Marqus 1
yaheya baptisma denay vaalay kee khidmat
1yah allaah kay farzand eesa maseeh kay baaray men khushkhabaree hai, 2jo yasaayaah nabee kee peshgoee kay mutaabiq yoon shuroo huee :
‘dekh, main apnay paighambar ko teray aagay aagay bhej deta hoon
jo teray liyay raasta tayyaar karega.
3registaan men ek aavaaz pukaar rahee hai,
rabb kee raah tayyaar karo!
us kay raastay seedhay banaao.’
4yah paighambar yaheya baptisma denay vaala tha. registaan men rah kar us nay elaan kiya ki log tauba karkay baptisma len taaki unhen apnay gunaahon kee muaafee mil jaaay. 5yahoodiya kay pooray ilaaqay kay log yarooshalam kay tamaam baashindon samet nikal kar us kay paas aaay. aur apnay gunaahon ko tasleem karkay unhon nay darya-ay-yardan men yaheya say baptisma liya.
6yaheya oonton kay baalon ka libaas pahenay aur kamar par chamday ka patka baandhay raheta tha. khuraak kay taur par vah tiddiyaan aur janglee shahed khaata tha. 7us nay elaan kiya, “meray baad ek aanay vaala hai jo mujh say bada hai. main jhuk kar us kay jooton kay tasmay kholnay kay bhee laaiq naheen. 8main tum ko paanee say baptisma deta hoon, lekin vah tumhen rooh-ul-quds say baptisma dega.”
eesa ka baptisma aur aazmaaish
9un dinon men eesa naasrat say aaya aur yaheya nay usay darya-ay-yardan men baptisma diya. 10paanee say nikaltay hee eesa nay dekha ki aasmaan phat raha hai aur rooh-ul-quds kabootar kee tarah mujh par utar raha hai. 11saath saath aasmaan say ek aavaaz sunaaee dee, “too mera piyaara farzand hai, tujh say main khush hoon.”
12is kay fauran baad rooh-ul-quds nay usay registaan men bhej diya. 13vahaan vah chaalees din raha jis kay dauraan iblees us kee aazmaaish karta raha. vah janglee jaanvaron kay darmiyaan raheta aur farishtay us kee khidmat kartay thay.
eesa chaar machheron ko bulaata hai
14jab yaheya ko jel men daal diya gaya to eesa galeel kay ilaaqay men aaya aur allaah kee khushkhabaree ka elaan karnay laga. 15vah bola, “muqarrara vaqt a gaya hai, allaah kee baadshaahee qareeb a gaee hai. tauba karo aur allaah kee khushkhabaree par eemaan laao.”
16ek din jab eesa galeel kee jheel kay kinaaray kinaaray chal raha tha to us nay shamaaoon aur us kay bhaaee andriyaas ko dekha. vah jheel men jaal daal rahay thay kyoonki vah maaheegeer thay. 17us nay kaha, “aao, meray peechhay ho lo, main tum ko aadamgeer banaaoonga.” 18yah suntay hee vah apnay jaalon ko chhod kar us kay peechhay ho liyay.
19thoda sa aagay ja kar eesa nay zabdee kay beton yaaqoob aur yoohanna ko dekha. vah kashtee men baithay apnay jaalon kee marammat kar rahay thay. 20us nay unhen fauran bulaaya to vah apnay baap ko mazdooron samet kashtee men chhod kar us kay peechhay ho liyay.
aadmee kee badruh kay qabzay say rihaaee
21vah kafarnahoom shaher men daakhil huay. aur sabat kay din eesa ibaadatkhaanay men ja kar logon ko sikhaanay laga. 22vah us kee taaleem sun kar hakka-bakka rah gaay kyoonki vah unhen shareeat kay aalimon kee tarah naheen balki ikhtiyaar kay saath sikhaata tha.
23un kay ibaadatkhaanay men ek aadmee tha jo kisee naapaak rooh kay qabzay men tha. eesa ko dekhtay hee vah cheekh cheekh kar bolnay laga, 24“ai naasrat kay eesa, hamaara aap kay saath kya vaasta hai? kya aap hamen halaak karnay aaay hain? main to jaanta hoon ki aap kaun hain, aap allaah kay quddoos hain.”
25eesa nay usay daant kar kaha, “khaamosh! aadmee say nikal ja!” 26is par badruh aadmee ko jhanjhod kar aur cheekhen maar maar kar us men say nikal gaee.
27tamaam log ghabra gaay aur ek doosray say kahenay lagay, “yah kya hai? ek naee taaleem jo ikhtiyaar kay saath dee ja rahee hai. aur vah badroohon ko hukm deta hai to vah us kee maantee hain.”
28aur eesa kay baaray men charcha jaldee say galeel kay pooray ilaaqay men phail gaya.
bahut say mareezon kee shifaa
29ibaadatkhaanay say nikalnay kay ain baad vah yaaqoob aur yoohanna kay saath shamaaoon aur andriyaas kay ghar gaay. 30vahaan shamaaoon kee saas bistar par padee thee, kyoonki usay bukhaar tha. unhon nay eesa ko bata diyaa 31to vah us kay nazdeek gaya. us ka haath pakad kar us nay uthnay men us kee madad kee. is par bukhaar utar gaya aur vah un kee khidmat karnay lagee.
32jab shaam huee aur sooraj ghuroob hua to log tamaam mareezon aur badruh-girifta ashkhaas ko eesa kay paas laaay. 33poora shaher darvaazay par jama ho gayaa 34aur eesa nay bahut say mareezon ko mukhtalif qism kee beemaariyon say shifa dee. us nay bahut see badruhen bhee nikaal deen, lekin us nay unhen bolnay na diya, kyoonki vah jaantee theen ki vah kaun hai.
galeel men munaadee
35aglay din subah-saveray jab abhee andhera hee tha to eesa uth kar dua karnay kay liyay kisee veeraan jagah chala gaya. 36baad men shamaaoon aur us kay saathee usay dhoondnay niklay. 37jab maaloom hua ki vah kahaan hai to unhon nay us say kaha, “tamaam log aap ko talaash kar rahay hain!”
38lekin eesa nay javaab diya, “aao, ham saath vaalee aabaadiyon men jaaen taaki main vahaan bhee munaadee karoon. kyoonki main isee maqsad say nikal aaya hoon.”
39chunaanchay vah pooray galeel men say guzarta hua ibaadatkhaanon men munaadee karta aur badroohon ko nikaalta raha.
kodh say shifaa
40ek aadmee eesa kay paas aaya jo kodh ka mareez tha. ghutnon kay bal jhuk kar us nay minnat kee, “agar aap chaahen to mujhay paak-saaf kar saktay hain.”
41eesa ko taras aaya. us nay apna haath badha kar usay chhua aur kaha, “main chaahata hoon, paak-saaf ho ja.” 42is par beemaaree fauran door ho gaee aur vah paak-saaf ho gaya. 43eesa nay usay fauran rukhsat karkay sakhtee say samjhaaya, 44“khabardaar! yah baat kisee ko na bataana balki bait-ul-muqaddas men imaam kay paas ja taaki vah tera muaaina karay. apnay saath vah qurbaanee lay ja jis ka taqaaza moosa kee shareeat un say kartee hai jinhen kodh say shifa milee ho. yoon alaaniya tasdeeq ho jaaegee ki too vaaqaee paak-saaf ho gaya hai.”
45aadmee chala gaya, lekin vah har jagah apnee kahaanee sunaanay laga. us nay yah khabar itnee phailaaee ki eesa khulay taur par kisee bhee shaher men daakhil na ho saka balki usay veeraan jagahon men rahena pada. lekin vahaan bhee log har jagah say us kay paas pahunch gaay.