Marqus 2

maflooj kay liyay chhat kholee jaatee hai

¹kuchh dinon kay baad eesa kafarnahoom men vaapas aaya. jald hee khabar phail gaee ki vah ghar men hai. ²is par itnay log jama ho gaay ki poora ghar bhar gaya balki darvaazay kay saamnay bhee jagah na rahee. vah unhen kalaam-ay-muqaddas sunaanay laga. ³itnay men kuchh log pahunchay. un men say chaar aadmee ek maflooj ko uthaaay eesa kay paas laana chaahatay thay. ⁴magar vah usay hujoom kee vajah say eesa tak na pahuncha sakay, is liyay unhon nay chhat khol dee. eesa kay oopar ka hissa udhed kar unhon nay chaarpaaee ko jis par maflooj leta tha utaar diya. ⁵jab eesa nay un ka eemaan dekha to us nay maflooj say kaha, “beta, teray gunaah muaaf kar diay gaay hain.”

⁶shareeat kay kuchh aalim vahaan baithay thay. vah yah sun kar soch-bichaar men pad gaay. ⁷“yah kis tarah aisee baaten kar sakta hai? kufr bak raha hai. sirf allaah hee gunaah muaaf kar sakta hai.”

⁸eesa nay apnee rooh men fauran jaan liya ki vah kya soch rahay hain, is liyay us nay un say poochha, “tum dil men is tarah kee baaten kyoon soch rahay ho? ⁹kya maflooj say yah kahena aasaan hai ki ‘teray gunaah muaaf kar diay gaay hain’ ya yah ki ‘uth, apnee chaarpaaee utha kar chal phir’? ¹⁰lekin main tum ko dikhaata hoon ki ibn-ay-aadam ko vaaqaee duniya men gunaah muaaf karnay ka ikhtiyaar hai.” yah kah kar vah maflooj say mukhaatib hua, ¹¹“main tujh say kaheta hoon ki uth, apnee chaarpaaee utha kar ghar chala ja.”

¹²vah aadmee khada hua aur fauran apnee chaarpaaee utha kar un kay dekhtay dekhtay chala gaya. sab sakht hairatzada huay aur allaah kee tamjeed karkay kahenay lagay, “aisa kaam ham nay kabhee naheen dekha!”

eesa mattee ko bulaata hai

¹³phir eesa nikal kar dubaara jheel kay kinaaray gaya. ek badee bheed us kay paas aaee to vah unhen sikhaanay laga. ¹⁴chaltay chaltay us nay halfaee kay betay laavee ko dekha jo taiks lenay kay liyay apnee chaukee par baitha tha. eesa nay us say kaha, “meray peechhay ho lay.” aur laavee uth kar us kay peechhay ho liya.

¹⁵baad men eesa laavee kay ghar men khaana kha raha tha. us kay saath na sirf us kay shaagird balki bahut say taiks lenay vaalay aur gunaahgaar bhee thay, kyoonki un men say bahuteray us kay pairokaar ban chukay thay. ¹⁶shareeat kay kuchh fareesee aalimon nay usay yoon taiks lenay vaalon aur gunaahgaaron kay saath khaatay dekha to us kay shaagirdon say poochha, “yah taiks lenay vaalon aur gunaahgaaron kay saath kyoon khaata hai?”

¹⁷yah sun kar eesa nay javaab diya, “sehatmandon ko daaktar kee zaroorat naheen hotee balki mareezon ko. main raastbaazon ko naheen balki gunaahgaaron ko bulaanay aaya hoon.”

shaagird roza kyoon naheen rakhtay?

¹⁸yaheya kay shaagird aur fareesee roza rakha kartay thay. ek mauqay par kuchh log eesa kay paas aaay aur poochha, “aap kay shaagird roza kyoon naheen rakhtay jabki yaheya aur fareesiyon kay shaagird roza rakhtay hain?”

¹⁹eesa nay javaab diya, “shaadee kay mehamaan kis tarah roza rakh saktay hain jab doolha un kay darmiyaan hai? jab tak doolha un kay saath hai vah roza naheen rakh saktay. ²⁰lekin ek din aaega jab doolha un say lay liya jaaega. us vaqt vah zaroor roza rakhengay.

²¹koee bhee naay kapday ka tukda kisee puraanay libaas men naheen lagaata. agar vah aisa karay to naya tukda baad men sukad kar puraanay libaas say alag ho jaaega. yoon puraanay libaas kee phatee huee jagah pahelay kee nisbat ziyaada kharaab ho jaaegee. ²²isee tarah koee bhee angoor ka taaza ras puraanee aur belachak mashkon men naheen daalta. agar vah aisa karay to puraanee mashken paida honay vaalee gais kay baais phat jaaengee. nateejay men mai aur mashken donon zaaay ho jaaengee. is liyay angoor ka taaza ras naee mashkon men daala jaata hai jo lachakdaar hotee hain.”

sabat kay baaray men savaal

²³ek din eesa anaaj kay kheton men say guzar raha tha. chaltay chaltay us kay shaagird khaanay kay liyay anaaj kee baalen todnay lagay. sabat ka din tha. ²⁴yah dekh kar fareesiyon nay eesa say poochha, “dekho, yah kyoon aisa kar rahay hain? sabat kay din aisa karna mana hai.”

²⁵eesa nay javaab diya, “kya tum nay kabhee naheen padha ki daaood nay kya kiya jab usay aur us kay saathiyon ko bhook lagee aur un kay paas khuraak naheen thee? ²⁶us vaqt abiyaatar imaam-ay-aazam tha. daaood allaah kay ghar men daakhil hua aur rabb kay liyay makhsoosashuda rotiyaan lay kar khaaeen, agarchi sirf imaamon ko inhen khaanay kee ijaazat hai. aur us nay apnay saathiyon ko bhee yah rotiyaan khilaaeen.”

²⁷phir us nay kaha, “insaan ko sabat kay din kay liyay naheen banaaya gaya balki sabat ka din insaan kay liyay. ²⁸chunaanchay ibn-ay-aadam sabat ka bhee maalik hai.”