Marqus 16
eesa jee uthta hai
1haftay kee shaam ko jab sabat ka din guzar gaya to mariyam magdaleenee, yaaqoob kee maan mariyam aur salomee nay khushboodaar masaalay khareed liyay, kyoonki vah qabr kay paas ja kar unhen eesa kee laash par lagaana chaahatee theen. 2chunaanchay vah itwaar ko subah-saveray hee qabr par gaeen. sooraj tuloo ho raha tha. 3raastay men vah ek doosray say poochhnay lageen, “kaun hamaaray liyay qabr kay munh say patthar ko ludhakaaega?” 4lekin jab vahaan pahuncheen aur nazar utha kar qabr par ghaur kiya to dekha ki patthar ko ek taraf ludhkaaya ja chuka hai. yah patthar bahut bada tha. 5vah qabr men daakhil hueen. vahaan ek javaan aadmee nazar aaya jo safed libaas pahenay huay daaeen taraf baitha tha. vah ghabra gaeen.
6us nay kaha, “mat ghabraao. tum eesa naasree ko dhoond rahee ho jo masloob hua tha. vah jee utha hai, vah yahaan naheen hai. us jagah ko khud dekh lo jahaan usay rakha gaya tha. 7ab jaao, us kay shaagirdon aur patras ko bata do ki vah tumhaaray aagay aagay galeel pahunch jaaega. vaheen tum usay dekhogay, jis tarah us nay tum ko bataaya tha.”
8khavaateen laraztee aur uljhee huee haalat men qabr say nikal kar bhaag gaeen. unhon nay kisee ko bhee kuchh na bataaya, kyoonki vah nihaayat sahemee huee theen.
eesa mariyam magdaleenee par zaahir hota hai
9jab eesa itwaar ko subah-saveray jee utha to pahela shakhs jis par vah zaahir hua mariyam magdaleenee thee jis say us nay saat badruhen nikaalee theen. 10mariyam eesa kay saathiyon kay paas gaee jo maatam kar rahay aur ro rahay thay. us nay unhen jo kuchh hua tha bataaya. 11lekin go unhon nay suna ki eesa zinda hai aur ki mariyam nay usay dekha hai to bhee unhen yaqeen na aaya.
eesa mazeed do shaagirdon par zaahir hota hai
12is kay baad eesa doosree soorat men un men say do par zaahir hua jab vah yarooshalam say deehaat kee taraf paidal chal rahay thay. 13donon nay vaapas ja kar yah baat baaqee logon ko bataaee. lekin unhen in ka bhee yaqeen na aaya.
eesa gyaarah rasoolon par zaahir hota hai
14aakhir men eesa gyaarah shaagirdon par bhee zaahir hua. us vaqt vah mez par baithay khaana kha rahay thay. us nay unhen un kee bay-etiqaadee aur sakhtdilee kay sabab say daanta, ki unhon nay un ka yaqeen na kiya jinhon nay usay zinda dekha tha. 15phir us nay un say kaha, “pooree duniya men ja kar tamaam makhlooqaat ko allaah kee khushkhabaree sunaao. 16jo bhee eemaan la kar baptisma lay usay najaat milegee. lekin jo eemaan na laaay usay mujrim qaraar diya jaaega. 17aur jahaan jahaan log eemaan rakhengay vahaan yah ilaahee nishaan zaahir hongay : vah meray naam say badruhen nikaal dengay, naee naee zabaanen bolenge 18aur saampon ko utha kar mahfooz rahengay. muhalak zaher peenay say unhen nuqsaan naheen pahunchega aur jab vah apnay haath mareezon par rakhengay to shifa paaengay.”
eesa ko aasmaan par uthaaya jaata hai
19un say baat karnay kay baad khudaavand eesa ko aasmaan par utha liya gaya aur vah allaah kay dahenay haath baith gaya. 20is par shaagirdon nay nikal kar har jagah munaadee kee. aur khudaavand nay un kee himaayat karkay ilaahee nishaanon say kalaam kee tasdeeq kee.