Malaaqee 4

¹rabb-ul-afwaaj farmaata hai, “yaqeenan vah din aanay vaala hai jab mera ghazab bhadaktee bhattee kee tarah naazil ho kar har gustaakh aur bedeen shakhs ko bhoosay kee tarah bhasm kar dega. vah jad say lay kar shaakh tak mit jaaengay.

²lekin tum par jo meray naam ka khauf maantay ho raastee ka sooraj tuloo hoga, aur us kay paron talay shifa hogee. tab tum baahar nikal kar khulay chhoday huay bachhdon kee tarah khushee say koodtay phaandtay phirogay. ³jis din main yah kuchh karoonga us din tum bedeenon ko yoon kuchal daalogay ki vah paaon talay kee khaak ban jaaengay.” yah rabb-ul-afwaaj ka farmaan hai.

⁴“meray khaadim moosa kee shareeat ko yaad rakho yaanee vah tamaam ahkaam aur hidaayaat jo main nay usay horib yaanee seena pahaad par israaeelee qaum kay liyay dee theen. ⁵rabb kay us azeem aur haulnaak din say pahelay main tumhaaray paas ilyaas nabee ko bhejoonga. ⁶jab vah aaega to baap ka dil betay aur betay ka dil baap kee taraf maail karega taaki main a kar mulk ko apnay liyay makhsoos karkay nest-o-naabood na karoon.”