Marqus 10
talaaq kay baaray men taaleem
1phir eesa us jagah ko chhod kar yahoodiya kay ilaaqay men aur darya-ay-yardan kay paar chala gaya. vahaan bhee hujoom jama ho gaya. us nay unhen maamool kay mutaabiq taaleem dee.
2kuchh fareesee aaay aur usay phansaanay kee gharaz say savaal kiya, “kya jaaiz hai ki mard apnee beevee ko talaaq day?”
3eesa nay un say poochha, “moosa nay shareeat men tum ko kya hidaayat kee hai?”
4unhon nay kaha, “us nay ijaazat dee hai ki aadmee talaaqnaama likh kar beevee ko rukhsat kar day.”
5eesa nay javaab diya, “moosa nay tumhaaree sakhtdilee kee vajah say tumhaaray liyay yah hukm likha tha. 6lekin ibtida men aisa naheen tha. duniya kee takhleeq kay vaqt allaah nay unhen mard aur aurat banaaya. 7‘is liyay mard apnay maan-baap ko chhod kar apnee beevee kay saath paivast ho jaata hai. 8vah donon ek ho jaatay hain.’ yoon vah kalaam-ay-muqaddas kay mutaabiq do naheen rahetay balki ek ho jaatay hain. 9to jisay allaah nay khud joda hai usay insaan juda na karay.”
10kisee ghar men a kar shaagirdon nay yah baat dubaara chhed kar eesa say mazeed darayaaft kiya. 11us nay unhen bataaya, “jo apnee beevee ko talaaq day kar kisee aur say shaadee karay vah us kay saath zina karta hai. 12aur jo aurat apnay khaavand ko talaaq day kar kisee aur say shaadee karay vah bhee zina kartee hai.”
eesa chhotay bachchon ko barkat deta hai
13ek din log apnay chhotay bachchon ko eesa kay paas laaay taaki vah unhen chhuay. lekin shaagirdon nay un ko malaamat kee. 14yah dekh kar eesa naaraaz hua. us nay un say kaha, “bachchon ko meray paas aanay do aur unhen na roko, kyoonki allaah kee baadshaahee in jaisay logon ko haasil hai. 15main tum ko sachch bataata hoon, jo allaah kee baadshaahee ko bachchay kee tarah qabool na karay vah us men daakhil naheen hoga.” 16yah kah kar us nay unhen galay lagaaya aur apnay haath un par rakh kar unhen barkat dee.
ameer mushkil say baadshaahee men daakhil ho saktay hain
17jab eesa ravaana honay laga to ek aadmee daud kar us kay paas aaya aur us kay saamnay ghutnay tek kar poochha, “nek ustaad, main kya karoon taaki abdee zindagee meeraas men paaoon?”
18eesa nay poochha, “too mujhay nek kyoon kaheta hai? koee nek naheen siva-ay-ek kay aur vah hai allaah. 19too shareeat kay ahkaam say to vaaqif hai. qatl na karna, zina na karna, choree na karna, jhootee gavaahee na dena, dhoka na dena, apnay baap aur apnee maan kee izzat karna.”
20aadmee nay javaab diya, “ustaad, main nay javaanee say aaj tak in tamaam ahkaam kee pairvee kee hai.”
21eesa nay ghaur say us kee taraf dekha. us kay dil men us kay liyay piyaar ubhar aaya. vah bola, “ek kaam rah gaya hai. ja, apnee pooree jaaydaad farokht karkay paisay ghareebon men taqseem kar day. phir teray liyay aasmaan par khazaana jama ho jaaega. is kay baad a kar meray peechhay ho lay.” 22yah sun kar aadmee ka munh latak gaya aur vah maayoos ho kar chala gaya, kyoonki vah nihaayat daulatmand tha.
23eesa nay apnay ird-gird dekh kar shaagirdon say kaha, “daulatmandon kay liyay allaah kee baadshaahee men daakhil hona kitna mushkil hai!”
24shaagird us kay yah alfaaz sun kar hairaan huay. lekin eesa nay dubaara kaha, “bachcho! allaah kee baadshaahee men daakhil hona kitna mushkil hai. 25ameer kay allaah kee baadshaahee men daakhil honay kee nisbat ziyaada aasaan yah hai ki oont sooee kay naakay men say guzar jaaay.”
26is par shaagird mazeed hairatzada huay aur ek doosray say kahenay lagay, “phir kis ko najaat mil saktee hai?”
27eesa nay ghaur say un kee taraf dekh kar javaab diya, “yah insaan kay liyay to naamumkin hai, lekin allaah kay liyay naheen. us kay liyay sab kuchh mumkin hai.”
28phir patras bol utha, “ham to apna sab kuchh chhod kar aap kay peechhay ho liyay hain.”
29eesa nay javaab diya, “main tum ko sachch bataata hoon, jis nay bhee meree aur allaah kee khushkhabaree kee khaatir apnay ghar, bhaaiyon, bahenon, maan, baap, bachchon ya kheton ko chhod diya hai 30usay is zamaanay men eezaarasaanee kay saath saath sau guna ziyaada ghar, bhaaee, bahenen, maaen, bachchay aur khet mil jaaengay. aur aanay vaalay zamaanay men usay abdee zindagee milegee. 31lekin bahut say log jo ab avval hain us vaqt aakhir hongay aur jo ab aakhir hain vah avval hongay.”
eesa teesree dafa apnee maut ka zikr karta hai
32ab vah yarooshalam kee taraf badh rahay thay aur eesa un kay aagay aagay chal raha tha. shaagird hairatzada thay jabki un kay peechhay chalnay vaalay log sahemay huay thay. ek aur dafa baarah shaagirdon ko ek taraf lay ja kar eesa unhen vah kuchh bataanay laga jo us kay saath honay ko tha. 33us nay kaha, “ham yarooshalam kee taraf badh rahay hain. vahaan ibn-ay-aadam ko raahanuma imaamon aur shareeat kay ulma kay havaalay kar diya jaaega. vah us par saza-ay-maut ka fatwa day kar usay ghairyahoodiyon kay havaalay kar dengay, 34jo us ka mazaaq udaaengay, us par thookengay, us ko koday maarengay aur usay qatl karengay. lekin teen din kay baad vah jee uthega.”
yaaqoob aur yoohanna kee guzaarish
35phir zabdee kay betay yaaqoob aur yoohanna us kay paas aaay. vah kahenay lagay, “ustaad, aap say ek guzaarish hai.”
36us nay poochha, “tum kya chaahatay ho ki main tumhaaray liyay karoon?”
37unhon nay javaab diya, “jab aap apnay jalaalee takht par baithengay to ham men say ek ko apnay daaen haath baithnay den aur doosray ko baaen haath.”
38eesa nay kaha, “tum ko naheen maaloom ki kya maang rahay ho. kya tum vah piyaala pee saktay ho jo main peenay ko hoon ya vah baptisma lay saktay ho jo main lenay ko hoon?”
39unhon nay javaab diya, “jee, ham kar saktay hain.” phir eesa nay un say kaha, “tum zaroor vah piyaala piyogay jo main peenay ko hoon aur vah baptisma logay jo main lenay ko hoon. 40lekin yah faisla karna mera kaam naheen ki kaun meray daaen haath baithega aur kaun baaen haath. allaah nay yah maqaam sirf un hee kay liyay tayyaar kiya hai jin ko us nay khud muqarrar kiya hai.”
41jab baaqee das shaagirdon nay yah suna to unhen yaaqoob aur yoohanna par ghussa aaya. 42is par eesa nay un sab ko bula kar kaha, “tum jaantay ho ki qaumon kay hukmaraan apnee r’aaya par rob daaltay hain, aur un kay baday afsar un par apnay ikhtiyaar ka ghalat istemaal kartay hain. 43lekin tumhaaray darmiyaan aisa naheen hai. jo tum men bada hona chaahay vah tumhaara khaadim bane 44aur jo tum men avval hona chaahay vah sab ka ghulaam banay. 45kyoonki ibn-ay-aadam bhee is liyay naheen aaya ki khidmat lay balki is liyay ki khidmat karay aur apnee jaan fidya kay taur par day kar bahuton ko chhudaaay.”
andhay baratimaaee kee shifaa
46vah yareehoo pahunch gaay. us men say guzar kar eesa shaagirdon aur ek baday hujoom kay saath baahar nikalnay laga. vahaan ek andha bheek maangnay vaala raastay kay kinaaray baitha tha. us ka naam baratimaaee (timaaee ka beta) tha. 47jab us nay suna ki eesa naasree qareeb hee hai to vah chillaanay laga, “eesa ibn-ay-daaood, mujh par rahem karen!”
48bahut say logon nay usay daant kar kaha, “khaamosh!” lekin vah mazeed oonchee aavaaz say pukaarta raha, “ibn-ay-daaood, mujh par rahem karen!”
49eesa ruk kar bola, “usay bulaao.”
chunaanchay unhon nay usay bula kar kaha, “hausla rakh. uth, vah tujhay bula raha hai.”
50baratimaaee nay apnee chaadar zameen par phaink dee aur uchhal kar eesa kay paas aaya.
51eesa nay poochha, “too kya chaahata hai ki main teray liyay karoon?”
us nay javaab diya, “ustaad, yah ki main dekh sakoon.”
52eesa nay kaha, “ja, teray eemaan nay tujhay bacha liya hai.”
joon hee eesa nay yah kaha andhay kee aankhen bahaal ho gaeen aur vah eesa kay peechhay chalnay laga.