Marqus 15
peelaatus kay saamne
1subah-saveray hee raahanuma imaam buzurgon, shareeat kay ulma aur pooree yahoodee adaalat-ay-aaliya kay saath mil kar faislay tak pahunch gaay. vah eesa ko baandh kar vahaan say lay gaay aur romee gavarnar peelaatus kay havaalay kar diya. 2peelaatus nay us say poochha, “kya tum yahoodiyon kay baadshaah ho?”
eesa nay javaab diya, “jee, aap khud kahetay hain.”
3raahanuma imaamon nay us par bahut ilzaam lagaaay. 4chunaanchay peelaatus nay dubaara us say savaal kiya, “kya tum koee javaab naheen dogay? yah to tum par bahut say ilzaamaat laga rahay hain.”
5lekin eesa nay is par bhee koee javaab na diya, aur peelaatus bada hairaan hua.
saza-ay-maut ka faislaa
6un dinon yah rivaaj tha ki har saal fasah kee eed par ek qaidee ko riha kar diya jaata tha. yah qaidee avaam say muntakhab kiya jaata tha. 7us vaqt kuchh aadmee jel men thay jo hukoomat kay khilaaf kisee inqilaabee tahereek men shareek huay thay aur jinhon nay baghaavat kay mauqay par qatl-o-ghaarat kee thee. un men say ek ka naam bar-abba tha. 8ab hujoom nay peelaatus kay paas a kar us say guzaarish kee ki vah maamool kay mutaabiq ek qaidee ko aazaad kar day. 9peelaatus nay poochha, “kya tum chaahatay ho ki main yahoodiyon kay baadshaah ko aazaad kar doon?” 10vah jaanta tha ki raahanuma imaamon nay eesa ko sirf hasad kee bina par us kay havaalay kiya hai.
11lekin raahanuma imaamon nay hujoom ko uksaaya ki vah eesa kay bajaay bar-abba ko maangen. 12peelaatus nay savaal kiya, “phir main is kay saath kya karoon jis ka naam tum nay yahoodiyon ka baadshaah rakha hai?”
13vah cheekhay, “usay masloob karen.”
14peelaatus nay poochha, “kyoon? us nay kya jurm kiya hai?”
lekin log mazeed shor macha kar cheekhtay rahay, “usay masloob karen!”
15chunaanchay peelaatus nay hujoom ko mutmain karnay kee khaatir bar-abba ko aazaad kar diya. us nay eesa ko koday lagaanay ko kaha, phir usay masloob karnay kay liyay faujiyon kay havaalay kar diya.
faujee eesa ka mazaaq udaatay hain
16faujee eesa ko gavarnar kay mahel banaam praitoriyum kay sahen men lay gaay aur pooree paltan ko ikattha kiya. 17unhon nay usay arghvaanee rang ka libaas pahenaaya aur kaantedaar taheniyon ka ek taaj bana kar us kay sar par rakh diya. 18phir vah usay salaam karnay lagay, “ai yahoodiyon kay baadshaah, aadaab!” 19laathee say us kay sar par maar maar kar vah us par thooktay rahay. ghutnay tek kar unhon nay usay sijda kiya. 20phir us ka mazaaq udaanay say thak kar unhon nay arghvaanee libaas utaar kar usay dubaara us kay apnay kapday pahenaaay. phir vah usay masloob karnay kay liyay baahar lay gaay.
eesa ko masloob kiya jaata hai
21us vaqt libiya kay shaher kuren ka rahenay vaala ek aadmee banaam shamaaoon deehaat say shaher ko a raha tha. vah sikandar aur roofus ka baap tha. jab vah eesa aur faujiyon kay paas say guzarnay laga to faujiyon nay usay saleeb uthaanay par majboor kiya. 22yoon chaltay chaltay vah eesa ko ek maqaam par lay gaay jis ka naam gulguta (yaanee khopdee ka maqaam) tha. 23vahaan unhon nay usay mai pesh kee jis men mur milaaya gaya tha, lekin us nay peenay say inkaar kiya. 24phir faujiyon nay usay masloob kiya aur us kay kapday aapas men baant liyay. yah faisla karnay kay liyay ki kis ko kya kya milega unhon nay qur’a daala. 25nau bajay subah ka vaqt tha jab unhon nay usay masloob kiya. 26ek takhtee saleeb par laga dee gaee jis par yah ilzaam likha tha, “yahoodiyon ka baadshaah.” 27do daakuon ko bhee eesa kay saath masloob kiya gaya, ek ko us kay dahenay haath aur doosray ko us kay baaen haath. 28[yoon muqaddas kalaam ka vah havaala poora hua jis men likha hai, ‘usay mujrimon men shumaar kiya gaya.’]
29jo vahaan say guzray unhon nay kufr bak kar us kee tazleel kee aur sar hila hila kar apnee hiqaarat ka izhaar kiya. unhon nay kaha, “too nay to kaha tha ki main bait-ul-muqaddas ko dha kar usay teen din kay andar andar dubaara taameer kar doonga. 30ab saleeb par say utar kar apnay aap ko bacha!”
31raahanuma imaamon aur shareeat kay ulma nay bhee eesa ka mazaaq uda kar kaha, “is nay auron ko bachaaya, lekin apnay aap ko naheen bacha sakta. 32usaraaeel ka yah baadshaah maseeh ab saleeb par say utar aaay taaki ham yah dekh kar eemaan laaen.” aur jin aadmiyon ko us kay saath masloob kiya gaya tha unhon nay bhee usay laan-taan kee.
eesa kee maut
33dopaher baarah bajay poora mulk andheray men doob gaya. yah taareekee teen ghanton tak rahee. 34phir teen bajay eesa oonchee aavaaz say pukaar utha, “elee, elee, lama shabqatanee?” jis ka matlab hai, “ai meray khuda, ai meray khuda, too nay mujhay kyoon tark kar diya hai?”
35yah sun kar paas khaday kuchh log kahenay lagay, “vah ilyaas nabee ko bula raha hai.” 36kisee nay daud kar mai kay sirkay men ek isfanj duboya aur usay danday par laga kar eesa ko chusaanay kee koshish kee. vah bola, “aao ham dekhen, shaayad ilyaas a kar usay saleeb par say utaar lay.”
37lekin eesa nay baday zor say chilla kar dam chhod diya.
38usee vaqt bait-ul-muqaddas kay muqaddastareen kamray kay saamnay latka hua parda oopar say lay kar neechay tak do hisson men phat gaya. 39jab eesa kay muqaabil khaday romee afsar [a] sau sipaahiyon par muqarrar afsar. nay dekha ki vah kis tarah mara to us nay kaha, “yah aadmee vaaqaee allaah ka farzand tha!”
40kuchh khavaateen bhee vahaan theen jo kuchh faasilay par us ka mushaahada kar rahee theen. un men mariyam magdaleenee, chhotay yaaqoob aur yoses kee maan mariyam aur salomee bhee theen. 41galeel men yah aurten eesa kay peechhay chal kar is kee khidmat kartee rahee theen. kaee aur khavaateen bhee vahaan theen jo us kay saath yarooshalam a gaee theen.
eesa ko dafan kiya jaata hai
42yah sab kuchh jumaay ko hua jo aglay din kay sabat kay liyay tayyaaree ka din tha. jab shaam honay ko thee 43to arimatiyaah ka ek aadmee banaam yoosuf himmat karkay peelaatus kay paas gaya aur us say eesa kee laash maangee. (yoosuf yahoodee adaalat-ay-aliya ka naamvar maimbar tha aur allaah kee baadshaahee kay aanay kay intizaar men tha.) 44peelaatus yah sun kar hairaan hua ki eesa mar chuka hai. us nay romee afsar ko bula kar us say poochha ki kya eesa vaaqaee mar chuka hai? 45jab afsar nay is kee tasdeeq kee to peelaatus nay yoosuf ko laash day dee. 46yoosuf nay kafan khareed liya, phir eesa kee laash utaar kar usay kataan kay kafan men lapeta aur ek qabr men rakh diya jo chataan men taraashee gaee thee. aakhir men us nay ek bada patthar ludhka kar qabr ka munh band kar diya. 47mariyam magdaleenee aur yoses kee maan mariyam nay dekh liya ki eesa kee laash kahaan rakhee gaee hai.