kya taiks dena jaaiz hai?

¹³baad men unhon nay kuchh fareesiyon aur herodes kay pairokaaron ko us kay paas bhej diya taaki vah usay koee aisee baat karnay par ubhaaren jis say usay pakda ja sakay. ¹⁴vah us kay paas a kar kahenay lagay, “ustaad, ham jaantay hain ki aap sachchay hain aur kisee kee parva naheen kartay. aap jaanibdaar naheen hotay balki diyaanatdaaree say allaah kee raah kee taaleem detay hain. ab hamen bataaen ki kya romee shahenshaah ko taiks dena jaaiz hai ya naajaaiz? kya ham ada karen ya na karen?”

¹⁵lekin eesa nay un kee riyaakaaree jaan kar un say kaha, “mujhay kyoon phansaana chaahatay ho? chaandee ka ek romee sikka meray paas lay aao.”

¹⁶vah ek sikka us kay paas lay aaay to us nay poochha, “kis kee soorat aur naam is par kanda hai?” unhon nay javaab diya, “shahenshaah ka.”

¹⁷us nay kaha, “to jo shahenshaah ka hai shahenshaah ko do aur jo allaah ka hai allaah ko.” us ka yah javaab sun kar unhon nay bada taajjub kiya.

kya ham jee uthengay?

¹⁸phir kuchh sadooqee eesa kay paas aaay. sadooqee naheen maantay ki roz-ay-qiyaamat murday jee uthengay. unhon nay eesa say ek savaal kiya, ¹⁹“ustaad, moosa nay hamen hukm diya ki agar koee shaadeeshuda aadmee beaulaad mar jaaay aur us ka bhaaee ho to bhaaee ka farz hai ki vah beva say shaadee karkay apnay bhaaee kay liyay aulaad paida karay. ²⁰ab farz karen ki saat bhaaee thay. pahelay nay shaadee kee, lekin beaulaad faut hua. ²¹is par doosray nay us say shaadee kee, lekin vah bhee beaulaad mar gaya. phir teesray bhaaee nay us say shaadee kee. ²²yah silsila saatven bhaaee tak jaaree raha. yakay baad deegray har bhaaee beva say shaadee karnay kay baad mar gaya. aakhir men beva bhee faut ho gaee. ²³ab bataaen ki qiyaamat kay din vah kis kee beevee hogee? kyoonki saat kay saat bhaaiyon nay us say shaadee kee thee.”

²⁴eesa nay javaab diya, “tum is liyay ghaltee par ho ki na tum kalaam-ay-muqaddas say vaaqif ho, na allaah kee qudrat say. ²⁵kyoonki jab murday jee uthengay to na vah shaadee karengay na un kee shaadee karaaee jaaegee balki vah aasmaan par farishton kee maanind hongay. ²⁶rahee yah baat ki murday jee uthengay. kya tum nay moosa kee kitaab men naheen padha ki allaah jaltee huee jhaadee men say kis tarah moosa say hamkalaam hua? us nay farmaaya, ‘main ibraaheem ka khuda, ishaaq ka khuda aur yaaqoob ka khuda hoon,’ haalaanki us vaqt teenon kaafee arsay say mar chukay thay. ²⁷is ka matlab hai ki yah haqeeqat men zinda hain, kyoonki allaah murdon ka naheen, balki zindon ka khuda hai. tum say badee ghaltee huee hai.”

avval hukm

²⁸itnay men shareeat ka ek aalim un kay paas aaya. us nay unhen bahs kartay huay suna tha aur jaan liya ki eesa nay achchha javaab diya, is liyay us nay poochha, “tamaam ahkaam men say kaun sa hukm sab say ahem hai?”

²⁹eesa nay javaab diya, “avval hukm yah hai : ‘sun ai israaeel! rabb hamaara khuda ek hee rabb hai. ³⁰rabb apnay khuda say apnay pooray dil, apnee pooree jaan, apnay pooray zahen aur apnee pooree taaqat say piyaar karna.’ ³¹doosra hukm yah hai : ‘apnay padosee say vaisee muhabbat rakhna jaisee too apnay aap say rakhta hai.’ deegar koee bhee hukm in do ahkaam say ahem naheen hai.”

³²us aalim nay kaha, “shaabaash, ustaad! aap nay sachch kaha hai ki allaah sirf ek hee hai aur us kay siva koee aur naheen hai. ³³hamen usay apnay pooray dil, apnay pooray zahen aur apnee pooree taaqat say piyaar karna chaahiay aur saath saath apnay padosee say vaisee muhabbat rakhnee chaahiay jaisee apnay aap say rakhtay hain. yah do ahkaam bhasm honay vaalee tamaam qurbaaniyon aur deegar nazron say ziyaada ahemiyat rakhtay hain.”

³⁴jab eesa nay us ka yah javaab suna to us say kaha, “too allaah kee baadshaahee say door naheen hai.” is kay baad kisee nay bhee us say savaal poochhnay kee jur’at na kee.

maseeh kay baaray men savaal

³⁵jab eesa bait-ul-muqaddas men taaleem day raha tha to us nay poochha, “shareeat kay ulma kyoon daava kartay hain ki maseeh daaood ka farzand hai? ³⁶kyoonki daaood nay to khud rooh-ul-quds kee maarifat yah farmaaya,

‘rabb nay meray rabb say kaha,

meray dahenay haath baith,

jab tak main teray dushmanon ko teray paaon kay neechay na kar doon.’

³⁷daaood to khud maseeh ko rabb kaheta hai. to phir vah kis tarah daaood ka farzand ho sakta hai?”

shareeat kay ulma say khabardaar rahenaa

ek bada hujoom mazay say eesa kee baaten sun raha tha. ³⁸unhen taaleem detay vaqt us nay kaha, “ulma say khabardaar raho! kyoonki vah shaandaar choghay pahen kar idhar udhar phirna pasand kartay hain. jab log baazaaron men salaam karkay un kee izzat kartay hain to phir vah khush ho jaatay hain. ³⁹un kee bas ek hee khwaahish hotee hai ki ibaadatkhaanon aur ziyaafaton men izzat kee kursiyon par baith jaaen. ⁴⁰yah log bevaaon kay ghar hadap kar jaatay aur saath saath dikhaavay kay liyay lambee lambee duaaen maangtay hain. aisay logon ko nihaayat sakht saza milegee.”

beva ka chandaa

⁴¹eesa bait-ul-muqaddas kay chanday kay baks kay muqaabil baith gaya aur hujoom ko hadiay daaltay huay dekhnay laga. kaee ameer badee badee rakmen daal rahay thay. ⁴²phir ek ghareeb beva bhee vahaan say guzree jis nay us men taambay kay do maamoolee say sikkay daal diay. ⁴³eesa nay shaagirdon ko apnay paas bula kar kaha, “main tum ko sachch bataata hoon ki is ghareeb beva nay tamaam logon kee nisbat ziyaada daala hai. ⁴⁴kyoonki in sab nay apnee daulat kee kasrat say day diya jabki us nay zarooratmand honay kay baavujood bhee apnay guzaaray kay saaray paisay day diay hain.”