Marqus 8
eesa 4000 afraad ko khaana khilaata hai
1un dinon men ek aur martaba aisa hua ki bahut say log jama huay jin kay paas khaanay ka band-o-bast naheen tha. chunaanchay eesa nay apnay shaagirdon ko bula kar un say kaha, 2“mujhay in logon par taras aata hai. inhen meray saath thaheray teen din ho chukay hain aur in kay paas khaanay kee koee cheez naheen hai. 3lekin agar main inhen rukhsat kar doon aur vah is bhookee haalat men apnay apnay ghar chalay jaaen to vah raastay men thak kar choor ho jaaengay. aur in men say kaee doordaraaz say aaay hain.”
4us kay shaagirdon nay javaab diya, “is veeraan ilaaqay men kahaan say itna khaana mil sakega ki yah kha kar ser ho jaaen?”
5eesa nay poochha, “tumhaaray paas kitnee rotiyaan hain?”
unhon nay javaab diya, “saat.”
6eesa nay hujoom ko zameen par baithnay ko kaha. phir saat rotiyon ko lay kar us nay shukrguzaaree kee dua kee aur unhen tod tod kar apnay shaagirdon ko taqseem karnay kay liyay day diya. 7un kay paas do chaar chhotee machhliyaan bhee theen. eesa nay un par bhee shukrguzaaree kee dua kee aur shaagirdon ko unhen baantnay ko kaha. 8logon nay jee bhar kar khaaya. baad men jab khaanay kay bachay huay tukday jama kiay gaay to saat baday tokray bhar gaay. 9taqreeban 4,000 aadmee haazir thay. khaanay kay baad eesa nay unhen rukhsat kar diyaa 10aur fauran kashtee par savaar ho kar apnay shaagirdon kay saath dalmanoota kay ilaaqay men pahunch gaya.
fareesee ilaahee nishaan talab kartay hain
11is par fareesee nikal kar eesa kay paas aaay aur us say bahs karnay lagay. usay aazmaanay kay liyay unhon nay mutaalba kiya ki vah unhen aasmaan kee taraf say koee ilaahee nishaan dikhaaay taaki us ka ikhtiyaar saabit ho jaaay. 12lekin us nay thandee aah bhar kar kaha, “yah nasal kyoon ilaahee nishaan ka mutaalba kartee hai? main tum ko sachch bataata hoon ki isay koee nishaan naheen diya jaaega.”
13aur unhen chhod kar vah dubaara kashtee men baith gaya aur jheel ko paar karnay laga.
fareesiyon aur herodes ka khameer
14lekin shaagird apnay saath khaana laana bhool gaay thay. kashtee men un kay paas sirf ek rotee thee. 15eesa nay unhen hidaayat kee, “khabardaar, fareesiyon aur herodes kay khameer say hoshyaar rahena.”
16shaagird aapas men bahs karnay lagay, “vah is liyay kah rahay hongay ki hamaaray paas rotee naheen hai.”
17eesa ko maaloom hua ki vah kya soch rahay hain. us nay kaha, “tum aapas men kyoon bahs kar rahay ho ki hamaaray paas rotee naheen hai? kya tum ab tak na jaantay, na samajhtay ho? kya tumhaaray dil itnay behiss ho gaay hain? 18tumhaaree aankhen to hain, kya tum dekh naheen saktay? tumhaaray kaan to hain, kya tum sun naheen saktay? aur kya tumhen yaad naheen 19jab main nay 5,000 aadmiyon ko paanch rotiyon say ser kar diya to tum nay bachay huay tukdon kay kitnay tokray uthaaay thay?”
unhon nay javaab diya, “baarah”.
20“aur jab main nay 4,000 aadmiyon ko saat rotiyon say ser kar diya to tum nay bachay huay tukdon kay kitnay tokray uthaaay thay?”
unhon nay javaab diya, “saat.” 21us nay poochha, “kya tum abhee tak naheen samajhtay?”
bait-saida men andhay kee shifaa
22vah bait-saida pahunchay to log eesa kay paas ek andhay aadmee ko laaay. unhon nay iltimaas kee ki vah usay chhuay. 23eesa andhay ka haath pakad kar usay gaaon say baahar lay gaya. vahaan us nay us kee aankhon par thook kar apnay haath us par rakh diay aur poochha, “kya too kuchh dekh sakta hai?”
24aadmee nay nazar utha kar kaha, “haan, main logon ko dekh sakta hoon. vah phirtay huay darakhton kee maanind dikhaaee day rahay hain.”
25eesa nay dubaara apnay haath us kee aankhon par rakhay. is par aadmee kee aankhen pooray taur par khul gaeen, us kee nazar bahaal ho gaee aur vah sab kuchh saaf saaf dekh sakta tha. 26eesa nay usay rukhsat karkay kaha, “is gaaon men vaapas na jaana balki seedha apnay ghar chala ja.”
patras ka iqraar
27phir eesa vahaan say nikal kar apnay shaagirdon kay saath qaisriya-filippee kay qareeb kay deehaaton men gaya. chaltay chaltay us nay un say poochha, “main logon kay nazdeek kaun hoon?”
28unhon nay javaab diya, “kuchh kahetay hain yaheya baptisma denay vaala, kuchh yah ki aap ilyaas nabee hain. kuchh yah bhee kahetay hain ki nabiyon men say ek.”
29us nay poochha, “lekin tum kya kahetay ho? tumhaaray nazdeek main kaun hoon?”
patras nay javaab diya, “aap maseeh hain.”
30yah sun kar eesa nay unhen kisee ko bhee yah baat bataanay say mana kiya.
eesa apnee maut ka zikr karta hai
31phir eesa unhen taaleem denay laga, “laazim hai ki ibn-ay-aadam bahut dukh utha kar buzurgon, raahanuma imaamon aur shareeat kay ulma say radd kiya jaaay. usay qatl bhee kiya jaaega, lekin vah teesray din jee uthega.” 32us nay unhen yah baat saaf saaf bataaee. is par patras usay ek taraf lay ja kar samjhaanay laga. 33eesa mud kar shaagirdon kee taraf dekhnay laga. us nay patras ko daanta, “shaitaan, meray saamnay say hat ja! too allaah kee soch naheen rakhta balki insaan kee.”
34phir us nay shaagirdon kay ilaava hujoom ko bhee apnay paas bulaaya. us nay kaha, “jo meray peechhay aana chaahay vah apnay aap ka inkaar karay aur apnee saleeb utha kar meray peechhay ho lay. 35kyoonki jo apnee jaan ko bachaaay rakhna chaahay vah usay kho dega. lekin jo meree aur allaah kee khushkhabaree kee khaatir apnee jaan kho day vahee usay bachaaega. 36kya faaida hai agar kisee ko pooree duniya haasil ho jaaay, lekin vah apnee jaan say maheroom ho jaaay? 37insaan apnee jaan kay badlay kya day sakta hai? 38jo bhee is zinaakaar aur gunaah’aalooda nasal kay saamnay meray aur meree baaton kay sabab say sharmaaay us say ibn-ay-aadam bhee us vaqt sharamaaega jab vah apnay baap kay jalaal men muqaddas farishton kay saath aaega.”