Marqus 11
yarooshalam men eesa ka purjosh istiqbaal
1vah yarooshalam kay qareeb bait-fagay aur bait-aniyaah pahunchnay lagay. yah gaaon zaitoon kay pahaad par vaaqay thay. eesa nay apnay shaagirdon men say do ko bhejaa 2aur kaha, “saamnay vaalay gaaon men jaao. vahaan tum ek javaan gadha dekhogay. vah bandha hua hoga aur ab tak koee bhee us par savaar naheen hua hai. usay khol kar yahaan lay aao. 3agar koee poochhay ki yah kya kar rahay ho to usay bata dena, ‘khudaavand ko is kee zaroorat hai. vah jald hee isay vaapas bhej dengay’.”
4donon shaagird vahaan gaay to ek javaan gadha dekha jo baahar galee men kisee darvaazay kay saath bandha hua tha. jab vah us kee rassee kholnay lage 5to vahaan khaday kuchh logon nay poochha, “tum yah kya kar rahay ho? javaan gadhay ko kyoon khol rahay ho?”
6unhon nay javaab men vah kuchh bata diya jo eesa nay unhen kaha tha. is par logon nay unhen kholnay diya. 7vah javaan gadhay ko eesa kay paas lay aaay aur apnay kapday us par rakh diay. phir eesa us par savaar hua. 8jab vah chal pada to bahut say logon nay us kay aagay aagay raastay men apnay kapday bichha diay. baaz nay haree shaakhen bhee us kay aagay bichha deen jo unhon nay kheton kay darakhton say kaat lee theen. 9log eesa kay aagay aur peechhay chal rahay thay aur chilla chilla kar naaray laga rahay thay,
“hoshaanaa [a] hoshaana (ibraanee : meharbaanee karkay hamen bacha). yahaan is men hamd-o-sana ka unsur bhee paaya jaata hai. !
mubaarak hai vah jo rabb kay naam say aata hai. 10mubaarak hai hamaaray baap daaood kee baadshaahee jo a rahee hai.
aasmaan kee bulandiyon par hoshaanaa [b] hoshaana (ibraanee : meharbaanee karkay hamen bacha). yahaan is men hamd-o-sana ka unsur bhee paaya jaata hai. .”
11yoon eesa yarooshalam men daakhil hua. vah bait-ul-muqaddas men gaya aur apnay ird-gird nazar dauda kar sab kuchh dekhnay kay baad chala gaya. choonki shaam ka pichhla vaqt tha is liyay vah baarah shaagirdon samet shaher say nikal kar bait-aniyaah vaapas gaya.
anjeer kay darakht par laanat
12aglay din jab vah bait-aniyaah say nikal rahay thay to eesa ko bhook lagee. 13us nay kuchh faasilay par anjeer ka ek darakht dekha jis par pattay thay. is liyay vah yah dekhnay kay liyay us kay paas gaya ki aaya koee phal laga hai ya naheen. lekin jab vah vahaan pahuncha to dekha ki pattay hee pattay hain. vajah yah thee ki anjeer ka mausam naheen tha. 14is par eesa nay darakht say kaha, “ab say hamesha tak tujh say phal khaaya na ja sakay!” us kay shaagirdon nay us kee yah baat sun lee.
eesa bait-ul-muqaddas men jaata hai
15vah yarooshalam pahunch gaay. aur eesa bait-ul-muqaddas men ja kar unhen nikaalnay laga jo vahaan qurbaaniyon kay liyay darkaar cheezon kee khareed-o-farokht kar rahay thay. us nay sikkon ka tabaadla karnay vaalon kee mezen aur kabootar bechanay vaalon kee kursiyaan ulat deen 16aur jo tijaartee maal lay kar bait-ul-muqaddas kay sahenon men say guzar rahay thay unhen rok liya. 17taaleem day kar us nay kaha, “kya kalaam-ay-muqaddas men naheen likha hai, ‘mera ghar tamaam qaumon kay liyay dua ka ghar kahelaaega’? lekin tum nay usay daakuon kay adday men badal diya hai.”
18raahanuma imaamon aur shareeat kay ulma nay jab yah suna to usay qatl karnay ka mauqa dhoondnay lagay. kyoonki vah us say dartay thay is liyay ki poora hujoom us kee taaleem say nihaayat hairaan tha.
19jab shaam huee to eesa aur us kay shaagird shaher say nikal gaay.
anjeer kay darakht say sabaq
20aglay din vah subah-saveray anjeer kay us darakht kay paas say guzray jis par eesa nay laanat bhejee thee. jab unhon nay us par ghaur kiya to maaloom hua ki vah jadon tak sookh gaya hai. 21tab patras ko vah baat yaad aaee jo eesa nay kal anjeer kay darakht say kee thee. us nay kaha, “ustaad, yah dekhen! anjeer kay jis darakht par aap nay laanat bhejee thee vah sookh gaya hai.”
22eesa nay javaab diya, “allaah par eemaan rakho. 23main tum ko sachch bataata hoon ki agar koee is pahaad say kahay, ‘uth, apnay aap ko samundar men gira day’ to yah ho jaaega. shart sirf yah hai ki vah shak na karay balki eemaan rakhay ki jo kuchh us nay kaha hai vah us kay liyay ho jaaega. 24is liyay main tum ko bataata hoon, jab bhee tum dua karkay kuchh maangtay ho to eemaan rakho ki tum ko mil gaya hai. phir vah tumhen zaroor mil jaaega. 25aur jab tum khaday ho kar dua kartay ho to agar tumhen kisee say shikaayat ho to pahelay usay muaaf karo taaki aasmaan par tumhaara baap bhee tumhaaray gunaahon ko muaaf karay. 26[aur agar tum muaaf na karo to tumhaara aasmaanee baap tumhaaray gunaah bhee muaaf naheen karega.]”
kis nay eesa ko ikhtiyaar diya?
27vah ek aur dafa yarooshalam pahunch gaay. aur jab eesa bait-ul-muqaddas men phir raha tha to raahanuma imaam, shareeat kay ulma aur buzurg us kay paas aaay. 28unhon nay poochha, “aap yah sab kuchh kis ikhtiyaar say kar rahay hain? kis nay aap ko yah karnay ka ikhtiyaar diya hai?”
29eesa nay javaab diya, “mera bhee tum say ek savaal hai. is ka javaab do to phir tum ko bata doonga ki main yah kis ikhtiyaar say kar raha hoon. 30mujhay bataao, kya yaheya ka baptisma aasmaanee tha ya insaanee?”
31vah aapas men bahs karnay lagay, “agar ham kahen ‘aasmaanee’ to vah poochhega, ‘to phir tum us par eemaan kyoon na laaay?’ 32lekin ham kaisay kah saktay hain ki vah insaanee tha?” vajah yah thee ki vah aam logon say dartay thay, kyoonki sab maantay thay ki yaheya vaaqaee nabee tha. 33chunaanchay unhon nay javaab diya, “ham naheen jaantay.”
eesa nay kaha, “to phir main bhee tum ko naheen bataata ki main yah sab kuchh kis ikhtiyaar say kar raha hoon.”