Malaaqee 3

¹rabb-ul-afwaaj javaab men farmaata hai, “dekh, main apnay paighambar ko bhej deta hoon jo meray aagay aagay chal kar mera raasta tayyaar karega. tab jis rabb ko tum talaash kar rahay ho vah achaanak apnay ghar men a maujood hoga. haan, ahd ka paighambar jis kee tum shiddat say aarzoo kartay ho vah aanay vaala hai!”

²lekin jab vah aaay to kaun yah bardaasht kar sakega? kaun qaaim rah sakega jab vah ham par zaahir ho jaaega? vah to dhaat dhaalnay vaalay kee aag ya dhobee kay tez saabun kee maanind hoga. ³vah baith kar chaandee ko pighla kar paak-saaf karega. jis tarah sonay-chaandee ko pighla kar paak-saaf kiya jaata hai usee tarah vah laavee kay qabeelay ko paak-saaf karega. tab vah rabb ko raast qurbaaniyaan pesh karengay. ⁴phir yahoodaah aur yarooshalam kee qurbaaniyaan qadeem zamaanay kee tarah dubaara rabb ko qabool hongee.

⁵rabb-ul-afwaaj farmaata hai, “main tumhaaree adaalat karnay kay liyay tumhaaray paas aaoonga. jald hee main un kay khilaaf gavaahee doonga jo mera khauf naheen maantay, jo jaadoogar aur zinaakaar hain, jo jhootee qasam khaatay, mazdooron ka haq maartay, bevaaon aur yateemon par zulm kartay aur ajnabiyon ka haq maartay hain.

tum allaah ko dhoka detay ho

⁶main, rabb tabdeel naheen hota, lekin tum ab tak yaaqoob kee aulaad rahay ho. ⁷apnay baapdaada kay zamaanay say lay kar aaj tak tum nay meray ahkaam say door rah kar un par dhyaan naheen diya. rabb-ul-afwaaj farmaata hai ki meray paas vaapas aao! tab main bhee tumhaaray paas vaapas aaoonga.

lekin tum etiraaz kartay ho, ‘ham kyoon vaapas aaen, ham say kya sarzad hua hai?’ ⁸kya munaasib hai ki insaan allaah ko thagay? hargiz naheen! lekin tum log yahee kuchh kar rahay ho. tum poochhtay ho, ‘ham kis tarah tujhay thagtay hain?’ is men ki tum mujhay apnee paidaavaar ka dasvaan hissa naheen detay. neez, tum imaamon ko qurbaaniyon ka vah hissa naheen detay jo un ka haq banta hai. ⁹pooree qaum mujhay thagtee rahetee hai, is liyay main nay tum par laanat bhejee hai.”

¹⁰rabb-ul-afwaaj farmaata hai, “meray ghar kay godaam men apnee paidaavaar ka poora dasvaan hissa jama karo taaki is men khuraak dastayaab ho. mujhay is men aazma kar dekho ki main apnay vaaday ko poora karta hoon ki naheen. kyoonki main tum say vaada karta hoon ki javaab men main aasmaan kay dareechay khol kar tum par hadd say ziyaada barkat barsa doonga.” ¹¹rabb-ul-afwaaj farmaata hai, “main keedon ko tumhaaree faslon say door rakhoonga taaki tumhaaray kheton kee paidaavaar aur tumhaaray angoor kharaab na ho jaaen balki pak jaaen. ¹²tab tumhaara mulk itna raahatabakhsh hoga ki tamaam aqvaam tumhen mubaarak kahengee.” yah rabb-ul-afwaaj ka farmaan hai.

jis din allaah faisla karegaa

¹³rabb farmaata hai, “tum meray baaray men kufr baktay ho. tum kahetay ho, ‘ham kyoonkar kufr baktay hain?’ ¹⁴is men ki tum kahetay ho, ‘allaah kee khidmat karna abas hai. kyoonki rabb-ul-afwaaj kee hidaayaat par dhyaan denay aur munh latka kar us kay huzoor phirnay say hamen kya faaida hua hai? ¹⁵chunaanchay gustaakh logon ko mubaarak ho, kyoonki bedeen phaltay phooltay aur allaah ko aazmaanay vaalay hee bachay rahetay hain’.”

¹⁶lekin phir rabb ka khauf maannay vaalay aapas men baat karnay lagay, aur rabb nay ghaur say un kee sunee. us kay huzoor yaadgaaree kee kitaab likhee gaee jis men un kay naam darj hain jo rabb ka khauf maantay aur us kay naam ka ehatiraam kartay hain. ¹⁷rabb-ul-afwaaj farmaata hai, “jis din main harkat men aaoonga us din vah meree khaas milkiyat hongay. main un par yoon rahem karoonga, jis tarah baap apnay us betay par taras khaata hai jo us kee khidmat karta hai. ¹⁸us vaqt tumhen raastbaaz aur bedeen ka farq dubaara nazar aaega. saaf zaahir ho jaaega ki allaah kee khidmat karnay vaalon aur doosron men kya farq hai.”