Marqus 7
baapdaada kee taaleem
1ek din fareesee aur shareeat kay kuchh aalim yarooshalam say eesa say milnay aaay. 2jab vah vahaan thay to unhon nay dekha ki us kay kuchh shaagird apnay haath paak-saaf kiay baghair yaanee dhoay baghair khaana kha rahay hain.
3(kyoonki yahoodee aur khaaskar fareesee firqay kay log is muaamalay men apnay baapdaada kee rivaayat ko maantay hain. vah apnay haath achchhee tarah dhoay baghair khaana naheen khaatay. 4isee tarah jab vah kabhee baazaar say aatay hain to vah ghusal karkay hee khaana khaatay hain. vah bahut see aur rivaayaton par bhee amal kartay hain, maslan kap, jag aur ketlee ko dho kar paak-saaf karnay kee rasm par.)
5chunaanchay fareesiyon aur shareeat kay aalimon nay eesa say poochha, “aap kay shaagird baapdaada kee rivaayaton kay mutaabiq zindagee kyoon naheen guzaartay balki rotee bhee haath paak-saaf kiay baghair khaatay hain?”
6eesa nay javaab diya, “yasaayaah nabee nay tum riyaakaaron kay baaray men theek kaha jab us nay yah nubuvvat kee,
‘yah qaum apnay honton say to mera ehatiraam kartee hai
lekin us ka dil mujh say door hai.
7vah meree parastish kartay to hain, lekin befaaida.
kyoonki vah sirf insaan hee kay ahkaam sikhaatay hain.’
8tum allaah kay ahkaam ko chhod kar insaanee rivaayaat kee pairvee kartay ho.”
9eesa nay apnee baat jaaree rakhee, “tum kitnay saleeqay say allaah ka hukm mansookh kartay ho taaki apnee rivaayaat ko qaaim rakh sako. 10maslan moosa nay farmaaya, ‘apnay baap aur apnee maan kee izzat karna’ aur ‘jo apnay baap ya maan par laanat karay usay saza-ay-maut dee jaaay.’ 11lekin jab koee apnay vaalidain say kahay, ‘main aap kee madad naheen kar sakta, kyoonki main nay mannat maanee hai ki jo mujhay aap ko dena tha vah allaah kay liyay qurbaanee hai’ to tum isay jaaiz qaraar detay ho. 12yoon tum usay apnay maan-baap kee madad karnay say rok letay ho. 13aur isee tarah tum allaah kay kalaam ko apnee us rivaayat say mansookh kar letay ho jo tum nay nasal-dar-nasal muntaqil kee hai. tum is qism kee bahut see harkaten kartay ho.”
kya kuchh insaan ko naapaak kar deta hai?
14phir eesa nay dubaara hujoom ko apnay paas bulaaya aur kaha, “sab meree baat suno aur isay samajhnay kee koshish karo. 15koee aisee cheez hai naheen jo insaan men daakhil ho kar usay naapaak kar sakay, balki jo kuchh insaan kay andar say nikalta hai vahee usay naapaak kar deta hai.” 16[agar koee sun sakta hai to vah sun lay.]
17phir vah hujoom ko chhod kar kisee ghar men daakhil hua. vahaan us kay shaagirdon nay poochha, “is tamseel ka kya matlab hai?”
18us nay kaha, “kya tum bhee itnay naasamajh ho? kya tum naheen samajhtay ki jo kuchh baahar say insaan men daakhil hota hai vah usay naapaak naheen kar sakta? 19vah to us kay dil men naheen jaata balki us kay meday men aur vahaan say nikal kar ja-ay-zaroorat men.” (yah kah kar eesa nay har qism ka khaana paak-saaf qaraar diya.)
20us nay yah bhee kaha, “jo kuchh insaan kay andar say nikalta hai vahee usay naapaak karta hai. 21kyoonki logon kay andar say, un kay dilon hee say buray khayaalaat, haraamkaaree, choree, qatl-o-ghaarat, 22zinaakaaree, laalach, badkaaree, dhoka, shahevatparastee, hasad, buhtaan, gharoor aur hamaaqat nikaltay hain. 23yah tamaam buraaiyaan andar hee say nikal kar insaan ko naapaak kar detee hain.”
ghairyahoodee aurat ka eemaan
24phir eesa galeel say ravaana ho kar shimaal men soor kay ilaaqay men aaya. vahaan vah kisee ghar men daakhil hua. vah naheen chaahata tha ki kisee ko pata chalay, lekin vah posheeda na rah saka. 25fauran ek aurat us kay paas aaee jis nay us kay baaray men sun rakha tha. vah us kay paaon men gir gaee. us kee chhotee betee kisee naapaak rooh kay qabzay men thee, 26aur us nay eesa say guzaarish kee, “badruh ko meree betee men say nikaal den.” lekin vah aurat yoonaanee thee aur soorufeneekay kay ilaaqay men paida huee thee, 27is liyay eesa nay usay bataaya, “pahelay bachchon ko jee bhar kar khaanay day, kyoonki yah munaasib naheen ki bachchon say khaana lay kar kutton kay saamnay phaink diya jaaay.”
28us nay javaab diya, “jee khudaavand, lekin mez kay neechay kay kuttay bhee bachchon kay giray huay tukday khaatay hain.”
29eesa nay kaha, “too nay achchha javaab diya, is liyay ja, badruh teree betee men say nikal gaee hai.”
30aurat apnay ghar vaapas chalee gaee to dekha ki ladkee bistar par padee hai aur badruh us men say nikal chukee hai.
goongay-baheray kee shifaa
31jab eesa soor say ravaana hua to vah pahelay shimaal men vaaqay shaher saida ko chala gaya. phir vahaan say bhee faarigh ho kar vah dubaara galeel kee jheel kay kinaaray vaaqay dikpulis kay ilaaqay men pahunch gaya. 32vahaan us kay paas ek bahera aadmee laaya gaya jo mushkil hee say bol sakta tha. unhon nay minnat kee ki vah apna haath us par rakhay. 33eesa usay hujoom say door lay gaya. us nay apnee ungaliyaan us kay kaanon men daaleen aur thook kar aadmee kee zabaan ko chhua. 34phir aasmaan kee taraf nazar utha kar us nay aah bharee aur us say kaha, “iffatah!” (is ka matlab hai “khul ja!”)
35fauran aadmee kay kaan khul gaay, zabaan ka bandhan toot gaya aur vah theek theek bolnay laga. 36eesa nay haazireen ko hukm diya ki vah kisee ko yah baat na bataaen. lekin jitna vah mana karta tha utna hee log is kee khabar phailaatay thay. 37vah nihaayat hee hairaan huay aur kahenay lagay, “is nay sab kuchh achchha kiya hai, yah baheron ko sunnay kee taaqat deta hai aur goongon ko bolnay kee.”