Marqus 13
bait-ul-muqaddas par aanay vaalee tabaahee
1us din jab eesa bait-ul-muqaddas say nikal raha tha to us kay shaagirdon nay kaha, “ustaad, dekhen kitnay shaandaar patthar aur imaaraten hain!”
2eesa nay javaab diya, “kya tum ko yah badee badee imaaraten nazar aatee hain? patthar par patthar naheen rahega. sab kuchh dha diya jaaega.”
museebaton aur eezaarasaanee kee peshgoee
3baad men eesa zaitoon kay pahaad par bait-ul-muqaddas kay muqaabil baith gaya. patras, yaaqoob, yoohanna aur andriyaas akelay us kay paas aaay. unhon nay kaha, 4“hamen zara bataaen, yah kab hoga? kya kya nazar aaega jis say maaloom hoga ki yah ab poora honay ko hai?”
5eesa nay javaab diya, “khabardaar raho ki koee tumhen gumraah na kar day. 6bahut say log mera naam lay kar aaengay aur kahengay, ‘main hee maseeh hoon.’ yoon vah bahuton ko gumraah kar dengay. 7jab jangon kee khabren aur afwaahen tum tak pahunchengee to mat ghabraana. kyoonki laazim hai ki yah sab kuchh pesh aaay. to bhee abhee aakhirat naheen hogee. 8ek qaum doosree kay khilaaf uth khadee hogee aur ek baadshaahee doosree kay khilaaf. jagah jagah zalzlay aaengay, kaal padengay. lekin yah sirf dard-ay-zah kee ibtida hee hogee.
9tum khud khabardaar raho. tum ko maqaamee adaalaton kay havaalay kar diya jaaega aur log yahoodee ibaadatkhaanon men tumhen koday lagavaaengay. meree khaatir tumhen hukmaraanon aur baadshaahon kay saamnay pesh kiya jaaega. yoon tum unhen meree gavaahee dogay. 10laazim hai ki aakhirat say pahelay allaah kee khushkhabaree tamaam aqvaam ko sunaaee jaaay. 11lekin jab log tum ko giriftaar karkay adaalat men pesh karengay to yah sochtay sochtay pareshaan na ho jaana ki main kya kahoon. bas vahee kuchh kahena jo allaah tumhen us vaqt bataaega. kyoonki us vaqt tum naheen balki rooh-ul-quds bolnay vaala hoga. 12bhaaee apnay bhaaee ko aur baap apnay bachchay ko maut kay havaalay kar dega. bachchay apnay vaalidain kay khilaaf khaday ho kar unhen qatl karavaaengay. 13sab tum say nafrat karengay, is liyay ki tum meray pairokaar ho. lekin jo aakhir tak qaaim rahega usay najaat milegee.
bait-ul-muqaddas kee behuramtee
14ek din aaega jab tum vahaan jahaan usay naheen hona chaahiay vah kuchh khada dekhogay jo behuramtee aur tabaahee ka baais hai.” (qaaree is par dhyaan day!) “us vaqt yahoodiya kay rahenay vaalay bhaag kar pahaadee ilaaqay men panaah len. 15jo apnay ghar kee chhat par ho vah na utray, na kuchh saath lay jaanay kay liyay ghar men daakhil ho jaaay. 16jo khet men ho vah apnee chaadar saath lay jaanay kay liyay vaapas na jaaay. 17un khavaateen par afsos jo un dinon men haamila hon ya apnay bachchon ko doodh pilaatee hon. 18dua karo ki yah vaaqia sardiyon kay mausam men pesh na aaay. 19kyoonki un dinon men aisee museebat hogee ki duniya kee takhleeq say aaj tak dekhnay men na aaee hogee. is qism kee museebat baad men bhee kabhee naheen aaegee. 20aur agar khudaavand is museebat ka dauraaniya mukhtasar na karta to koee na bachta. lekin us nay apnay chunay huon kee khaatir us ka dauraaniya mukhtasar kar diya hai.
21us vaqt agar koee tum ko bataaay, ‘dekho, maseeh yahaan hai,’ ya ‘vah vahaan hai’ to us kee baat na maanna. 22kyoonki jhootay maseeh aur jhootay nabee uth khaday hongay jo ajeeb-o-ghareeb nishaan aur mojizay dikhaaengay taaki allaah kay chunay huay logon ko ghalat raastay par daal den - agar yah mumkin hota. 23is liyay khabardaar! main nay tum ko pahelay hee in sab baaton say aagaah kar diya hai.
ibn-ay-aadam kee aamad
24museebat kay un dinon kay baad sooraj taareek ho jaaega aur chaand kee raushnee khatm ho jaaegee. 25sitaaray aasmaan par say gir padengay aur aasmaan kee quvvaten hilaaee jaaengee. 26us vaqt log ibn-ay-aadam ko badee qudrat aur jalaal kay saath baadlon men aatay huay dekhengay. 27aur vah apnay farishton ko bhej dega taaki us kay chunay huon ko chaaron taraf say jama karen, duniya kay konay konay say aasmaan kee intiha tak ikattha karen.
anjeer kay darakht say sabaq
28anjeer kay darakht say sabaq seekho. joon hee us kee shaakhen narm aur lachakdaar ho jaatee hain aur un say komplen phoot nikaltee hain to tum ko maaloom ho jaata hai ki garmiyon ka mausam qareeb a gaya hai. 29isee tarah jab tum yah vaaqiaat dekhogay to jaan logay ki ibn-ay-aadam kee aamad qareeb balki darvaazay par hai. 30main tum ko sachch bataata hoon, is nasal kay khatm honay say pahelay pahelay yah sab kuchh vaaqay hoga. 31aasmaan-o-zameen to jaatay rahengay, lekin meree baaten hamesha tak qaaim rahengee.
kisee ko bhee us kee aamad ka vaqt maaloom naheen
32lekin kisee ko bhee ilm naheen ki yah kis din ya kaun see ghadee roonuma hoga. aasmaan kay farishton aur farzand ko bhee ilm naheen balki sirf baap ko. 33chunaanchay khabardaar aur chaukannay raho! kyoonki tum ko naheen maaloom ki yah vaqt kab aaega. 34ibn-ay-aadam kee aamad us aadmee say mutaabiqat rakhtee hai jisay kisee safar par jaana tha. ghar chhodtay vaqt us nay apnay naukron ko intizaam chalaanay ka ikhtiyaar day kar har ek ko us kee apnee zimmaadaaree saump dee. darbaan ko us nay hukm diya ki vah chaukas rahay. 35tum bhee isee tarah chaukas raho, kyoonki tum naheen jaantay ki ghar ka maalik kab vaapas aaega, shaam ko, aadhee raat ko, murgh kay baang detay ya pau phattay vaqt. 36aisa na ho ki vah achaanak a kar tum ko sotay paaay. 37yah baat main na sirf tum ko balki sab ko bataata hoon, chaukas raho!”