Marqus 14
eesa kay khilaaf mansoobaabandiyaan
1fasah aur bekhameeree rotee kee eed qareeb a gaee thee. sirf do din rah gaay thay. raahanuma imaam aur shareeat kay ulma eesa ko kisee chaalaakee say giriftaar karkay qatl karnay kee talaash men thay. 2unhon nay kaha, “lekin yah eed kay dauraan naheen hona chaahiay, aisa na ho ki avaam men halchal mach jaaay.”
khaatoon eesa par khushboo undelatee hai
3itnay men eesa bait-aniyaah a kar ek aadmee kay ghar men daakhil hua jo kisee vaqt kodh ka mareez tha. us ka naam shamaaoon tha. eesa khaana khaanay kay liyay baith gaya to ek aurat aaee. us kay paas khaalis jataamaasee kay nihaayat qeemtee itr ka itradaan tha. us ka sar tod kar us nay itr eesa kay sar par undel diya. 4haazireen men say kuchh naaraaz huay. “itna qeemtee itr zaaay karnay kee kya zaroorat thee? 5is kee qeemat kam az kam chaandee kay 300 sikkay thee. agar isay becha jaata to is kay paisay ghareebon ko diay ja saktay thay.” aisee baaten kartay huay unhon nay usay jhidka.
6lekin eesa nay kaha, “isay chhod do, tum isay kyoon tang kar rahay ho? is nay to meray liyay ek nek kaam kiya hai. 7ghareeb to hamesha tumhaaray paas rahengay, aur tum jab bhee chaaho un kee madad kar sakogay. lekin main hamesha tumhaaray saath naheen rahoonga. 8jo kuchh vah kar saktee thee us nay kiya hai. mujh par itr undelanay say vah muqarrara vaqt say pahelay meray badan ko dafnaanay kay liyay tayyaar kar chukee hai. 9main tum ko sachch bataata hoon ki tamaam duniya men jahaan bhee allaah kee khushkhabaree ka elaan kiya jaaega vahaan log is khaatoon ko yaad karkay vah kuchh sunaaengay jo is nay kiya hai.”
eesa ko dushman kay havaalay karnay ka mansoobaa
10phir yahoodaah iskariyotee jo baarah shaagirdon men say ek tha raahanuma imaamon kay paas gaya taaki eesa ko un kay havaalay karnay kee baat karay. 11us kay aanay ka maqsad sun kar vah khush huay aur usay paisay denay ka vaada kiya. chunaanchay vah eesa ko un kay havaalay karnay ka mauqa dhoondnay laga.
fasah kee eed kay liyay tayyaariyaan
12bekhameeree rotee kee eed aaee jab log fasah kay lelay ko qurbaan kartay thay. eesa kay shaagirdon nay us say poochha, “ham kahaan aap kay liyay fasah ka khaana tayyaar karen?”
13chunaanchay eesa nay un men say do ko yah hidaayat day kar yarooshalam bhej diya ki “jab tum shaher men daakhil hogay to tumhaaree mulaaqaat ek aadmee say hogee jo paanee ka ghada uthaaay chal raha hoga. us kay peechhay ho lena. 14jis ghar men vah daakhil ho us kay maalik say kahena, ‘ustaad aap say poochhtay hain ki vah kamra kahaan hai jahaan main apnay shaagirdon kay saath fasah ka khaana khaaoon?’ 15vah tumhen doosree manzil par ek bada aur saja hua kamra dikhaaega. vah tayyaar hoga. hamaaray liyay fasah ka khaana vaheen tayyaar karna.”
16donon chalay gaay to shaher men daakhil ho kar sab kuchh vaisa hee paaya jaisa eesa nay unhen bataaya tha. phir unhon nay fasah ka khaana tayyaar kiya.
ghaddaar kaun hai?
17shaam kay vaqt eesa baarah shaagirdon samet vahaan pahunch gaya. 18jab vah mez par baithay khaana kha rahay thay to us nay kaha, “main tum ko sachch bataata hoon, tum men say ek jo meray saath khaana kha raha hai mujhay dushman kay havaalay kar dega.”
19shaagird yah sun kar ghamgeen huay. baaree baaree unhon nay us say poochha, “main to naheen hoon?”
20eesa nay javaab diya, “tum baarah men say ek hai. vah meray saath apnee rotee saalan kay bartan men daal raha hai. 21ibn-ay-aadam to kooch kar jaaega jis tarah kalaam-ay-muqaddas men likha hai, lekin us shakhs par afsos jis kay vaseelay say usay dushman kay havaalay kar diya jaaega. us kay liyay behatar yah hota ki vah kabhee paida hee na hota.”
fasah ka aakhiree khaanaa
22khaanay kay dauraan eesa nay rotee lay kar shukrguzaaree kee dua kee aur usay tukday karkay shaagirdon ko day diya. us nay kaha, “yah lo, yah mera badan hai.”
23phir us nay mai ka piyaala lay kar shukrguzaaree kee dua kee aur usay unhen day diya. sab nay us men say pee liya. 24us nay un say kaha, “yah mera khoon hai, naay ahd ka vah khoon jo bahuton kay liyay bahaaya jaata hai. 25main tum ko sachch bataata hoon ki ab say main angoor ka ras naheen piyoonga, kyoonki aglee dafa isay naay siray say allaah kee baadshaahee men hee piyoonga.”
26phir vah ek zaboor ga kar niklay aur zaitoon kay pahaad kay paas pahunchay.
patras kay inkaar kee peshgoee
27eesa nay unhen bataaya, “tum sab bargashta ho jaaogay, kyoonki kalaam-ay-muqaddas men allaah farmaata hai, ‘main charvaahay ko maar daaloonga aur bheden tittar-bittar ho jaaengee.’ 28lekin apnay jee uthnay kay baad men tumhaaray aagay aagay galeel pahunchoonga.”
29patras nay etiraaz kiya, “doosray beshak sab bargashta ho jaaen, lekin men kabhee naheen hoonga.”
30eesa nay javaab diya, “main tujhay sachch bataata hoon, isee raat murgh kay doosree dafa baang denay say pahelay pahelay too teen baar mujhay jaannay say inkaar kar chuka hoga.”
31patras nay israar kiya, “hargiz naheen! main aap ko jaannay say kabhee inkaar naheen karoonga, chaahay mujhay aap kay saath marna bhee paday.”
doosron nay bhee yahee kuchh kaha.
gatsamanee baagh men eesa kee duaa
32vah ek baagh men pahunchay jis ka naam gatsamanee tha. eesa nay apnay shaagirdon say kaha, “yahaan baith kar mera intizaar karo. main dua karnay kay liyay aagay jaata hoon.” 33us nay patras, yaaqoob aur yoohanna ko saath liya. vahaan vah ghabra kar beqaraar honay laga. 34us nay un say kaha, “main dukh say itna daba hua hoon ki marnay ko hoon. yahaan thaher kar jaagtay raho.”
35kuchh aagay ja kar vah zameen par gir gaya aur dua karnay laga ki agar mumkin ho to mujhay aanay vaalee ghadiyon kee takleef say guzarna na paday. 36us nay kaha, “ai abba, ai baap! teray liyay sab kuchh mumkin hai. dukh ka yah piyaala mujh say hata lay. lekin meree naheen balki teree marzee pooree ho.”
37vah apnay shaagirdon kay paas vaapas aaya to dekha ki vah so rahay hain. us nay patras say kaha, “shamaaoon, kya too so raha hai? kya too ek ghanta bhee naheen jaag saka? 38jaagtay aur dua kartay raho taaki tum aazmaaish men na pado. kyoonki rooh to tayyaar hai, lekin jism kamzor.”
39ek baar phir us nay ja kar vahee dua kee jo pahelay kee thee. 40jab vaapas aaya to dubaara dekha ki vah so rahay hain, kyoonki neend kee badaulat un kee aankhen bojhal theen. vah naheen jaantay thay ki kya javaab den.
41jab eesa teesree baar vaapas aaya to us nay un say kaha, “tum abhee tak so aur aaraam kar rahay ho? bas kaafee hai. vaqt a gaya hai. dekho, ibn-ay-aadam ko gunaahgaaron kay havaalay kiya ja raha hai. 42utho. aao, chalen. dekho, mujhay dushman kay havaalay karnay vaala qareeb a chuka hai.”
eesa kee giriftaaree
43vah abhee yah baat kar hee raha tha ki yahoodaah pahunch gaya, jo baarah shaagirdon men say ek tha. us kay saath talvaaron aur laathiyon say les aadmiyon ka hujoom tha. unhen raahanuma imaamon, shareeat kay ulma aur buzurgon nay bheja tha. 44is ghaddaar yahoodaah nay unhen ek imtiyaazee nishaan diya tha ki jis ko main bosa doon vahee eesa hai. usay giriftaar karkay lay jaaen.
45joon hee vah pahunchay yahoodaah eesa kay paas gaya aur “ustaad!” kah kar usay bosa diya. 46is par unhon nay usay pakad kar giriftaar kar liya. 47lekin eesa kay paas khaday ek shakhs nay apnee talvaar miyaan say nikaalee aur imaam-ay-aazam kay ghulaam ko maar kar us ka kaan uda diya. 48eesa nay un say poochha, “kya main daakoo hoon ki tum talvaaren aur laathiyaan liyay mujhay giriftaar karnay niklay ho? 49main to rozaana bait-ul-muqaddas men tumhaaray paas tha aur taaleem deta raha, magar tum nay mujhay giriftaar naheen kiya. lekin yah is liyay ho raha hai taaki kalaam-ay-muqaddas kee baaten pooree ho jaaen.”
50phir sab kay sab usay chhod kar bhaag gaay.
51lekin ek naujavaan eesa kay peechhay peechhay chalta raha jo sirf chaadar odhay huay tha. logon nay usay pakadnay kee koshish kee, 52lekin vah chaadar chhod kar nangee haalat men bhaag gaya.
yahoodee adaalat-ay-aaliya kay saamne
53vah eesa ko imaam-ay-aazam kay paas lay gaay jahaan tamaam raahanuma imaam, buzurg aur shareeat kay ulma bhee jama thay. 54itnay men patras kuchh faasilay par eesa kay peechhay peechhay imaam-ay-aazam kay sahen tak pahunch gaya. vahaan vah mulaazimon kay saath baith kar aag taapnay laga. 55makaan kay andar raahanuma imaam aur yahoodee adaalat-ay-aaliya kay tamaam afraad eesa kay khilaaf gavaahiyaan dhoond rahay thay taaki usay saza-ay-maut dilva saken. lekin koee gavaahee na milee. 56kaafee logon nay us kay khilaaf jhootee gavaahee to dee, lekin un kay bayaan ek doosray kay mutzaad thay.
57aakhirkaar baaz nay khaday ho kar yah jhootee gavaahee dee, 58“ham nay isay yah kahetay suna hai ki main insaan kay haathon kay banay is bait-ul-muqaddas ko dha kar teen din kay andar andar naya maqdis taameer kar doonga, ek aisa maqdis jo insaan kay haath naheen banaaengay.” 59lekin un kee gavaahiyaan bhee ek doosree say mutzaad theen.
60phir imaam-ay-aazam nay haazireen kay saamnay khaday ho kar eesa say poochha, “kya too koee javaab naheen dega? yah kya gavaahiyaan hain jo yah log teray khilaaf day rahay hain?”
61lekin eesa khaamosh raha. us nay koee javaab na diya. imaam-ay-aazam nay us say ek aur savaal kiya, “kya too al-hameed ka farzand maseeh hai?”
62eesa nay kaha, “jee, main hoon. aur aainda tum ibn-ay-aadam ko qaadir-ay-mutlaq kay dahenay haath baithay aur aasmaan kay baadlon par aatay huay dekhogay.”
63imaam-ay-aazam nay ranjish ka izhaar karkay apnay kapday phaad liyay aur kaha, “hamen mazeed gavaahon kee kya zaroorat rahee! 64aap nay khud sun liya hai ki is nay kufr baka hai. aap ka kya faisla hai?”
sab nay usay saza-ay-maut kay laaiq qaraar diya.
65phir kuchh us par thooknay lagay. unhon nay us kee aankhon par pattee baandhee aur usay mukkay maar maar kar kahenay lagay, “nubuvvat kar!” mulaazimon nay bhee usay thappad maaray.
patras eesa ko jaannay say inkaar karta hai
66is dauraan patras neechay sahen men tha. imaam-ay-aazam kee ek naukraanee vahaan say guzree 67aur dekha ki patras vahaan aag taap raha hai. us nay ghaur say us par nazar kee aur kaha, “tum bhee naasrat kay us aadmee eesa kay saath thay.”
68lekin us nay inkaar kiya, “main naheen jaanta ya samajhta ki too kya baat kar rahee hai.” yah kah kar vah get kay qareeb chala gaya. [usee lamhay murgh nay baang dee.]
69jab naukraanee nay usay vahaan dekha to us nay dubaara paas khaday logon say kaha, “yah banda un men say hai.” 70dubaara patras nay inkaar kiya.
thodee der kay baad patras kay saath khaday logon nay bhee us say kaha, “tum zaroor un men say ho kyoonki tum galeel kay rahenay vaalay ho.”
71is par patras nay qasam kha kar kaha, “mujh par laanat agar main jhoot bol raha hoon. main us aadmee ko naheen jaanta jis ka zikr tum kar rahay ho.”
72fauran murgh kee baang doosree martaba sunaaee dee. phir patras ko vah baat yaad aaee jo eesa nay us say kahee thee, “murgh kay doosree dafa baang denay say pahelay pahelay too teen baar mujhay jaannay say inkaar kar chuka hoga.” is par vah ro pada.