Marqus 9
1eesa nay unhen yah bhee bataaya, “main tum ko sachch bataata hoon, yahaan kuchh aisay log khaday hain jo marnay say pahelay hee allaah kee baadshaahee ko qudrat kay saath aatay huay dekhengay.”
pahaad par eesa kee soorat badal jaatee hai
2chhah din kay baad eesa sirf patras, yaaqoob aur yoohanna ko apnay saath lay kar oonchay pahaad par chadh gaya. vahaan us kee shakl-o-soorat un kay saamnay badal gaee. 3us kay kapday chamaknay lagay aur nihaayat safed ho gaay. duniya men koee bhee dhobee kapday itnay safed naheen kar sakta. 4phir ilyaas aur moosa zaahir huay aur eesa say baat karnay lagay. 5patras bol utha, “ustaad, kitnee achchhee baat hai ki ham yahaan hain. aaen, ham teen jhompadiyaan banaaen, ek aap kay liyay, ek moosa kay liyay aur ek ilyaas kay liyay.” 6us nay yah is liyay kaha ki teenon shaagird sahemay huay thay aur vah naheen jaanta tha ki kya kahay.
7is par ek baadal a kar un par chha gaya aur baadal men say ek aavaaz sunaaee dee, “yah mera piyaara farzand hai. is kee suno.” 8achaanak moosa aur ilyaas ghaaib ho gaay. shaagirdon nay chaaron taraf dekha, lekin sirf eesa nazar aaya.
9vah pahaad say utarnay lagay to eesa nay unhen hukm diya, “jo kuchh tum nay dekha hai usay us vaqt tak kisee ko na bataana jab tak ki ibn-ay-aadam murdon men say jee na uthay.”
10chunaanchay unhon nay yah baat apnay tak mahdood rakhee. lekin vah kaee baar aapas men bahs karnay lagay ki murdon men say jee uthnay say kya muraad ho saktee hai. 11phir unhon nay us say poochha, “shareeat kay ulma kyoon kahetay hain ki maseeh kee aamad say pahelay ilyaas ka aana zarooree hai?”
12eesa nay javaab diya, “ilyaas to zaroor pahelay sab kuchh bahaal karnay kay liyay aaega. lekin kalaam-ay-muqaddas men ibn-ay-aadam kay baaray men yah kyoon likha hai ki usay bahut dukh uthaana aur haqeer samjha jaana hai? 13lekin main tum ko bataata hoon, ilyaas to a chuka hai aur unhon nay us kay saath jo chaaha kiya. yah bhee kalaam-ay-muqaddas kay mutaabiq hee hua hai.”
eesa ladkay men say badruh nikaalta hai
14jab vah baaqee shaagirdon kay paas vaapas pahunchay to unhon nay dekha ki un kay gird ek bada hujoom jama hai aur shareeat kay kuchh ulma un kay saath bahs kar rahay hain. 15eesa ko dekhtay hee logon nay badee bechainee say us kee taraf daud kar usay salaam kiya. 16us nay shaagirdon say savaal kiya, “tum un kay saath kis kay baaray men bahs kar rahay ho?”
17hujoom men say ek aadmee nay javaab diya, “ustaad, main apnay betay ko aap kay paas laaya tha. vah aisee badruh kay qabzay men hai jo usay bolnay naheen detee. 18aur jab bhee vah us par ghaalib aatee hai vah usay zameen par patak detee hai. betay kay munh say jhaag nikalnay lagta aur vah daant peesnay lagta hai. phir us ka jism akad jaata hai. main nay aap kay shaagirdon say kaha to tha ki vah badruh ko nikaal den, lekin vah na nikaal sakay.”
19eesa nay un say kaha, “eemaan say khaalee nasal! main kab tak tumhaaray saath rahoon, kab tak tumhen bardaasht karoon? ladkay ko meray paas lay aao.” 20vah usay eesa kay paas lay aaay.
eesa ko dekhtay hee badruh ladkay ko jhanjhodnay lagee. vah zameen par gir gaya aur idhar udhar ludhaktay huay munh say jhaag nikaalnay laga. 21eesa nay baap say poochha, “is kay saath kab say aisa ho raha hai?”
us nay javaab diya, “bachpan say. 22bahut dafa us nay isay halaak karnay kee khaatir aag ya paanee men giraaya hai. agar aap kuchh kar saktay hain to taras kha kar hamaaree madad karen.”
23eesa nay poochha, “kya matlab, ‘agar aap kuchh kar saktay hain’? jo eemaan rakhta hai us kay liyay sab kuchh mumkin hai.”
24ladkay ka baap fauran chilla utha, “main eemaan rakhta hoon. meree bay-etiqaadee ka ilaaj karen.”
25eesa nay dekha ki bahut say log daud daud kar dekhnay a rahay hain, is liyay us nay naapaak rooh ko daanta, “ai goongee aur baheree badruh, main tujhay hukm deta hoon ki is men say nikal ja. kabhee bhee is men dubaara daakhil na hona!”
26is par badruh cheekh uthee aur ladkay ko shiddat say jhanjhod kar nikal gaee. ladka laash kee tarah zameen par pada raha, is liyay sab nay kaha, “vah mar gaya hai.” 27lekin eesa nay us ka haath pakad kar uthnay men us kee madad kee aur vah khada ho gaya.
28baad men jab eesa kisee ghar men ja kar apnay shaagirdon kay saath akela tha to unhon nay us say poochha, “ham badruh ko kyoon na nikaal sakay?”
29us nay javaab diya, “is qism kee badruh sirf dua say nikaalee ja saktee hai.”
eesa doosree dafa apnee maut ka zikr karta hai
30vahaan say nikal kar vah galeel men say guzray. eesa naheen chaahata tha ki kisee ko pata chalay ki vah kahaan hai, 31kyoonki vah apnay shaagirdon ko taaleem day raha tha. us nay un say kaha, “ibn-ay-aadam ko aadmiyon kay havaalay kar diya jaaega. vah usay qatl karengay, lekin teen din kay baad vah jee uthega.”
32lekin shaagird is ka matlab na samjhay aur vah eesa say is kay baaray men poochhnay say dartay bhee thay.
kaun sab say bada hai?
33chaltay chaltay vah kafarnahoom pahunchay. jab vah kisee ghar men thay to eesa nay shaagirdon say savaal kiya, “raastay men tum kis baat par bahs kar rahay thay?”
34lekin vah khaamosh rahay, kyoonki vah raastay men is par bahs kar rahay thay ki ham men say bada kaun hai? 35eesa baith gaya aur baarah shaagirdon ko bula kar kaha, “jo avval hona chaahata hai vah sab say aakhir men aaay aur sab ka khaadim ho.” 36phir us nay ek chhotay bachchay ko lay kar un kay darmiyaan khada kiya. usay galay laga kar us nay un say kaha, 37“jo meray naam men in bachchon men say kisee ko qabool karta hai vah mujhay hee qabool karta hai. aur jo mujhay qabool karta hai vah mujhay naheen balki usay qabool karta hai jis nay mujhay bheja hai.”
jo hamaaray khilaaf naheen vah hamaaray haq men hai
38yoohanna bol utha, “ustaad, ham nay ek shakhs ko dekha jo aap ka naam lay kar badruhen nikaal raha tha. ham nay usay mana kiya, kyoonki vah hamaaree pairvee naheen karta.”
39lekin eesa nay kaha, “usay mana na karna. jo bhee meray naam men mojiza karay vah aglay lamhay meray baaray men buree baaten naheen kah sakega. 40kyoonki jo hamaaray khilaaf naheen vah hamaaray haq men hai. 41main tum ko sachch bataata hoon, jo bhee tumhen is vajah say paanee ka galaas pilaaay ki tum maseeh kay pairokaar ho usay zaroor ajr milega.
aazmaaishen
42aur jo koee mujh par eemaan rakhnay vaalay in chhoton men say kisee ko gunaah karnay par uksaaay us kay liyay behatar hai ki us kay galay men badee chakkee ka paat baandh kar usay samundar men phaink diya jaaay. 43-44 agar tera haath tujhay gunaah karnay par uksaaay to usay kaat daalna. is say pahelay ki too do haathon samet jahennum kee kabhee na bujhnay vaalee aag men chala jaaay [yaanee vahaan jahaan logon ko khaanay vaalay keeday kabhee naheen martay aur aag kabhee naheen bujhtee] behatar yah hai ki too ek haath say maheroom ho kar abdee zindagee men daakhil ho. 45-46 agar tera paaon tujhay gunaah karnay par uksaaay to usay kaat daalna. is say pahelay ki tujhay do paaon samet jahennum men phainka jaaay [jahaan logon ko khaanay vaalay keeday kabhee naheen martay aur aag kabhee naheen bujhtee] behatar yah hai ki too ek paaon say maheroom ho kar abdee zindagee men daakhil ho. 47-48 aur agar teree aankh tujhay gunaah karnay par uksaaay to usay nikaal dena. is say pahelay ki tujhay do aankhon samet jahennum men phainka jaaay [jahaan logon ko khaanay vaalay keeday kabhee naheen martay aur aag kabhee naheen bujhtee] behatar yah hai ki too ek aankh say maheroom ho kar allaah kee baadshaahee men daakhil ho.
49kyoonki har ek ko aag say namkeen kiya jaaega [aur har ek qurbaanee namak say namkeen kee jaaegee].
50namak achchhee cheez hai. lekin agar us ka zaaiqa jaata rahay to usay kyoonkar dubaara namkeen kiya ja sakta hai? apnay darmiyaan namak kee khoobiyaan barqaraar rakho aur sulah-salaamatee say ek doosray kay saath zindagee guzaaro.”