diya. 2baarah rasoolon kay naam yah hain : pahela shamaaoon jo patras bhee kahelaata hai, phir us ka bhaaee andriyaas, yaaqoob bin zabdee aur us ka bhaaee yoohanna, 3filippus, baratulmaaee, toma, mattee (jo taiks lenay vaala tha), yaaqoob bin halfaee, taddee, 4shamaaoon mujaahid aur yahooda iskariyotee jis nay baad men usay dushmanon kay havaalay kar diya.
rasoolon ko tableegh kay liyay bheja jaata hai
5in baarah mardon ko eesa nay bhej diya. saath saath us nay unhen hidaayat dee, “ghairyahoodee aabaadiyon men na jaana, na kisee saamree shaher men, 6balki sirf israaeel kee khoee huee bhedon kay paas. 7aur chaltay chaltay munaadee kartay jaao ki ‘aasmaan kee baadshaahee qareeb a chukee hai.’ 8beemaaron ko shifa do, murdon ko zinda karo, kodhiyon ko paak-saaf karo, badroohon ko nikaalo. tum ko muft men mila hai, muft men hee baantna. 9apnay kamarband men paisay na rakhna - na sonay, na chaandee aur na taambay kay sikkay. 10na safar kay liyay baig ho, na ek say ziyaada soot, na jootay, na laathee. kyoonki mazdoor apnee rozee ka haqdaar hai.
11jis shaher ya gaaon men daakhil hotay ho us men kisee laaiq shakhs ka pata karo aur ravaana hotay vaqt tak usee kay ghar men thahero. 12ghar men daakhil hotay vaqt usay dua-ay-khair do. 13agar vah ghar is laaiq hoga to jo salaamatee tum nay us kay liyay maangee hai vah us par a kar thaheree rahegee. agar naheen to yah salaamatee tumhaaray paas laut aaegee. 14agar koee gharaana ya shaher tum ko qabool na karay, na tumhaaree sunay to ravaana hotay vaqt us jagah kee gard apnay paaon say jhaad dena. 15main tumhen sachch bataata hoon, adaalat kay din us shaher kee nisbat sadoom aur amoora kay ilaaqay ka haal ziyaada qaabil-ay-bardaasht hoga.
aanay vaalee eezaarasaaniyaan
16dekho, main tum bhedon ko bhediyon men bhej raha hoon. is liyay saampon kee tarah hoshyaar aur kabootaron kee tarah maasoom bano. 17logon say khabardaar raho, kyoonki vah tum ko maqaamee adaalaton kay havaalay karkay apnay ibaadatkhaanon men koday lagavaaengay. 18meree khaatir tumhen hukmaraanon aur baadshaahon kay saamnay pesh kiya jaaega aur yoon tum ko unhen aur ghairyahoodiyon ko gavaahee denay ka mauqa milega. 19jab vah tumhen giriftaar karengay to yah sochtay sochtay pareshaan na ho jaana ki main kya kahoon ya kis tarah baat karoon. us vaqt tum ko bataaya jaaega ki kya kahena hai, 20kyoonki tum khud baat naheen karogay balki tumhaaray baap ka rooh tumhaaree maarifat bolega.
21bhaaee apnay bhaaee ko aur baap apnay bachchay ko maut kay havaalay karega. bachchay apnay vaalidain kay khilaaf khaday ho kar unhen qatl karavaaengay. 22sab tum say nafrat karengay, is liyay ki tum meray pairokaar ho. lekin jo aakhir tak qaaim rahega usay najaat milegee. 23jab vah ek shaher men tumhen sataaengay to kisee doosray shaher ko hijrat kar jaana. main tum ko sachch bataata hoon ki ibn-ay-aadam kee aamad tak tum israaeel kay tamaam shaheron tak naheen pahunch paaogay.
24shaagird apnay ustaad say bada naheen hota, na ghulaam apnay maalik say. 25shaagird ko is par iktifa karna hai ki vah apnay ustaad kee maanind ho, aur isee tarah ghulaam ko ki vah apnay maalik kee maanind ho. gharaanay kay sarparast ko agar badroohon ka sardaar baal-zabool qaraar diya gaya hai to us kay ghar vaalon ko kya kuchh na kaha jaaega.
kis say darna hai?
26un say mat darna, kyoonki jo kuchh abhee chhupa hua hai usay aakhir men zaahir kiya jaaega, aur jo kuchh bhee is vaqt posheeda hai us ka raaz aakhir men khul jaaega. 27jo kuchh main tumhen andheray men suna raha hoon usay roz-ay-raushan men suna dena. aur jo kuchh aahista aahista tumhaaray kaan men bataaya gaya hai us ka chhaton say elaan karo. 28un say khauf mat khaana jo tumhaaree rooh ko naheen balki sirf tumhaaray jism ko qatl kar saktay hain. allaah say daro jo rooh aur jism donon ko jahennum men daal kar halaak kar sakta hai. 29kya chidiyon ka joda kam paison men naheen bikta? taaham un men say ek bhee tumhaaray baap kee ijaazat kay baghair zameen par naheen gir saktee. 30na sirf yah balki tumhaaray sar kay sab baal bhee ginay huay hain. 31lihaaza mat daro. tumhaaree qadar-o-qeemat bahut see chidiyon say kaheen ziyaada hai.
maseeh ka iqraar ya inkaar karnay ka nateejaa
32jo bhee logon kay saamnay mera iqraar karay us ka iqraar main khud bhee apnay aasmaanee baap kay saamnay karoonga. 33lekin jo bhee logon kay saamnay mera inkaar karay us ka main bhee apnay aasmaanee baap kay saamnay inkaar karoonga.
eesa sulah-salaamatee ka baais naheen
34yah mat samjho ki main duniya men sulah-salaamatee qaaim karnay aaya hoon. main sulah-salaamatee naheen balki talvaar chalvaanay aaya hoon. 35main betay ko us kay baap kay khilaaf khada karnay aaya hoon, betee ko us kee maan kay khilaaf aur bahoo ko us kee saas kay khilaaf. 36insaan kay dushman us kay apnay ghar vaalay hongay.
eesa aur us kay pairokaaron ko qabool karnay ka ajr
37jo apnay baap ya maan ko mujh say ziyaada piyaar karay vah meray laaiq naheen. jo apnay betay ya betee ko mujh say ziyaada piyaar karay vah meray laaiq naheen. 38jo apnee saleeb utha kar meray peechhay na ho lay vah meray laaiq naheen. 39jo bhee apnee jaan ko bachaaay vah usay kho dega, lekin jo apnee jaan ko meree khaatir kho day vah usay paaega.
eesa aur us kay pairokaaron ko qabool karnay ka ajr
40jo tumhen qabool karay vah mujhay qabool karta hai, aur jo mujhay qabool karta hai vah us ko qabool karta hai jis nay mujhay bheja hai. 41jo kisee nabee ko qabool karay usay nabee ka sa ajr milega. aur jo kisee raastbaaz shakhs ko us kee raastbaazee kay sabab say qabool karay usay raastbaaz shakhs ka sa ajr milega. 42main tum ko sachch bataata hoon ki jo in chhoton men say kisee ek ko mera shaagird honay kay baais thanday paanee ka galaas bhee pilaaay us ka ajr qaaim rahega.”